Soni di dee lesima hakisi

Tu Tesalonika 3:14 ta taki taa u musu ta „köni” ku so sëmbë. Ambë ta taki ee u musu köni ku wan sëmbë, dee gaanwomi nasö dee peleikima seei?

Apösutu Paulosu bi sikifi wan biifi manda da dee Keesitu sëmbë u Tesalonika, ka a bi taki taa: „Ee wan sëmbë an ta du dee soni dee u taki a di biifi aki, nöö un musu ta köni ku ën e” (2 Tes. 3:14). Fosufosu, u bi lo’ u taki taa ku dee gaanwomi Paulosu bi ta fan a di pisi aki. Ee dee gaanwomi bi fan ku wan sëmbë sömëni pasi, hën tökuseei di sëmbë an bi kë bia du soni kumafa di Bëibel ta taki, nöö dee gaanwomi bi sa hoi wan taki u piki di kemeente taa de musu ta köni ku di sëmbë dë. Baka di dë, nöö dee peleikima an bi o ta du soni u mbei piizii makandi ku di sëmbë möön.

Ma u ko ta si di soni aki wan woto fasi. U ko fusutan taa Paulosu bi ta taki andi hiniwan peleikima bi musu du, te de bi si taa a bi dë fanöudu. Hën da an dë fanöudu u dee gaanwomi hoi wan taki u piki di kemeente taa de musu ta köni ku wan sëmbë. Faandi mbei u taki sö? Luku na un ten Paulosu bi taki di soni dë.

Paulosu bi ko si taa so sëmbë u di kemeente ’an bi ta tja deseei a wan fasi di fiti’. A bi tei di Wöutu u Gadu u bai de a soni, ma de an bi kë piki hën buka. Di a bi go luku di kemeente, hën a bi piki de taa: „Ee wan sëmbë an kë wooko nöö an musu njan tu.” Ma tökuseei so sëmbë an bi kë wooko sölugu deseei, hii fa de bi sa du ën. Boiti di dë, de bi ta hulu sëmbë soni. Unfa dee Keesitu sëmbë bi musu libi ku dee sëmbë dee bi ta du soni a di lö fasi dë?​—2 Tes. 3:6, 10-12.

Paulosu bi piki de taa: ’Un musu ta köni ku de e’. Di Giiki wöutu di nama ku di pisi aki, kë taki taa i musu ta mëni iseei ku wan sëmbë. Ku hii di kemeente Paulosu bi ta fan aki, na ku dee gaanwomi wanwan (2 Tes. 1:1; 3:6). Fëën mbei ee wan Keesitu sëmbë bi si taa wan baaa nasö wan sisa an bi ta du soni kumafa Gadu bi mbei dee baaa taki, nöö a bi sa buta da hënseei taa an bi o „hulu ën möön”.

Di soni aki kë taki taa de bi o ta libi ku di sëmbë kuma wan sëmbë di de puu a di kemeente u? Wë nönö. Biga Paulosu bi taki tu taa: „Ma be un ta bai ën nöö be a bia, kumafa i ta bai i baaa womi a soni.” Hën da dee woto Keesitu sëmbë bi o ta nama ku sö wan sëmbë a dee komakandi ku di peleikiwooko jeti, ma de an bi o ta du soni u mbei piizii makandi ku ën. Faandi mbei? Paulosu bi taki taa: „Be sen kisi ën.” U di dee baaa ku dee sisa bi o ta köni ku di sëmbë di an ta tja hënseei a wan bunu fasi, mbei sen bi sa kisi ën, nöö a bia du soni a wan woto fasi.​—2 Tes. 3:14, 15.

Unfa dee Keesitu sëmbë a di ten aki sa sabi na un ten de musu ta köni ku wan sëmbë? Di fosu soni, hën da u musu dë seiki taa di sëmbë ’an ta tja hënseei a wan fasi di fiti’, kumafa Paulosu bi taki. Paulosu an bi ta taki u sëmbë di bi ta mbei háti u de tii de a soni woto fasi. Söseei an bi ta taki u sëmbë di bi du wan soni di hati u. Ma a bi ta taki u sëmbë di de bi bai a soni ku di Wöutu u Gadu, hën tökuseei de an haika.

A di ten aki, ee u si taa wan baaa nasö wan sisa ta du soni a di lö fasi dë,a nöö u sa buta da useei taa wa o ta du soni u mbei piizii makandi ku ën. U di hiniwan sëmbë musu taki unfa a o du soni, mbei wa o taki u di soni aki ku sëmbë di an dë sëmbë fuu wosudendu. Söseei woo ta nama ku sö wan sëmbë a dee komakandi ku di peleikiwooko jeti. Te a bia ko ta du soni woto fasi, nöö woo toona ta hulu ën kuma fosu baka.