WOTO 48
Suku bunu mati
Te u abi bunu mati, nöö de ta heepi u fuu ta dë waiwai, söseei de ta da u taanga te soni an nango bunu. Ma di Bëibel ta bai u taa na hii sëmbë da wan bunu mati. Ma nöö unfa i sa feni bunu mati? Boo luku dee hakisi aki.
1. Unfa dee mati dee joo tei sa mbei i ko dë?
Möön gaanfa, u ta ko dë kuma dee sëmbë dee u ku de ta hulu. Di soni aki sa mbei u feni bunu, nasö a sa mbei hogi miti u. Nöö aan toobi ee u ku de ta dë makandi nasö ta fan a Internet. Di Bëibel ta taki taa „di sëmbë di ta waka ku köni sëmbë o ko köni, ma di sëmbë di ta hulu don sëmbë [dee sëmbë dee an lobi Jehovah], soni an o nango bunu dëën seei” (Nöngö 13:20). Dee mati fii dee ta dini Jehovah, söseei dee lobi ën, sa heepi i fii ku ën ko dë möön gaan mati, söseei de sa heepi i fii du bunu soni. Ma ee u dë mati ku sëmbë di an ta dini Jehovah, nöö de sa mbei u ku Jehovah an dë mati möön. Fëën mbei di Bëibel ta da u taanga fuu suku bunu mati! Te dee mati fuu dë sëmbë di lobi Gadu, nöö de o heepi u fuu du bunu soni, söseei woo heepi de tu u de du bunu soni. Woo sa da ’useei degihati ta heepi useei fuu nango a fesi nöömö.’—1 Tesalonika 5:11.
2. Unfa Jehovah o fii te a ta luku dee mati dee i abi?
Jehovah ta luku bunu ambë a ta tei kuma mati. „A dë gaan mati ku dee sëmbë dee ta libi a wan leti fasi” (Nöngö 3:32). Unfa Jehovah o fii ee u dë mati ku sëmbë di an lobi ën? A o tjali seei! (Lesi Jakobosi 4:4.) Ma ee u ta köni ku poipoi mati, söseei ee u ko dë mati ku Jehovah ku dee sëmbë dee lobi ën, nöö Jehovah o wai ku u, nöö a o tei u kuma hën mati.—Psalöm 15:1-4.
WOTO SONI DI I SA LEI
Woo luku faandi mbei a dë fanöudu fuu suku bunu mati, söseei woo luku unfa i sa suku mati di sa heepi i fii abi wan bunu libi.
3. Köni ku poipoi mati
Dee sëmbë dee an lobi Gadu ku dee wëti fëën, da poipoi mati. Pëë di FËLÖN, nöö piki di hakisi aki.
Unfa u sa bigi nama ku poipoi mati söndö fuu sabi?
Lesi 1 Kolenti 15:33, nöö piki di hakisi aki:
Un pei sëmbë sa dë poipoi mati da i? Faandi mbei i taki sö?
Lesi Psalöm 119:63, nöö piki di hakisi aki:
Unfa i sa sabi ambë da wan bunu mati?
Wan poipoi apa sa poi hii dee woto apa. Unfa poipoi mati sa poi i libi?
4. U ku sëmbë di an dë pei, söseei di an kiija a di wan seei fasi sa ko dë bunu mati
Di Bëibel ta taki soni u Dafiti ku Jonatan, tu womi di bi libi a di köndë Isaëli fu awooten. De an bi abi di wan jaa, nöö wan u de bi dë wan könu womi mii, ma tökuseei de bi dë gaan mati. Lesi 1 Samuëli 18:1, nöö piki di hakisi aki:
Faandi mbei na hii juu u ku dee mati fuu musu abi di wan seei jaa, nasö taa de musu gudu kuma u nasö pooti kuma u?
Lesi Loomë 1:11, 12, nöö piki di hakisi aki:
Unfa tu mati di lobi Jehovah sa da deseei taanga?
Luku di fëlön aki, fii si unfa wan baaa bi feni wan mati a wan kamian ka an bi mëni. Pëë di FËLÖN, nöö piki dee hakisi aki.
Faandi mbei Akil mama ku hën tata bi ta booko de hedi ku dee mati dee a bi abi a siköö?
Faandi mbei bigibigi a bi kë dë mati ku de?
Andi bi heepi ën fu an bi ta fii möön taa a dë hën wanwan?
5. Andi i sa du fii feni bunu mati?
Boo luku unfa i sa feni bunu mati, söseei unfa i sa dë wan bunu mati tu. Pëë di FËLÖN.
Lesi Nöngö 18:24 ku 27:17, nöö piki dee hakisi aki:
Unfa tuutuu mati ta heepi deseei?
I abi dee lö bunu mati aki ö? Ee ja abi, nöö andi i sa du fii sa feni dee lö mati aki?
Lesi Filipi 2:4, nöö piki di hakisi aki:
Ee i kë abi bunu mati, nöö iseei musu dë wan bunu mati tu. Unfa i sa ko dë wan bunu mati?
Ee i kë abi bunu mati, nöö iseei musu dë wan bunu mati tu
SO SËMBË TA TAKI TAA: „Aantoobi andi wan mati ta biibi, solanga a ta libi bunu ku i, nöö a bunu.”
Andi ii bi o taki?
ANDI I LEI?
Te u ta suku bunu mati, nöö Jehovah o ta wai ku u, söseei a o tja wini ko da u tu.
Andi i bi o piki?
Faandi mbei Jehovah ta booko ën hedi ambë u ta tei kuma mati?
Un mati wa musu tei?
Unfa i sa ko dë gaan mati ku sëmbë di lobi Jehovah?
WOTO SONI DI I SA LUKU
Lesi di woto aki fii si unfa bunu mati sa heepi u te u dë a fuka.
Lesi di woto aki fii si andi ku andi i sa du fii sa ko abi bunu mati.
„Fa mi kan feni bun mati?” (Sani di yongusma e aksi—Piki di kan yepi den, Pisi 1, kapitel 8)
Luku di fëlön aki fii ko sabi ee dee mati dee i abi a Internet da bunu mati.
Lesi di woto „Mi ben e angri fu abi wan papa”, fii si faandi mbei wan womi bi suku woto mati.
„Bijbel e kenki sma libi” (A Waktitoren, 1 u piki-deewei-liba 2012)