U musu ta suku gudu di o dë u nöömö

1, 2. Faandi mbei hii juu pootima o dë a di ten di u ta libi aki?

A DI ten aki, möni soni u di goonliba aki an ta waka bunu seepiseepi. A ta taanga da sömëni njönkuwan u de feni wooko. So sëmbë ta fusi go libi a dee gudu köndë. Ma a dee gudu köndë seei sömëni pootima ta libi. A hii së u goonliba sëmbë di gudu ta ko möön gudu, nöö sëmbë di pooti ta ko möön pooti. Te u luku dee soni dee sëmbë taki, nöö hii di möni u dee guduma u di goonliba aki o hia möön di möni di hii dee woto sëmbë abi. So sëmbë abi gaan hia möni tee taa dee bakamii u de seei sa feni di möni dë njan, hii fa milionmilion sëmbë pooti gaanfa seei. Jesosi bi sabi taa sö di soni aki bi o ta pasa. Fëën mbei a bi taki taa: „Hii juu dee pootima o dë a unu mindi” (Maikusi 14:7, NW). Faandi mbei di soni aki musu dë sö?

² Jesosi bi sabi taa di Könuköndë u Gadu wanwan tö sa puu di bai di sëmbë ta bai soni ta sei a di goonliba aki. Di Bëibel taki taa „dee wënkëma”, nasö dee seisonima u di goonliba aki, dee politikima, ku dee keiki, da wan pisi u di goonliba u Saatan (Akoalimbo 18:3). Dee sëmbë u Gadu an ta nama ku dee politiki soni u di goonliba aki, söseei de kumutu a dee poipoi keiki. Ma tökuseei gaansë u dee sëmbë u Gadu an sa dë nöö de an ta bai soni ta sei a di goonliba u Saatan seepiseepi.

3. Un hakisi woo luku a di woto aki?

³ U kuma Keesitu sëmbë musu ta öndösuku di fasi fa u ta si di bai di sëmbë ta bai soni ta sei a di goonliba aki. Te u ta du di soni aki, nöö u musu hakisi useei taa: ’Na un fasi mi sa wooko ku dee gudu dee mi abi u lei taa mi ta hoi miseei a Gadu? Andi mi sa du u ma ta buta hii mi pakisei a di bai di mi ta bai soni ta sei? Andi ta lei taa dee sëmbë u Gadu ta buta hii de futoou a Gadu a di ten aki?’

DI WOTO U DI FUTUBOI DI AN BI DU SONI A WAN LETI FASI

4, 5. (a) Andi bi pasa ku di futuboi a di woto di Jesosi bi konda? (b) Andi Jesosi bi piki dee bakama fëën u de du?

⁴ Lesi Lukasi 16:1-9. Di woto di Jesosi bi konda u di futuboi di an bi du soni a wan leti fasi musu mbei hiniwan fuu go pakisei di libi fuu. Sëmbë bi taki taa di futuboi bi ta poi di möni fëën masa. Nöö fëën mbei di masa bi taki taa a o puu ën a wooko.a (Luku di pisi a basu.) Ma di futuboi bi du soni a wan „köni” fasi. Ufö a go disa di wooko, hën a mbei mati ku sëmbë di bi o sa heepi ën bakaten. Jesosi an bi konda di woto aki u di a bi kë u dee bakama fëën du soni di an fiti u de sa dë a libi. Di soni aki dee sëmbë u di goonliba aki ta du. Ma Jesosi bi konda di woto aki faa lei u wan fanöudu soni.

⁵ Jesosi bi sabi taa leti kumafa soni bi ko taanga da di futuboi, sö nöö soni bi o ko taanga da gaansë u dee bakama fëën u de sölugu deseei a di goonliba aki ka sëmbë an ta du soni a wan leti fasi. Fëën mbei a bi piki de taa: „Wooko ku dee gudu u di goonliba aki ka letilibi an dë, sö taa i sa ko dë mati ku wotowan.” Di pisi aki ta da u degihati fuu wooko ku dee gudu dee u abi fuu sa ko dë mati ku Jehovah ku Jesosi. Faandi mbei u taki sö? Wë u di te wa o abi dee gudu aki möön, nöö Jehovah ku Jesosi ’o tei u buta a dee kamian ka sëmbë sa libi u teego’. Andi u sa lei a di lai di Jesosi bi da u?

