I ta mbei di Wöutu u Gadu tii i hiniwan daka u?

Te u ta lesi Bëibel hiniwan daka, nöö woo ko „dë kuma wan pau di hën lutu go fundu a goon”, söseei woo „ta biibi taanga nango möönmöön.” (Kol. 2:6, 7). Ma ee u kë u di Wöutu u Jehovah heepi u, nöö u musu ta pakisei fundu fëën, söseei u musu ta du andi dee mama wëti dee sikifi nëën ta taki (Heb. 4:12; Jak. 1:22-25). Josua 1:8 ta taki u dii soni di u musu du ee u kë u di Wöutu u Gadu heepi u: (1) Lesi di Wöutu u Gadu „ndeti ku didia”. (2) Lesi ën ku wan „saapi töngö”. Di soni aki kë taki taa i musu ta lesi a sö wan fasi taa i sa pakisei fundu u dee soni dee i ta lesi, söseei u si fa dee soni dee i ta lesi bi pasa. (3) Du „hii dee soni dee sikifi nëën” fajafaja. Te u ta du dee dii soni aki, nöö „soni o waka bunu” da u, söseei woo ta „du soni a wan köni fasi”.