I bi sabi di soni aki ö?
Andi dee mindima u di Wosu u Gadu, bi ta du ku di buuu u dee mbeti dee de bi ta kii tjuma da Jehovah?
HINIWAN jaa dee mindima u di awooten Isaëli, bi ta kii dusudusu mbeti ta tjuma da Gadu a di begitafa u di wosu fëën. Wan womi u di pisiten u dee fesiten Keesitu sëmbë, di bi ta öndösuku soni fu awooten, bi taki taa a di Pensiti daka de bi ta kii möön leki 250.000 sikapu mii. A sö wan fasi, te a hia buuu bi ta kule kumutu a di begitafa (Leif. 1:10, 11; Nöb. 28:16, 19). Naasë hii di buuu dë bi ta kule go?
Dee öndösukuma bi ko si taa di Wosu u Gadu di Helodi bi mbei, bi abi wan gaan ngötö a goonbasu, di bi ta tja sundju wata kumutu a di Wosu u Gadu. A dë gbelingbelin u si taa ufö sëmbë bi ko booko di Wosu u Gadu a di jaa 70, nöö a di ngötö dë de bi ta mbei di buuu kule go kai, faa bi sa kumutu a di Wosu u Gadu.
Boo buta pakisei a tu soni di bi ta mbei taa di begitafa bi sa ta dë limbolimbo:
Baaku bi dë a di begitafa basu: Wan awooten buku di de bi sikifi baka di jaa 200, di ta taki soni u dee wëti ku dee guwenti u dee Dju, ta taki unfa soni bi seti u sundju wata bi sa ta kumutu a di begitafa. A bi taki taa: „Tu baaku bi dë a wan huku u di begitafa. Di buuu u dee mbeti, ku di wata di de bi ta tei u sawa di begitafa, bi ta kule pasa a dee baaku dë go kai a di lagi kamian de kai Kidilon.”
Dee sëmbë dee ta öndösuku soni fu awooten, piki ku di soni di sikifi a di awooten buku dë. Wan buku di ta taki soni u dee Dju, ta taki taa öndösukuma bi feni ngötö zuntu ku di Wosu u Gadu, nöö a kan taa a dee ngötö dë di buuu u dee mbeti di de bi ta kii, ku di wata di de bi ta tei u sawa di buuu puu a di begitafa, bi nango kai.
Te a hia wata bi dë fanöudu: Dee mindima bi abi te a hia wata fanöudu, u de bi sa ta wasi di begitafa faa ta dë limbolimbo, söseei u de bi sa ta sawa di buuu faa kule go. Dee mindima bi ta feni limbolimbo wata a di foto, u de bi sa ta du di soni aki. De bi mbei soni ka di wata bi sa ta kule ta ko a di Wosu u Gadu, söseei de bi abi soni di ta hoi wata, kuma wata baaku ku tobo. Wan öndösukuma de kai Joseph Patrich bi taki taa na wan u dee wosu ka sëmbë bi ta dini dee gadu u de a di ten ala, bi abi sö wan bunu fasi u tja wata go a di wosu, söseei u toona sawa sundju wata tja go.