I bi sabi di soni aki ö?

Unfa dee sëmbë fu awooten bi ta du mbei faja te de bi go a wan longi kamian?

DI BËIBEL ta piki u a kapitë 22 u di buku Kenesesi taa Gadu bi piki Abahamu faa go a wan longi kamian u go tjuma wan soni dëën. Di Bëibel ta taki taa: „Abahamu tei udu faa go tjuma di soni da Gadu, hën a butëën a di womi mii fëën de kai Isaki, gangaa baaku. Hën a tei di faja, hën a tei wan gaan faka di de ta kii mbeti, hën de tuu waka go.”​—Kenesesi 22:6.

Di Bëibel an ta konda da u unfa sëmbë bi ta mbei faja na awooten. Ma nöö Abahamu ku Isaki bi mbei wan faja, hën de tja di faja go u? Wan sëmbë di sabi soni u Bëibel bi taki taa sëmbë an bi sa „tja wan faja töngö a sö wan longi waka, nöö di faja an tapa”. Ma kandë Abahamu ku di womi mii fëën bi tei hii soni di de bi o abi fanöudu u mbei faja.

Ma woto sëmbë ta taki taa a bi taanga u mbei faja a di ten dë. Fëën mbei te de bi kë mbei wan faja, nöö de bi ta tei koofaja u wan faja di de bi mbei kaa. Sömëni sabima ta biibi taa Abahamu bi tei koofaja u wan faja di de bi mbei kaa, ufö de go. Kandë a bi buta dee koofaja a wan pei soni kuma gansë di bi abi wan këti, nöö a bi sa tja di gansë di de bi nango (Jesaaja 30:14). Nöö te a bi kë mbei wan faja, nöö a bi sa tei dee koofaja ku pikipiki pisi udu.