A dë wan föutu soni te wan sëmbë ta tjali ö?

I bi siki wan daka kaa u? Kandë i bi ko bëtë hesihesi seei taa ja bi pena mëni möön taa i bi siki. Ma na sö a dë ku di tjali di wan sëmbë ta tjali te wan sëmbë fëën dëdë. Di data de kai Alan Wolfelt bi sikifi a wan buku fëën taa: „Wan sëmbë an ta kaba tjali möönsö.” A taki tu taa: „Baka wan pisiten, ja o ta tjali sö möön, u di wotowan o heepi i.”​—Healing a Spouse’s Grieving Heart.

Luku andi bi pasa ku Abahamu di di mujëë fëën dëdë. Di Bëibel ta taki taa „Abahamu bigi ta tjali ta këë u Sala hedi”. Di wöutu „bigi” ta lei taa Abahamu bi tjali wan hii pisiten.a Wan woto sëmbë di bi ta tjali da Jakopu. De bi ganjëën taa hogi mbeti bi kii di womi mii fëën de kai Josëfu. A bi tjali „sömëni daka” longi, nöö dee famii fëën seei an bi sa kötö hën hati. Sömëni jaa baka di dë, a bi ta tjali gaanfa jeti, u di a bi mëni taa Josëfu dëdë.​—Kenesesi 23:2; 37:34, 35; 42:36; 45:28.

Sö nöö sëmbë ta tjali a di ten aki tu te wan sëmbë u de dëdë. Luku dee tu woto aki.

• „Mi manu Robert dëdë a 9 u baimatu-liba u di jaa 2008. Di daka di a dëdë bi dë kuma dee woto daka nöö. U bi mbei te bebe kumafa u bi guwenti ufö a go a wooko. U bi bosi useei, baasa useei te u kaba, hën u piki useei taa u lobi useei. Sikisi jaa pasa kaa, ma tökuseei mi ta fii di pen aki jeti. Ma si kuma mi o sa fëëkëtë Rob wan daka.”​—Gail, di abi 60 jaa.

• „Hii fa mi mujëë dëdë möön leki 18 jaa kaa, tökuseei mi ta hangi ën jeti, nöö mi ta tjali jeti. Te mi si wan waiti soni di Gadu mbei, nöö mi ta pakisei ën. Mi ta si fa a bi o wai seei te a bi o si di soni di mi ta si dë.”​—Etienne, di abi 84 jaa.

An dë wan föutu soni te sëmbë ta tjali longi te wan sëmbë u de dëdë. Hiniwan sëmbë ta tjali a di fëën fasi. Nöö an bi o bunu u kuutu wan sëmbë u di fasi fa a ta tjali te soni miti ën. Söseei wa musu ta kuutu useei taa u ta tjali tumusi. Wë nöö andi sa heepi u te u te tjali?