6. Unfa u du sabi taa di bai di sëmbë ta bai soni ta sei an bi dë wan soni di Gadu bi abi a pakisei?

⁶ Di Bëibel ta taki gbelingbelin taa Gadu an bi kë u sëmbë ko abi hia möni u di de bi o ta sei soni. Jehovah bi da Adam ku Eva soni möön fa de bi abi fanöudu a di djai u Eden (Kenesesi 2:15, 16). Bakaten di Jehovah bi mbei di santa jeje fëën ko a dee salufuwan liba, nöö ’na wan sëmbë bi ta hoi ën gudu buta nëën wosu fëën wanwan, ma de tuu bi ta abi soni makandi’ (Tjabukama 4:32). Di tjabukama de kai Jesaaja bi taki taa wan ten bi o ko ka hii libisëmbë o ta feni wini u dee soni dee Gadu mbei buta a goonliba (Jesaaja 25:6-9; 65:21, 22). Ma ufö di ten dë dou, nöö dee bakama u Jesosi musu ta du soni a wan „köni” fasi. De musu suku wan fasi u de sa wooko ku dee gudu u di goonliba aki u sölugu deseei, nöö a di wan seei ten de musu ta mbei möiti u ta du soni di ta kai ku Gadu.

TE U TA WOOKO KU DEE GUDU U DI GOONLIBA AKI A WAN KÖNI FASI

7. Un lai Jesosi ta da u a Lukasi 16:10-13?

⁷ Lesi Lukasi 16:10-13. Di futuboi a di woto u Jesosi bi ko dë mati ku sëmbë faa bi sa feni wini da hënseei. Ma Jesosi bi kë u dee bakama fëën ko dë mati u sëmbë a Gadu Köndë ala, söndö u de suku wini da deseei. A bi kë fuu fusutan taa di fasi fa u ta wooko ku dee gudu u di goonliba aki sa lei ee u ta hoi useei a Gadu. Unfa u sa du di soni aki?

8, 9. Konda unfa so baaa ku sisa bi lei taa de ta hoi deseei a Jehovah a di fasi fa de ta wooko ku dee gudu u de.

⁸ Wan fasi fa u sa lei taa u ta hoi useei a Gadu ku dee gudu dee u abi, hën da te u ta da möni, sö taa di peleikiwooko sa du a hii së u goonliba kumafa Jesosi bi taki (Mateosi 24:14). Wan mujëë mii di ta libi a India bi abi wan soni ka a ta tjubi möni, nöö hii juu a bi ta lai kpëngëlë möni go nëën. An bi ta bai pëë lai möön seei. Di di soni ka a bi ta tjubi di möni bi ko fuu, hën a da hii di möni dë u di peleikiwooko sa du. Wan baaa di ta libi a India abi wan kökönötö goon. A bi tja te a hia kökönötö go da dee baaa ku dee sisa dee ta wooko a di kantoo ka de ta puu buku ko a Malajalamutöngö. U di de bi musu ta bai kökönötö hii juu, mbei di baaa aki bi si taa a möön bunu faa da de kökönötö ka faa da de möni. A bi du soni a wan „köni” fasi. Sö nöö dee baaa ku dee sisa a Giikiköndë lo’ u da dee sëmbë dee ta wooko a di Bëtëli u di köndë dë oleifi fatu ku kasi ku woto soni u njan.

⁹ Wan woto baaa di ta libi a Sili Lanka ta mbei dee baaa ku dee sisa hoi komakandi ku dee keling-komakandi a di kamian fëën, söseei dee sëmbë dee ta du di hii-ten diniwooko sa go libi dë tu. Ma di baaa aki bi sa du woto soni ku di kamian aki u feni möni, ma a bi ta heepi dee peleikima u di köndë di an abi hia möni. A dee köndë ka de tapa di peleikiwooko, nöö dee baaa ku dee sisa ta mbei de hoi komakandi a di wosu u de. Di soni aki ta mbei dee pionili ku dee woto baaa ku dee sisa dee an abi hia möni, sa abi wan kamian ka de sa hoi komakandi, nöö an dë u de ta juu kamian.

