Tei di dë di i ku Jehovah dë mati u bigi

Dee Jehovah Kotoigi abi wan apaiti gaandi. U kuma Keesitu sëmbë di buta u libi a Jehovah maun, hën u dopu, ta mbei möiti nöömö fuu ku di Kaba Hei Gadu fuu Jehovah ko dë möön gaan mati. A mbei di Womi Mii fëën heepi u fuu ku ën ko dë mati (Jo 6:44). A ta haika dee begi fuu.​—Ps 34:15.

Unfa u sa köni be soni an ko poi di dë di u ku Jehovah dë mati? Wë, u musu ta köni fu wa mbei dee seei föutu di dee Isaëli sëmbë bi mbei. Kölö sö baka di de bi mbei wan buka ku Jehovah, hën de mbei wan goutu kau, hën de bigi ta dini poipoi gadu (Ëki 32:7, 8; 1Ko 10:7, 11, 14). Kandë u sa hakisi useei taa: ’Andi mi ta du te wan tesi miti mi u du wan soni di an bunu? Dee soni dee mi ta du ta lei taa mi ta tei di dë di mi ku Jehovah dë mati u bigi ö?’ Te u lobi di Tata fuu a liba ala ku hii u hati, nöö woo ta köni fu wa du soni di a ta buuse.​—Ps 97:10.

LUKU DI FËLÖN NA MBEI SONI KO POI DI DË DI I KU JEHOVAH DË MATI (KOL 3:5), NÖÖ BAKA DI DË, PIKI DEE HAKISI AKI:

• Andi da langawojo?

• Faandi mbei wa musu abi langawojo, söseei faandi mbei u musu köni fu wa dini poipoi gadu?

• Unfa di waka di wan sëmbë ta waka da di sëmbë di hën ku ën tööu dë di wan seei soni kuma te wan sëmbë ta dini poipoi gadu?

• Faandi mbei dee sëmbë dee tööu musu ta buta pakisei a di da di de musu ta da di sëmbë di de ku ën tööu dee soni di a abi fanöudu, möönmöön dee sëmbë dee abi faantiwöutu a di ölganisaasi?