DI LIBI FUU KUMA KEESITU SËMBË

Wan njunjun soni da di komakandi u mindi wiki

A bigi u jailiba 2018, di komakandi di u ta hoi a mindi wiki o ta abi wantu soni di i sa öndösuku möön fini ku fëlön di de tei puu a di Nyun-Grontapuvertaling studie Bëibel di dë a Internet, aluwasi an dë a di töngö fii jeti. U dë seiki taa di soni aki o heepi i fii sa seeka iseei möön bunu. Di möön fanöudu soni, hën da a o mbei i ku di lobihati Tata fii Jehovah, ko dë möön gaan mati!

SONI DI I SA ÖNDÖSUKU MÖÖN FINI:

Joo sa öndösuku soni di sëmbë bi guwenti u ta du a wan köndë, naasë so kamian bi dë, ku di fasi fa de puu so Bëibel tëkisi

Mateosi 12:20

Wan faja di ta tapa nango njöiin: Dee lampu di sëmbë bi ta abi na awooten bi ta dë wan piki logoo soni di de bi mbei ku doti, nöö de bi ta lai oleifi oli nëën dendu. Di maaun fëën bi ta hai di oli tei, sö taa di faja bi sa ta dë sëndësëndë. Di Giiki wöutu u di pisi wan „faja di ta suku u tapa” ta lei go a wan maaun di sumuku ta kumutu nëën, u di wan pikisö faja dë nëën jeti, nöö di faja töngö ta tapa nango pikipiki. Di tjabukama woto u Jesaaja 42:3 bi taki a fesi fa Jesosi bi o ta fii da sëmbë. An bi o mbei dee sakafasi sëmbë ku dee sëmbë di wotowan bi ta pena lasi di pikisö biibi di de bi abi jeti.

Mateosi 26:13

Un sa dë seiki taa: Di Giiki wöutu a·menʹ di de tei u di Hebelejën wöutu ʼa·menʹ kë taki „a tan sö” nasö „sö a dë”. Jesosi bi lo’ u taki di soni aki te a bi o taki wan soni, te a bi o paamusi wan soni nasö te a bi o konda wan tjabukama woto. A bi ta taki ën u lei taa dee soni dee a taki dë tuutuu soni, nöö de sa biibi de. Di fasi fa Jesosi bi ta wooko ku di wöutu aki an dë u feni a woto kamian a di Bëibel, söseei a woto keiki buku, ma a dee Bëibel buku Mateosi, Maikusi, Lukasi ku Johanisi nöö a dë u feni. So juu Jesosi bi ta taki di wöutu aki tu pasi (a·menʹ a·menʹ) u lei taa dee soni di a ta taki da tuutuu soni, nöö a du di soni aki wantu pasi a di buku Johanisi.—Jo 1:51.

FËLÖN

Footoo, kaita ku fëlön ka sëmbë an ta fan ku soni di de teeken ta lei sömëni soni finifini u dee woto dee sikifi a Bëibel.

Betifaigi, di kuun de kai Oleifi Kuun, ku Jelusalen

Di fëlön aki ta lei u wan pasi di dë a di kamian de kai et-Tur (a kan taa di foto aki bi dë di foto Betifaigi a Bëibel ten), di dë a di së u sonu kumutu di ta tjai i go a wan u dee hei pisi u di kuun de kai Oleifi Kuun di dë a Jelusalen. Betania dë a di së u sonu kumutu u Betifaigi a di së u Oleifi Kuun. Te Jesosi bi dë a Jelusalen, nöö hën ku dee bakama fëën bi lo’ u go duumi a Betania. Nöunöu de ta kai di foto aki el-ʽAzariyeh (El ʽEizariya ). A dë wan Alabu në di kë taki „Di kamian u Lazalosi”. Jesosi bi lo’ u go a Maita, Malia ku Lazalosi pisi a Betania (Mt 21:17; Mk 11:11; Lu 21:37; Jo 11:1). Te Jesosi bi ta kumutu a de pisi u go a Jelusalen, nöö kandë a bi lo’ u waka wan pasi di ta djei di pasi di u si a di fëlön. A 9 Nisan u di jaa 33 Ba.K., di Jesosi bi lëi a wan buliki mii liba pasa a di Oleifi Kuun go a Jelusalen, nöö a musu u dë sö taa a bi lëi kumutu a Betifaigi go a Jelusalen.

Di pasi di ta kumutu a Betania go a Betifaigi
Betifaigi
Oleifi Kuun
Di lagi kamian u Kidilön
Di kamian ka di wosu u Gadu bi dë

Peegu a wan bakafutu bonu

Disi da wan footoo ka u ta si fa de bi peka wan peegu di langa söwan 11.5 cm (4.5 doi) go a wan sëmbë bakafutu bonu. Ma disi na wan tuutuu wan, sëmbë hën mbei ën. De bi feni wan tuutuu wan fëën a di jaa 1968 di de bi go ta diki ta suku soni a wan kamian a bausë u Jelusalen, nöö a bi dë u wan sëmbë di bi ta libi a di ten u dee Loomë sëmbë. Di soni aki ta lei taa de bi ta peka wan sëmbë ku peegu a wan posu hoi te de bi ta kii ën. A kan taa ku sö wan peegu dee Loomë sodati bi peka Jesosi Keesitu a di posu. De bi feni di mbeimbei wan u di soni aki a wan sitonu këdë dendu ka de bi ta buta libisëmbë dëdë bonu. Di soni aki ta lei taa de bi sa bei wan sëmbë di de bi peka a posu kii.—Mt 27:35.