Wan womi mii djönkö

MAINGË! Andi pasa aki? Soni pasa ku di womi mii di kandi a goon dë u? Luku! Wan u dee womi di ta waka ko a döö dë da Paulosu! I ta si Timoteo naandë tu ö? A sa dë sö taa kai di womi mii kai kumutu a di fënsë buka u?

Aai, kai wë a kai djunsu dë. Paulosu bi ta konda Gadu woto da dee bakama u Jesosi a Toasi. A bi sabi taa an bi o si de djunsu möön, biga debooko fëën a bi o go ku boto. Fëën mbei a fan ku de tefa gaan ndeti.

Wë di womi mii aki de kai Etikusi. A bi sindo a di fënsë buka, hën a ta djönkö. Te wan pisi a puu viin kumutu a di fënsë buka kai ko a goon. Ka a bi sindo dë bi dë dii södö hei ku goon! Fëën mbei dee sëmbë panta sö. Di dee womi hopo di womi mii tei, nöö a bi dëdë, leti kumafa de bi mëni.

Di Paulosu si taa di kijoo dëdë, hën a kandi nëën liba baasëën duuu. Hën a taa: ’Wan fëëë. A dë ku libi!’ Nöö tuu wë. Wan foombo soni wë pasa dë. Paulosu bi weki di kijoo ko a libi baka! Na piki wai dee sëmbë wai.

Hii de tuu toona go baka a liba, hën de sindo njan makandi. Paulosu fan go dou tefa kamian limbo gbegedee. Ma i sa dë seiki taa Etikusi an djönkö möön! Hën Paulosu ku Timoteo ku dee wotowan dee bi ta waka ku de, subi a boto. I sa’ naasë de nango u?

Paulosu kaba di u dii pleiki waka fëën, nöö a dë a pasi nango a wosu. A di waka aki Paulosu fika a Efeise dii jaa longi. Hën da di waka fëën aki bi longi möön di u tu waka fëën.

Baka di de kumutu a Toasi, de go dou a Milete. Hën de sai dë wan pisiten. Ma fu di Efeise an longi sö ku Milete, mbei Paulosu manda kai dee gaan womi u di gemeente a Efeise u ko nëën fu a fan ku de wan lasiti pasi. Di di juu dou u di boto go, nöö dee womi bi tjali seei taa Paulosu nango!

Te u kaba fëën di boto go dou baka a Sesalia. Hën Paulosu go tan a di wosu u Filipi, wan bakama u Keesitu. Naandë wan tjabukama de kai Agabusi ko a Paulosu. A piki Paulosu taa de o butëën a dunguwosu te a ko a Jelusalen. Sö a pasa tuutuu. Nöö baka di Paulosu dë tu jaa a dunguwosu a Sesalia, hën de mandëën go a Loomë faa go a kuutu a di Gaan Könu u Loomë. Boo go luku andi pasa di de dë a pasi nango a Loomë.