Hogi miti di wosudendu u Dafiti

BAKA DI Dafiti bigi tii a Jelusalen, Jehovah mbei dee sodati fëën wini sömëni u dee felantima u de. Jehovah bi paamusi dee Isaëli sëmbë taa a bi o da de di köndë Kaana. Nöö te u kaba fëën, Jehovah heepi de sö taa hii di köndë di a bi paamusi de, ko u de.

Dafiti da wan bunu tiima. A lobi Jehovah. Nöö i saandi da wan u dee fosu soni di a du baka di a tei Jelusalen u? Wë a tja di Këdë u Jehovah go ala. Nöö a kë mbei wan wosu u butëën.

Di Dafiti ko gaan womi, hën a mbei wan gaan föutu. Dafiti sabi taa an bunu u tei woto sëmbë soni. Ma wan ndeti di a bi dë nëën könu wosu liba, hën a tuwë wojo luku go a basu, hën a si wan gaan waiti mujëë. Në fëën da Batiseiba, nöö di manu fëën da wan u dee sodati u Dafiti de kai Ulia.

Dafiti kë Batiseiba sö tee taa a mbei de tjëën ko a di könu wosu fëën. Hën manu bi go a feti. Hën wë Dafiti duumi ku ën, nöö bakaten Batiseiba ko si taa a dë ku bëë. Di soni toobi Dafiti gaanfa seei taa a manda buka da di hedima Joab u buta Ulia go a fesi u di feti kamian ka de sa kii ën. Di Ulia ko dëdë, hën Dafiti toou ku Batiseiba.

Jehovah hati boonu ku Dafiti gaanfa seei. Hën a manda di futuboi fëën Naatan u go fan ku ën u dee hogi dee a du. I sa si fa Naatan ta fan ku Dafiti a di peentje. Dafiti tjali seei u dee soni a du, nöö fëën mbei Jehovah an kii ën. Ma Jehovah piki ën taa: ’U di i du dee hogi aki, mbei hogi o miti di wosudendu fii.’ Nöö na piki hogi miti Dafiti e!

Di fosu hogi di miti ën, hën da di womi mii u Batiseiba dëdë. Baka di dë di fosu womi mii u Dafiti, Aminön, kisi ën sisa Tamali duumi ku taanga. Di womi mii u Dafiti, Abisalöm, hati boonu seei taa a kii Aminön. Bakaten Abisalöm kisi sömëni u dee sëmbë taa de ko lobi ën, hën a mbei ënseei toon könu. Te u kaba fëën Dafiti wini di feti di a feti ku Abisalöm, nöö de kii Abisalöm. Aai, gaan hogi miti Dafiti seei.

A di ten dë Batiseiba pai wan womi mii de kai Salumon. Di Dafiti ko gaandi ta siki, hën di womi mii fëën, Adonia, pooba u mbei ënseei toon könu. Hën Dafiti mbei wan gaan mindima de kai Sadöku tutu fatu a Salumon hedi u lanti si taa hën o dë könu. An tei longi ufö Dafiti ko dëdë di a bi a’ 70 jaa. A tii 40 jaa, nöö baka di dë Salumon toon könu u Isaëli.