I musu ta buta pakisei a di wooko di u kisi u mbei sëmbë ko dë bakama u Jesosi
1. Andi u musu du ee wa kë sëmbë lasi de libi?
1 Di pampia di ta lei unfa soni bi waka a di diniwooko jaa u 2014, ta lei unfa dee sëmbë u Gadu dë kabakaba, söseei fa de dë fajafaja u peleiki di bunu buka di nama ku di Könuköndë (Mat. 24:14). Di go di u nango peleiki da sëmbë a de pisi, dee talakitaati ku dee kai dee u ta paati da sëmbë a wan apaiti pisiten u di jaa, ku di peleiki di u ta peleiki a kamian ka hia sëmbë ta waka pasa, bi heepi u fuu paaja di bosikopu di dë a Bëibel da möön hia sëmbë. Nöö nöiti sö wan soni bi pasa jeti. Ee wa kë sëmbë lasi de libi, nöö u musu lei de soni u Bëibel, so taa de sa ko dë bakama u Jesosi.—1 Tim. 2:4.
2. Andi u sa hakisi useei fuu sa sabi ee hii juu u ta dë kabakaba u bigi wan Bëibel studie?
2 Hii juu i musu ta dë kabakaba u bigi wan Bëibel studie: I ta mbei möiti u feni di nöbu u wan sëmbë di kë sabi möön soni u Bëibel, nasö u sabi ka a ta libi, sö taa i sa bëli ën nasö go nëën wantewante u bigi wan Bëibel studie ku ën u? Na un ten bi dë di lasiti pasi di i bi lei wan sëmbë unfa u ta lei sëmbë soni u Bëibel? I bi pëë dee fëlön Faandi mbei u musu lei soni u Bëibel? ku Unfa u ta lei sëmbë soni u Bëibel?, da dee sëmbë dee i ku de ta wooko a di wan kamian u? Nasö i bi pëë de da dee mii a siköö, da dee sëmbë dee ta libi a i bandja, da dee famii fii, nasö da woto sëmbë u? Te i ta wooko ku di bukutafa nasö di bukuwagi, i ta mbei möiti u piki dee sëmbë dee ta tei buku, taa sëmbë sa ko lei de soni u Bëibel söndö u paka u?
3. Andi u abi fanöudu fuu sa lei sëmbë soni u di tuutuu lei a wan bunu fasi?
3 Jehovah ku Jesosi ta heepi u: Di Jesosi piki dee bakama fëën taa de musu „go” heepi sëmbë „be de bia ko dë bakama” fëën, nöö a bi kë lei u taa u musu ta mbei taanga möiti u heepi sëmbë u de ko dë bakama fëën. An disa u fuu wanwan go du di wooko aki, ma a paamusi u taa a o dë ku u (Mat. 28:19, 20). Boiti di dë, Jehovah da u di santa jeje fëën, a da u dee soni dee u abi fanöudu u du di wooko, söseei a lei u unfa u musu ta lei sëmbë soni u di tuutuu lei (Sak. 4:6; 2 Kol. 4:7). U sa begi Jehovah faa heepi u fuu „kë” du di fanöudu wooko aki, söseei faa sa da u „taanga” tu.—Fil. 2:13.
4. Faandi mbei u musu ta buta pakisei a di wooko di u kisi u mbei sëmbë ko dë bakama u Jesosi?
4 Di paaja di u ta paaja di bunu buka ta mbei u ta dë waiwai seei. Ma u ta möön wai te u lei wan sëmbë soni u di tuutuu lei, söseei te u heepi ën faa ko ta waka makandi ku u a „di pasi di ta tja sëmbë go feni libi” (Mat. 7:14; 1 Tes. 2:19, 20). Ma di möön fanöudu soni, hën da te u ta buta pakisei a di wooko di u kisi u mbei sëmbë ko dë bakama u Jesosi, nöö u ta mbei Jehovah hati ta piizii, u di „an kë fu na wan kodo sëmbë musu lasi kaba a sösö. Ma a kë u hii sëmbë musu bia de libi ko nëën”—2 Pet. 3:9.