Wan soni di an taanga u hakisi sëmbë

Mary ku hën manu John,a ta libi a wan köndë te ka sömëni sëmbë u Filipijnen ko ta libi, nasö ko ta wooko. De bi ta wai seei u peleiki da dee sëmbë dë. A di pisiten di di kolona siki bi ta paaja a hii goonliba, hën Mary bigi lei sömëni sëmbë soni u Bëibel a di köndë ka a ta libi, ku sömëni woto köndë jeti. Unfa a du feni sömëni sëmbë u lei soni u Bëibel?

Mary bi lo’ u hakisi dee sëmbë dee a bi ta lei soni u Bëibel di soni aki: „I sabi woto sëmbë di bi o kë lei soni u Bëibel tu ö?” Ee de bi taa aai, nöö a bi ta toona hakisi de u de heepi ën faa ko sabi dee sëmbë dë. Te i ta hakisi di soni aki, nöö i ta feni wini fëën. Faandi mbei u taki sö? Wë dee sëmbë dee lobi dee soni dee de ta lei a Bëibel, ta kë konda dee soni dë da dee famii u de, ku dee mati u de. Wë andi bi ko pasa di Mary bi ta hakisi di soni dë?

Jasmin da wan sëmbë di Mary ta lei soni u Bëibel, nöö a bi mbei Mary ko sabi fö woto sëmbë di bi kë lei soni u Bëibel tu. Wan u de de ta kai Kristine, nöö a bi lobi di lei di a bi ta lei soni u Bëibel sö tee taa a bi hakisi Mary faa a ta lei ën soni tu pasi a wan wiki. Di Mary hakisi ën ee a sa’ woto sëmbë di kë lei soni u Bëibel tu, hën Kristine taa: „Aai, mi o mbei i ko sabi dee mati u mi.” A wantu wiki dendu, hën Kristine bi mbei Mary ko sabi fö u dee mati fëën dee bi kë lei soni u Bëibel. Bakaten, hën Kristine bi mbei a ko sabi wanlö woto mati fëën. Nöö dee woto mati fëën dë bi du si seei soni tu.

Kristine bi kë u dee famii fëën dee ta libi a Filipijnen lei soni u Bëibel. Fëën mbei a bi fan ku di mujëë mii fëën de kai Andrea. Bigibigi, nöö Andrea bi ta pakisei taa Jehovah Kotoigi da wan poipoi keiki di an ta biibi a Jesosi, nöö a bi ta si kuma de ta wooko ku dee Hebelejën Buku u Bëibel wanwan. Ma wan pasi nöö a bi lei soni u Bëibel, hën wojo fëën ko limbo. Hiniwan pasi te a bi ta lei soni u Bëibel, nöö a bi ta taki taa: „Ee di Bëibel taki sö, nöö sö a dë tuu!”

Baka wan pisiten, hën Andrea bi mbei Mary ko sabi tu mati fëën, ku wan woto sëmbë di hën ku ën bi ta wooko a wan kamian. Hii de tuu bigi ta lei soni u Bëibel. Boiti di dë, Angela, di piki sisa u Andrea tata di wojo bi booko, bi ta haika te Andrea bi ta lei soni u Bëibel, nöö Mary an bi sabi seei. Hën wan daka, hën Angela hakisi Andrea faa heepi ën faa ko sabi Mary, sö taa a bi sa hakisi ën faa lei ën soni u Bëibel. Angela bi lobi dee soni dee a bi ta lei. A wan liba dendu, a bi hoi sömëni Bëibel tëkisi a hedi, nöö a bi hakisi Mary u lei ën soni u Bëibel fö pasi a wan wiki! Andrea bi heepi ën faa nango a dee komakandi a zoom.

Di mary ko sabi taa di manu u Kristine de kai Joshua, bi guwenti u dë a zuntu te Kristine bi ta lei soni u Bëibel, hën Mary hakisi ën ee an bi kë lei soni u Bëibel makandi ku de. Joshua bi taki taa: „Mi o ta haika nöö, ma wan musu hakisi mi soni e, ee nasö mi o kumutu aki.” An bi dou feifi miniti seei di de bigi, hën a bi hakisi soni möön Kristine seei, nöö a bi kë lei soni u Bëibel tu.

Di wan kodo soni di Mary bi hakisi dë, bi mbei taa a bi ko abi gaan hia sëmbë u lei soni u Bëibel. Mary bi seti soni ku woto baaa ku sisa u de sa heepi dee sëmbë u lei soni u Bëibel. Mary bi feni 28 sëmbë ta lei soni u Bëibel, a fö tookatooka köndë.

Jasmin di fosu sëmbë di bi bigi lei soni u Bëibel, bi dopu a piki-deewei-liba u di jaa 2021. Kristine bi dopu a sebitaa-liba u di jaa 2022, nöö a bi toona go a dee sëmbë fëën a Filipijnen. Tu woto sëmbë di Kristine bi mbei Mary ko sabi seei bi dopu tu. Angela bi dopu wantu liba baka di dë, nöö nöunöu a ta du di kowoonu pioniliwooko. Kristine manu Joshua, ku Andrea di mujëë mii u de, ku sömëni woto sëmbë ta lei soni u Bëibel go dou, nöö de nango a fesi bumbuu fa seei.

A di ten u dee fesiten Keesitu sëmbë, di bunu buka bi paaja hesihesi seei a famii ku famii, söseei a mati ku mati dendu (Joh. 1:41, 42a; Tjab. 10:24, 27, 48; 16:25-33). I sa hakisi dee sëmbë dee i ta lei soni u Bëibel taa: „I sabi woto sëmbë di bi o kë lei soni u Bëibel tu ö?” Kandë i sa feni sömëni sëmbë di bi o kë lei soni u Bëibel tu.