Te u ta tja useei a wan bunu fasi, ku te u abi gaan lesipeki, nöö u sa wini di sëmbë di u ku ën tööu

Di fasi fa dee mujëë dee tööu, dee ko toon Keesitu sëmbë ta tja deseei, ta mbei taa so juu de manu ta tei di tuutuu lei. Ma a o dë u de hoi dou sömëni jaa longi a dee fuka dee o ta miti de (1Pe 2:21-23; 3:1, 2). Aluwasi i manu an ta libi bunu ku i, tökuseei i musu ta mbei möiti u wini hogidu ku bunulibi (Lo 12:21). Kandë i manu an o kë haika dee soni dee i ta konda dëën u Jehovah, ma te a ta si unfa i ta tja iseei a wan bunu fasi, nöö kandë a sa tooka di fasi fa a ta pakisei u di tuutuu lei.

Mbei möiti u fusutan unfa i manu ta si so soni (Fp 2:3, 4). Lei taa i ta fii da i manu, söseei taa i abi tjalihati fëën, nöö mbei möiti u ta du dee soni dee i kuma mujëë musu ta du. Ta haikëën bunu te a ta fan (Jak 1:19). I musu abi pasensi ku ën, nöö be a ta si taa i lobi ën. Aluwasi i manu an ta libi bunu ku i kumafa ii ta libi ku ën, söseei aluwasi an ta lesipeki i kumafa ii ta lesipeki ën, ma tökuseei i sa ta dë waiwai u di Jehovah ta tei ën u bigi taa i ta hoi dou.​—1Pe 2:19, 20.

LUKU DI FËLÖN JEHOVAH TA DA U TAANGA FUU SA TJA DEE FUKA FUU, BAKA DI DË, NÖÖ PIKI DEE HAKISI AKI:

• Unfa di libi bi dë da Grace Li bigibigi di a tööu?

• Andi bi mbei a bi kë lei soni u Bëibel?

• Unfa Sisa Li bi hoi dou di tesi bi ta miti ën baka di a bi dopu?

• Fuun soni Sisa Li bi ta begi di bi nama ku hën manu?

• Un gaan bunu Sisa Li bi feni, u di a bi ta tja hënseei a wan bunu fasi, söseei u di a bi abi gaan lesipeki dëën manu?