De dë a pasi nango a Damasikusi

I SABI ambë dë kandikandi a goon aki ö? Saulosu wë e. Na fëëkëtë taa hën da di sëmbë di bi ta luku dee djakiti u dee womi dee bi naki Sitefani ku sitonu kii. Luku di faja di ta sëndë njaan dë! Andi ta pasa aki?

Baka di de kii Sitefani, Saulosu tei fesi ta buta ku dee bakama u Jesosi ta sitaafu de. A nango ta denda a dee wosuwosu u de, ta pii de ta tja go söötö a dunguwosu. Sömëni u dee bakama u Jesosi fusi go a woto köndë, nöö de bigi ta paaja di bunu buka ala. Ma Saulosu nango a woto köndë go suku dee bakama u Jesosi. Nöunöu a dë a pasi nango a Damasikusi. Ma di a dë a pasi liba, hën di foombo soni aki pasa:

Te u de kë mëni, hën wan faja kumutu a liba valau tuwë limbo lontu Saulosu ko kai. Hën a pasa kai a goon kumafa u ta si aki. Hën wan töngö piki taa: ’Saulosu, Saulosu! Andi mbei i ta sitaafu mi sö?’ Dee womi dee dë ku Saulosu si di faja, nöö de jei di töngö tu, ma de an sa fusutan andi a ta taki.

Hën Saulosu hakisi taa: ’Masa o, ambë ta fan ku mi di fan aki?’

Hën di töngö piki: ’Mi, Jesosi wë, di sëmbë di i ta sitaafu.’ Jesosi taki sö biga te Saulosu ta sitaafu dee bakama fëën, nöö Jesosi ta fii kuma hënseei Saulosu ta sitaafu.

Hën Saulosu hakisi taa: ’Masa o, andi mi musu du?’

Hën Jesosi piki: ’Hopo go a Damasikusi. Ala de o piki i andi i musu du.’ Di Saulosu hopo, hën a jabi wojo te a wei, an sa si soni möön. Wojo fëën dungu piii! Fëën mbei dee womi dee dë ku ën panjëën a maun tja go dou a Damasikusi.

Hën Jesosi piki wan u dee bakama fëën u Damasikusi taa: ’Womi Ananiasi, hopo seeka. Go a di sitaati de kai Tololoo Sitaati. Nöö i go a di wosu u Judasi, go hakisi u di womi de kai Saulosu. Hën wë mi tei u ko dë apaiti futuboi u mi.’

Hën Ananiasi go. Di a miti Saulosu, hën a buta maun nëën hedi. A piki ën taa: ’Womi, Masa manda mi ko a i fii sa si bunu baka. A manda mi tu be di santa jeje ko a i liba.’ Hën di a fan sö te a kaba, nöö hën wante wan soni kumutu a Saulosu wojo kuma fisi kakisa sö. Hën Saulosu wojo ko limbo gbegedee.

Jesosi tei Saulosu wooko dëën a wan bunu fasi u pleiki da hia nasiön sëmbë. Sëmbë ko sabi ën kuma apösutu Paulosu, nöö woo lei sömëni soni fëën jeti. Ma boo go luku fosu andi Gadu manda Petuisi faa go du.