10. Un wini u ta feni te u lo’ u da sëmbë soni?

¹⁰ Dee lö woto aki ta lei u taa dee sëmbë u Gadu ta hoi deseei nëën aluwasi a nama ku wan „piki soni” (Lukasi 16:10). De ta wooko ku dee gudu u de u heepi wotowan. Unfa dee mati u Jehovah aki ta fii te de ta heepi wotowan? Wë de ta dë waiwai seei, u di de sabi taa te de lo’ u da wotowan soni, nöö de ta feni „gaan” gudu a Gadu Köndë (Lukasi 16:11). Wan sisa di lo’ u da möni u heepi di Könuköndë wooko faa go a fesi taki taa wantu jaa kaa soni bi ko tooka a di libi fëën. Di sisa taki taa: „Mi ko si taa möön mi ta da sëmbë soni, möönmöön mi sa ta libi bunu ku wotowan. Mi ko ta möön da sëmbë paadon, mi ko möön abi pasensi ku wotowan, söseei ma ta booko mi hedi sö möön te soni an waka bunu da mi, nöö mi ko ta möön tei lai tu.” Sömëni sëmbë ko si taa te de lo’ u da sëmbë soni, nöö soni ta waka möön bunu da de.​—Psalöm 112:5; Nöngö 22:9.

11. (a) Unfa di da u di u ta da wotowan soni ta lei taa u ta du soni a wan „köni” fasi? (b) Andi dee sëmbë u Gadu ta du a di ten aki? (Luku di peentje a bigi u di woto.)

¹¹ U ta lei tu taa u ta du soni a wan „köni” fasi te u ta wooko ku dee gudu fuu u heepi wotowan u de du di peleikiwooko. Nöö aluwasi wa sa du di hii-ten diniwooko nasö foloisi go libi a wan kamian ka möön peleikima dë fanöudu, tökuseei woo sa ta heepi wotowan (Nöngö 19:17). Dee möni dee u ta da ta heepi u fuu mbei buku, söseei fuu du di peleikiwooko a dee pooti köndë ka sömëni sëmbë ta ko a di tuutuu lei. A dee köndë kuma Kongo, Madagasikali ku Luwanda, di Bëibel ta dii seei. So juu de musu wooko wan hii wiki nasö wan hii liba u de sa bai wan Bëibel. Sömëni jaa longi dee baaa ku dee sisa bi musu luku ee de o bai soni u njan da di famii u de, nasö ee de o bai wan Bëibel. Wë u di nöunöu u ta da möni, söseei u di di ölganisaasi u Jehovah seti soni u „heepi dee otowan fu de sa abi tu”, mbei u sa ta puu Bëibel ko a woto töngö. Boiti di dë hii sëmbë u wan wosudendu, te kisi dee sëmbë dee u ta lei soni u Bëibel sa feni wan Bëibel söndö u paka. (Lesi 2 Kolenti 8:13-15.) Hën da dee sëmbë dee ta da soni ku dee ta feni soni tuu ta ko dë mati u Jehovah.

UNFA U SA TA KÖNI BE WA TA BIINGA NÖÖMÖ U TA MBEI MÖNI A DI GOONLIBA AKI?

12. Unfa Abahamu bi lei taa a bi ta buta futoou a Gadu?

¹² U sa ko dë Jehovah mati tu te wa ta biinga nöömö u ta mbei möni a di goonliba aki, söseei te wa ta suku „gaan” gudu. Di soni aki Abahamu bi du. A bi piki Jehovah buka, nöö a bi go kumutu a di gudu foto de kai Uli u go libi a tenti, u di a bi kë dë mati u Jehovah (Hebelejën 11:8-10). Hii juu a bi ta buta futoou a Gadu, ma an bi ta buta futoou a gudu (Kenesesi 14:22, 23). Jesosi bi da wotowan taanga u de ko ta biibi Gadu a di wan seei fasi. A bi piki wan gudu kijoo taa: „Ee i kë ko dë wan bumbuu sëmbë te dou, nöö i go sei hii dee gudu fii dee i abi tuu te i kaba, nöö i tei di möni paati da dee möfina sëmbë u di köndë. Nöö te i du sö kaa, nöö joo abi gudu a Masa Gaangadu köndë te a hia e. Nöö te i kaba, nöö i ko bakama u mi ta waka a mi baka” (Mateosi 19:21). Di njönku kijoo aki an bi abi biibi kuma Abahamu. Ma woto sëmbë bi dë di bi ta buta futoou a Gadu.

