Soni di sëmbë hakisi

◼ Wan peleikima sa wooko ku Internet u peleiki nasö u lei sëmbë di ta libi a wan woto köndë soni u Bëibel ö?

So peleikima bi wooko ku Internet u feni sëmbë di ta libi a köndë ka lanti tapa di wooko fuu, nasö a köndë ka hia peleikima an dë, u lei de soni u Bëibel. Nöö so juu soni bi waka bunu da de. Ma hii fa a dë sö, tökuseei hogi sa miti dee peleikima dee ta fan ku sëmbë di de an sabi, a Internet. (Luku bld. 3 u di Wi Kownukondre diniwroko u baimatu-liba u 2007.) Hii fa di maaka fuu da u peleiki di bunu buka u di Könuköndë da bunuhati sëmbë, tökuseei di soni aki sa mbei wan baaa nasö wan sisa go nama ku takumati, nasö ku sëmbë di bia baka da di tuutuu biibi (1 Kol. 1:19-25; Kol. 2:8). Boiti di dë, a dee köndë ka lanti tapa di wooko fuu, dee lanti sa ko si dee bosikopu dee u ta manda a Internet, nöö di soni dë sa mbei de go du ku dee baaa ku sisa fuu u dee köndë dë. Fëën mbei wan peleikima an musu go ta suku sëmbë u woto köndë a Internet, u konda soni u di bunu buka da de.

Ee u bi peleiki da wan woto köndë sëmbë di ko köi a di köndë fuu, nöö te a toona go nëën köndë, wa musu go suku u lei ën soni u Bëibel a Internet go dou, boiti ee di bëikantoo hën piki u fuu du sö. Ma ee na di bëikantoo hën manda u, nöö a bi o möön bunu fuu lei ën unfa a sa go suku soni a jw.org u ko sabi möön soni, nasö u sa piki ën taa a sa bëli nasö sikifi wan biifi manda go a di bëikantoo u di köndë ka a ta libi. U sa dëën taanga u go a komakandi a wan u dee Könuköndë zali di dë zuntu ku ka a ta libi. A dë sö tuu taa, na hii köndë abi wan Könuköndë zali. Ma ee a bi o kë u wan Kotoigi di ta libi zuntu ku ka a ta libi ko nëën pisi, nöö i sa fuu di Gobaka-pampia, nöö i tjëën go da di sekretares u di kemeente fii. Baka di dë, di sekretares o go a jw.org u manda dee soni u di sëmbë go da di bëikantoo u di köndë ka di sëmbë ta libi. Nöö u di di bëikantoo sabi möon bunu fa soni dë a di köndë dë, mbei de o sa heepi di sëmbë möön bunu u ko sabi Gadu.​—Luku bld. 7 u di Wi Kownukondre diniwroko u höndima-liba u 2014, ku bld. 2 u di Wi Kownukondre diniwroko u ëlufumu-liba u 2011.

Ee nöunöu u abi wan sëmbë di u ta lei soni u Bëibel, ma a foloisi go libi a wan woto köndë, nasö ee nöunöu u ta lei wan sëmbë di u miti a Internet soni u Bëibel, nöö u musu wooko ku dee lai dee sikifi a liba dë. Ma u sa ta lei di sëmbë soni u te wan peleikima u di köndë fëën bigi go ta lei ën. Ma ee di sëmbë ta libi a wan köndë ka lanti tapa di wooko fuu, nöö u musu ta köni seei te woo peleiki da di sëmbë ku biifi, ku tëlëfön, nasö ku wan woto soni.​—Mat. 10:16.