Soni di dee lesima hakisi
Na un ten woo tapa u du di peleikiwooko?
Jesosi bi taki taa: „Di bunu buka u di Könuköndë musu paaja te dou hii goonliba e, be hii sëmbë jei. Nöö baka di dë, nëën di kaba o ko” (Mat. 24:14). Di Giiki wöutu di de puu ko „kaba a di vers aki, söseei a vers 6 ku 13, da teʹlos. Di wöutu aki kë taki di kaba u di goonliba u Saatan, a di feti u Amagedon (Ako. 16:14, 16). Hën da woo tapa u du di peleikiwooko kölö sö ufö Amagedon bigi. Di soni aki tooka ku di fasi fa u bi ta si soni fosu.
Fosu u bi ta fusutan taa u bi o tapa ku di peleikiwooko te di gaan fuka bigi, baka te de booko di Gaan Babilon kaba a sösö (Ako. 17:3, 5, 15, 16). U bi ta biibi taa te di gaan fuka bigi, nöö di ten di ’Jehovah o lei sëmbë taa a a’ bunuhati u de’ o kaba (Jes. 61:2). Boiti di dë, u bi ta biibi taa dee sëmbë dee o pasa di gaan fuka libilibi o dë dee sëmbë dee bi ta hoi deseei a Jehovah ufö di gaan fuka bigi. U bi tei di soni dë maaka ku dee Dju dee bi fika a libi di de bi booko Jelusalen kaba a sösö, a di jaa 607 Bifö Keesitu. De bi buta wan maaka a dee Dju aki mindifesi u lei taa de bi o fika a libi, u di de bi ta dini Jehovah, söseei u di de bi ta buuse hogidu (Eze. 5:11; 9:4). Ma di soni aki an ta kai ku di soni di Jesosi bi taki a Mateosi 24:14. Di tëkisi aki ta lei taa sëmbë sa abi di okasi jeti u haika di bunu buka fu te Amagedon bigi.
U di u ko fusutan Mateosi 24:14 möön limbo, mbei a dë fanöudu fuu tooka di fasi fa u bi ta fusutan Akoalimbo 16:21, di ta taki u dee ëisi dee ta kumutu a liba ala dombodombo ta kai gbii gbii. Di u luku ën finifini, hën u ko si taa dee tu tëkisi aki nama ku deseei. Unfa sö? Wë di soni di ta heepi u fuu fusutan di soni aki, hën da di fasi fa di Bëibel ta taki taa sëmbë bi o ta haika di buka u di Könuköndë. Paulosu bi taki taa di bunu buka dë kuma wan sumëësuti soni di ta da libi, da dee sëmbë dee o feni tjubi. Ma da dee felantima u Gadu a dë wan hogi soni di sa tja dëdë ko da de (2 Kol. 2:15, 16). De ta buuse di buka u di Könuköndë, u di di buka aki ta lei de taa di goonliba u de hogi, söseei taa Saatan hën ta tii ën nöö a o poi kaba a sösö.—Joh. 7:7; 1 Joh. 2:17; 5:19.
Hoi a pakisei taa dee ëisi dee Akoalimbo 16:21 ta taki soni u de, o dë wan „gaan sitaafu da de. Ma dee ëisi aki an o dë tuutuu ëisi. Kandë di soni aki kë taki taa a di pisiten u di gaan fuka, nöö di buka di u ta paaja o ta möön hai sëmbë pakisei. Di soni aki o mbei taa möön hia sëmbë ko sabi di në u Jehovah (Eze. 39:7). Ma a dë sö taa a di ten dë, baka te de booko di Gaan Babilon kaba a sösö, nöö so sëmbë o ko lobi di bunu buka kumafa de bi o lobi sumëësuti soni ö? Wë a kan taa soni waka sö. Kandë de o toona mëni taa sömëni jaa longi dee Jehovah Kotoigi bi ta konda taa di Gaan Babilon bi o booko kaba a sösö.
Boo tei di soni aki maaka ku di soni di bi pasa a Egepiti, baka di Gadu bi tja dee Teni Sitaafu ko. Baka di Jehovah bi „kuutu hii dee gadu u Egepiti, hën „sömëni woto köndë sëmbë bi hai go nama ku dee sëmbë u Jehovah (Ëki. 12:12, 37, 38). A kan taa dee woto köndë sëmbë aki bi bia tei di së u Jehovah, di de bi si taa dee soni dee Mosesi bi taki u dee Teni Sitaafu bi pasa tuutuu.
Hiniwan sëmbë di bia tei di së u Jehovah baka te di Gaan Babilon booko kaba a sösö, o abi di okasi jeti u heepi dee salufuwan dee o dë a goonliba aki jeti (Mat. 25:34-36, 40). Di okasi di de o abi u de kuutu de kuma sikapu o kaba kölö sö ufö Amagedon bigi, te dee lasiti salufuwan feni di paka u de a liba ala.
Di fasi fa u ko fusutan di soni aki ta lei limbolimbo taa Jehovah lobi sëmbë te na soni, söseei taa a abi tjalihati pasa maaka. Awa, „an kë u na wan kodo sëmbë lasi libi. Ma a kë taa hii sëmbë musu feni di okasi u de sa bia de libi ko nëën.—2 Pet. 3:9.