13. (a) Un lai Paulosu bi da Timoteo? (b) Unfa u sa du di soni di Paulosu bi taki?

¹³ Timoteo bi dë wan womi di bi abi wan taanga biibi. Baka di Paulosu bi kai Timoteo „wan bumbuu sodati” u Jesosi Keesitu, hën a bi piki ën taa: „I sabi fa wan bumbuu sodati ta dë nö, womi? An ta waka ta hulu soni a së së möönsö möön na di wooko di a sai dë. Biga a kë u di oposii musu ta wai ku ën u di fa a ta wooko” (2 Timoteo 2:3, 4). Dee bakama u Jesosi a di ten aki, te kisi dee wan milion sëmbë di ta du di hii-ten diniwooko seei ta mbei hii möiti u du andi Paulosu taki. De an ta mbei dee popokanda soni u di goonliba aki mbei de ko abi langahati. De ta hoi di mama wëti u Bëibel a pakisei, di ta taki taa: „Di sëmbë di lo’ u leni möni ta ko dë wan futuboi u di sëmbë di leni ën di möni” (Nöngö 22:7). Saatan kë fuu tei hii di ten fuu ku di kaakiti fuu, fuu ta wooko da di goonliba aki. So sëmbë ta leni gaan möni u de sa go a möön hei siköö, u de sa bai wan wosu, wan wagi, nasö u de hoi wan tööu. Ee wa ta köni, nöö u sa ko dë a wan gaan paima sömëni jaa longi. U ta lei taa u ta du soni a wan köni fasi te u ta libi ku dee soni dee u abi fanöudu, ku te wa ta mbei paima, söseei te wa ta poi möni. A sö wan fasi woo sa dini Gadu möön bunu, nöö wa o dë saafu u di bai di sëmbë ta bai soni ta sei a di goonliba aki.​—1 Timoteo 6:10.

14. Konda woto di ta lei andi u musu dë kabakaba u du.

¹⁴ Ee u kë libi ku dee soni dee u abi fanöudu, nöö u musu buta di Könuköndë u Gadu a di fosu kamian a u libi. Wan womi ku hën mujëë bi abi wan gaan masikapei ka soni bi nango bunu seei. Ma de bi kë bigi ku di hii-ten diniwooko baka. Fëën mbei di womi ku ën mujëë bi sei di masikapei u de, di boto u de, söseei de bi sei dee woto gudu di de bi abi. Baka di dë, hën de go heepi a di hedi kantoo di dë a Warwick na Amëëkanköndë. Di soni aki bi dë wan gaan soni da de seei, biga de bi go heepi a Bëtëli makandi ku di mujëë mii u de ku ën manu. De bi nango heepi wantu wiki, nöö di mai ku di pai u di mujëë mii u de bi dë ta heepi a Warwick tu. Wan sisa di ta du di pioniliwooko a di foto Colorado, di dë na Amëëkanköndë, bi feni wan wooko a wan banku ka a bi sa ta wooko wantu daka a di wiki. Dee sëmbë dee bi tei ën a wooko bi ta wai ku ën seei u di a bi ta wooko bunu. Fëën mbei de bi kë faa wooko dee woto daka tu, nöö de bi o paka ën dii toon möön fa de bi ta pakëën. Ma u di di wooko bi o mbei an sa ta buta pakisei a di diniwooko fëën sö möön, mbei an bi kë tei di wooko. Dee lö woto aki ta lei unfa dee dinima u Jehovah ta disa soni u de dini ën. Te u dë kabakaba u buta di Könuköndë a di fosu kamian a u libi, nöö a ta lei taa u ta tei ën u bigi taa u ku Gadu dë mati, söseei taa u ta si dee tuutuu gudu kuma gaan soni möön dee gudu u di goonliba aki.

