Unfa u sa dou di hati u dee sëmbë dee u ta lei soni u Bëibel
1. Andi bi ta pasa te Jesosi bi ta lei sëmbë soni?
1 Jesosi Keesitu bi ta dou sëmbë hati te a bi ta lei de soni. Wan daka di Jesosi bi puu Gadu Buku gbelingbelin da dee bakama fëën, hën hati u de „bi fii piizii” seei (Luk. 24:32). Ee sëmbë musu ta piki Gadu buka ku hii de hati, nöö unfa u sa dou di hati u dee sëmbë dee u ta lei soni u Bëibel sö taa de bia de libi?—Lom. 6:17.
2. Unfa di fan di woo ta fan ku köni, söseei di köni u si soni a wan bunu fasi, o mbei u dou sëmbë hati?
2 Fan ku köni, nöö abi di köni u si soni a wan bunu fasi: Te i piki so sëmbë andi bunu ku andi an bunu, nöö di soni dë an ta tjika u mbei de hopo du wan soni. Ee i bi o lesi gaan hia tëkisi da de u lei de taa di biibi u de an bunu, nöö a sa mbei de an kë haika i. Ee u kë heepi wan sëmbë, nöö u musu ko sabi ufö faandi mbei a ta biibi so soni, ku faandi mbei a ta du so soni. Te u ta buta hakisi da di sëmbë a wan köni fasi, nöö di soni dë sa mbei a konda da u unfa a ta pakisei tuutuu (Nöng. 20:5). Te u du sö ufö woo sa sabi un Bëibel tëkisi sa dou hën hati. Fëën mbei u musu lei taa u kë heepi di sëmbë, nöö u musu abi pasensi (Nöng. 25:15). Hoi a pakisei taa na hii sëmbë nango a fesi a di wan seei fasi. Dëën ten be di santa jeje u Jehovah heepi ën faa ko ta pakisei ta du soni a wan fasi di ta kai ku Jehovah.—Maik. 4:26-29.
3. Unfa u sa heepi dee sëmbë dee u ta lei soni u Bëibel u ko abi fasi di bunu?
3 Heepi de u ko abi fasi di bunu: Dee Bëibel tëkisi dee ta lei fa Jehovah abi bunu fasi ku fa a abi lobi, sa heepi dee sëmbë dee u ta lei soni u Bëibel u ko abi fasi di bunu. U sa lesi Psalöm 139:1-4 nasö Lukasi 12:6, 7 u lei de fa Gadu lobi hiniwan fuu tjika. Te de ta tei di bunuhati di Gadu abi da de u bigi, nöö de o ko möön lobi Gadu, söseei de o kë dini ën seei (Lom. 5:6-8; 1 Joh. 4:19). Söseei te de ko lei sabi taa dee soni di de ta du sa mbei Jehovah piizii nasö de sa mbei a fii tjali, nöö de o kë du soni di ta kai ku Jehovah, ku di ta tja gafa ko dëën.—Ps. 78:40, 41; Nöng. 23:15.
4. Unfa u sa lei taa u ta lesipeki di leti di wan sëmbë abi u taki da hënseei andi a o du?
4 Jehovah an ta duwengi na wan sëmbë u hoi dee wëti fëën. Ma a ta heepi de u ko sabi un wini de o feni te de ta haikëën (Jes. 48:17, 18). U ta djeesi Jehovah te u ta lei sëmbë soni a wan fasi di ta heepi de u de ko sabi andi de musu du. Te deseei ko si taa de musu bia libi, nöö de an o bia libi u wan pisiten nöö, ma u nöömö (Lom. 12:2). Söseei de o ko möön zuntu ku Jehovah,„di sëmbë di ta öndösuku sëmbë hati”.—Nöng. 17:3.