De kumutu a dunguwosu

LUKU di engel di ta hoi di döö u di dunguwosu jabijabi. Dee womi dee a ta lusu dë da apösutu u Jesosi. Boo go luku unfa a du ko taa de buta de a dunguwosu.

Wan sati pisiten a fesi di santa jeje bi ko a dee bakama u Jesosi liba. Nöö luku andi pasa: Wan sapate hën Petuisi ku Johanisi nango a di Wosu u Gadu a Jelusalen. Wan womi di lan sensi a kumutu nëën mama bëë dendu bi dë leti a di dööbuka. Hiniwan daka sëmbë bi ta tjëën go buta dë u pidi möni a dee sëmbë dee nango a di Wosu u Gadu. Di a si Petuisi ku Johanisi, hën a pidi de möni. Andi dee apösutu o du?

De taanpu hën de luku di womi diin. Petuisi taa: ’Ma a’ möni u mi da i, ma mi o da i andi mi abi. A di në u Jesosi, hopo waka!’ Hën Petuisi panjan di womi nëën letimaun, hën wantewante a djombo hopo bigi ta waka. Di dee sëmbë si di soni aki de foondo seei, nöö de wai seei taa sö wan gaan soni pasa.

Petuisi taa: ’Ku di kaakiti u Gadu di weki Jesosi puu a dëdë, u du di foombo soni aki.’ Di Petuisi ku Johanisi ta fan jeti, hën wan tu hedima u keiki waka ko a de. Hati u de boonu u di Petuisi ku Johanisi ta taki da dee sëmbë taa Gadu weki Jesosi puu a dëdë. Fëën mbei de kisi de go buta a dunguwosu.

Debooko fëën, hën dee hedima u keiki kai wan gaan kuutu. Hën de tja Petuisi ku Johanisi ku di womi de kula, ko a dendu. Hën dee hedima u keiki hakisi de taa: ’Ku undi kaakiti un du di foombo soni aki?’

Petuisi piki de taa ku di kaakiti u Gadu di weki Jesosi puu a dëdë. Dee begima an sa’ unfa de musu du, biga de an sa fia taa di foombo soni dë an pasa tuutuu. Fëën mbei de bai dee apösutu taa de an musu taki soni u Jesosi da dee sëmbë möön.

Ma hii fa dee daka ta pasa, dee apösutu ta paaja di buka u Jesosi da dee sëmbë kodo, nöö de ta kula dee suwakima tu. Dee foombo soni de ta du ta paaja a hii kamian. Nöö gaan hia sëmbë u dee foto lomboto Jelusalen tja dee suwakima u de ko da dee apösutu u de kula. Di soni aki mbei taa dee hedima u keiki djalusu seei. Fëën mbei de kisi dee apösutu buta a dunguwosu. Ma de an tan dë longi.

A di ndeti wan engel u Gadu jabi di döö u di dunguwosu kumafa i ta si aki. Di engel taa: ’Un go taanpu a di Wosu u Gadu nöö un ta fan nöömö ku dee sëmbë.’ Debooko fëën dee hedima u keiki manda womi go a di dunguwosu u go tei dee apösutu tja ko, ma de bi go kaa. Bakaten dee womi go feni de a di Wosu u Gadu, hën de tja de go a di Sahidin.

Dee hedima u keiki piki de taa: ’U bi bai unu kaa taa wan musu lei sëmbë soni u Jesosi möön. Ma nöunöu hii sëmbë u Jelusalen jei di lei fuunu kaa.’ Hën dee apösutu piki taa: ’Gadu da u tiima, nöö u musu piki ën buka gaanfa möön libisëmbë buka.’ Fëën mbei de paaja di „bunu buka” go dou. Na soni fuu waka a de baka u?