Jesosi ta seeka di Wosu u Gadu

JESOSI hati boonu seei, na sö nö? I sabi faandi mbei hati fëën boonu sö u? U di dee womi i ta si a di Wosu u Gadu a Jelusalen dë a’ langahati seei. De ta biinga u puu hia möni a dee sëmbë dee ta ko naandë u dini Gadu.

I ta si dee piki kau ku dee sikapu ku dee pomba u? Wë dee womi ta sei dee mbeti dë leti a di Wosu u Gadu. I sa’ faandi mbei ö? U di dee Isaëli sëmbë a’ mbeti fanöudu u tjuma da Gadu.

Di wëti u Gadu taki taa te wan Isaëli sëmbë du hogi, nöö a musu kii wan mbeti tjuma da Gadu. Nöö i a’ woto juu ka dee Isaëli sëmbë bi musu kii mbeti tjuma da Gadu. Ma naasë wan Isaëli sëmbë bi sa feni fou ku mbeti u tjuma da Gadu?

So u dee Isaëli sëmbë bi abi u deseei fou ku mbeti. Nöö de bi sa da Gadu dee di dë. Ma gaansë u dee Isaëli sëmbë an bi abi u deseei mbeti ku fou. Nöö wotowan bi ta libi longi ku Jelusalen nöö de an bi sa tja wan mbeti u de ko a di Wosu u Gadu. Fëën mbei dee sëmbë bi ta ko aki, nöö de bi ta bai dee mbeti nasö dee fou di de bi a’ fanöudu. Ma dee womi aki bi ta hakisi dee sëmbë hia möni poi. De bi ta fufuu dee sëmbë. Boiti di dë, de an bi musu sei soni a di Wosu u Gadu seei.

U di soni dë mbei Jesosi hati boonu sö. Hën mbei a tombi dee tafa u dee tookamönima tuwë djolou a goon, hën a paaja dee piki möni u de fanjaaan a goon dë. Boiti di dë a tei wanlö tatai mbei wipi, hën a buta ku dee mbeti puu a di wosu u Gadu. Hën a bai dee womi dee ta sei pomba taa: ’Un tja dee soni fuunu kumutu aki! Wan tei di wosu u mi Tata ko dë wan kamian u wooko hia möni e!’

So u dee bakama u Jesosi bi dë ku ën a di Wosu u Gadu a Jelusalen. De foondo u di soni de si Jesosi ta du. Hën de mëni di tëkisi a Bëibel di ta taki u di Womi Mii u Gadu taa: ’Di lobi a lobi di wosu u Gadu, o dë kuma wan faja di ta kendi hën dendu.’

Hii fa Jesosi dë a di Pasika piizii, tökuseei a ta du sömëni foombo soni. Baka di dë Jesosi kumutu a Judea, hën a tei pasi nango baka a Galilea. Ma a di waka fëën dë a pasa a di pisiwata u Samalia. Boo go luku andi pasa ala.