TE DEE GUDU U DI GOONLIBA AKI AN DË MÖÖN

15. Un pei gudu ta da u di möön gaan piizii?

¹⁵ Na u di wan sëmbë abi gudu, nöö a kë taki taa Gadu ta feni ën bunu. Jehovah ta mbei dee sëmbë dee „ta du bunu te a hia” feni gaan bunu. (Lesi 1 Timoteo 6:17-19.) Wan sisa de kai Lucia bi ko jei taa de bi abi möön peleikima fanöudu na Albania.b (Luku di pisi a basu.) Fëën mbei a di jaa 1993, hën a foloisi kumutu a Italiaköndë u go libi na Albania. An bi abi wan wooko, ma a bi abi di futoou taa Jehovah bi o dëën dee soni dee a abi fanöudu. A bi lei di Albaniatöngö, nöö a bi heepi möön leki 60 sëmbë u de buta de libi a Gadu maun. Kandë soni an o ta waka sö bunu da u a di pisiwata ka u ta peleiki. Ma hiniwan soni di u ta du u lei wotowan soni u Jehovah, söseei u mbei de ko dë mati fëën, da wan gaan gudu di o dë u nöömö.​—Mateosi 6:20.

16. (a) Andi o pasa ku di bai di sëmbë ta bai soni ta sei? (b) Unfa di soni aki musu mbei u ko ta si gudu?

¹⁶ Jesosi bi taki taa di bai di sëmbë ta bai soni ta sei o kaba wan daka. Fëën mbei a bi taki taa ’te dee gudu aki an o dë möön’, ma an bi taki taa ’ee de an o dë möön’ (Lukasi 16:9). A dee lasiti daka aki, wantu u dee banku an abi möni möön, nöö möni soni u so köndë an bi ta waka bunu. Ma soni o ko möön hogi. Dee politiki soni u di goonliba aki, dee keiki, ku di bai di sëmbë ta bai soni ta sei, da wan pisi u di goonliba u Saatan, nöö de an o dë möön. Di tjabukama Ezekiëli ku di tjabukama Sefanja bi taki taa goutu ku soofu, di dee sëmbë dee ta bai soni ta sei ta si kuma gaan fanöudu soni, o ko dë sösö soni (Ezekiëli 7:19; Sefanja 1:18). Unfa u bi o fii ee u dë a libi jeti te di kaba u di goonliba aki dou, hën u ko si taa u bi suku dee gudu u di goonliba aki, ka fuu bi suku dee gudu dee o dë u nöömö? Kandë woo fii kuma wan womi di bi wooko taanga hii hën libi longi faa mbei möni, hën te u kaba fëën a ko si taa di möni dë na tuutuu möni (Nöngö 18:11). Dee gudu u di goonliba u Saatan an o dë möön. Fëën mbei na lasi di okasi di i abi u wooko ku dee gudu dee i abi fii ko dë mati ku sëmbë a Gadu Köndë ala. Dee soni dee u ta du da Jehovah ku di Könuköndë fëën, o mbei taa u dë waiwai tuutuu.

17, 18. Andi dee mati u Gadu ta wakiti?

¹⁷ Te di Könuköndë u Gadu o tii hii di goonliba, nöö na wan sëmbë o ta paka juu wosu, nasö ta leni möni. Soni u njan o dë te a hia, nöö an o dë fii paka u de. Wa o abi data fanöudu möön, nöö wa o ta bai deesi möön tu. Dee mati u Jehovah o piizii ku dee bunu soni dee o dë a goonliba aki. Sëmbë o tei goutu, soofu ku woto waitiwaiti sitonu u mbei hansehanse soni ku de, ma na u mbei sëmbë ko gudu. Sëmbë o sa feni dee waitiwaiti udu, ku sitonu, ku felu, u mbei hanse wosu. Dee mati fuu o heepi u, u di de kë heepi u, ma na u di woo paka de. Woo ta paati hii dee soni dee dë a goonliba aki makandi.

¹⁸ Dee soni aki da wantu soni nöö, u di paka di dee sëmbë dee mbei mati ku sëmbë a liba ala o feni. Dee dinima u Jehovah dee dë a goonliba aki o piizii seei, te de o jei Jesosi taki taa: „Un dee sëmbë Gadu limbo fesi da aki, un pasa ko tei di kamian fuunu a mi Tata köndë aki e, di i si a bi seeka buta dë gaanduwe da unu kaa bifö a seti mbei goonliba.”​—Mateosi 25:34.