Unfa i sa abi wan piizii wosudendu libi?​—Pisi 2

Miii da wan gudu di Jehovah da mama ku tata. Nöö a kë u de ta sölugu dee mii u de bunu. A di Wöutu fëën a ta piki de andi ku andi de sa du, u kiija dee mii u de a wan bunu fasi. Dee soni dee sikifi a di Wöutu fëën sa heepi dee mii tu, u de sabi andi de musu du u soni sa waka bunu a di wosudendu.

1. Andi Jehovah ta piki dee mama ku dee tata?

Jehovah kë u mama ku tata lobi dee mii u de, nöö a kë u de ta dë makandi ku de. A kë u de ta tjubi dee mii u de tu u hogi an miti de, söseei a kë u de ta wooko ku dee mama wëti u Bëibel u lei de soni (Nöngö 1:8). A ta piki dee tata taa: „Un musu kiija de [dee mii fii] a wan leti fasi ta lei de kumafa Jehovah kë u de musu libi.” (Lesi Efeise 6:4.) Jehovah ta wai te mama ku tata ta wooko ku dee köni dee a da de u de kiija dee mii u de, söseei te de an ta disa di faantiwöutu dë da woto sëmbë.

2. Andi Jehovah ta piki dee mii?

Jehovah ta piki dee mii taa: „Un musu ta piki dee gaan sëmbë fuunu buka a hii soni.” (Lesi Kolosën 3:20.) Te mii ta lesipeki de mama ku de tata, söseei te de ta piki de buka, nöö Jehovah ku dee gaan sëmbë u de tuu ta wai (Nöngö 23:22-25). Miii sa piki de mama ku de tata buka leti kumafa Jesosi bi du ën di a bi dë mii. Hii fa an bi abi zöndu, tökuseei a bi ta piki hën mama ku hën tata buka, söseei a bi ta lesipeki de.​—Lukasi 2:51, 52.

3. Andi sëmbë u wan wosudendu musu du u de sa ko dë möön gaan mati ku Gadu?

Ee i da wan mama nasö wan tata, nöö u dë seiki taa i kë u dee mii fii lobi Jehovah kumafa iseei lobi ën. Unfa i sa heepi de u de ko lobi Jehovah? Hën da te i ta du andi di Bëibel ta taki. Di Bëibel ta taki taa: „Un musu ta lei de dee soni [dee soni di Jehovah taki] aki hii juu, u de an fëëkëtë de. Un musu ta taki u dee soni aki te un dë sindosindo a wosu ku te un dë a pasi ta waka.” (Detolonomi 6:7). Wë leti kumafa i ta toona piki dee mii fii wan soni hii juu baka u de an fëëkëtë ën, sö nöö di tëkisi aki ta lei u taa mama ku tata musu ta konda soni u Jehovah da dee mii u de hii juu baka, sö taa de an fëëkëtë dee soni dë. A dë wan bunu soni fuun ta hoi di Wosudendu Dini hiniwan wiki. Ee i abi mii, nöö joo si taa woon ta feni wini fëën te un ta lei soni a di Wöutu u Gadu hiniwan wiki.

WOTO SONI DI I SA LEI

4. Lei dee mii fii taa i lobi de

A sa dë wan taanga soni u kiija mii. Ma unfa di Bëibel sa heepi i? Lesi Jakobosi 1:19, 20, nöö piki dee hakisi aki:

• Unfa mama ku tata sa lei taa de lobi dee mii u de te de ta fan ku de?

• Faandi mbei mama ku tata an musu ta du soni ku hatiboonu te de ta kiija dee mii u de?a

5. Tjubi dee mii fii

Ee i kë tjubi dee mii fii u sëmbë an du hogi ku de, nöö a dë fanöudu fii fan ku hiniwan u de u di duumi di womi ku mujëë ta duumi ku deseei. Di soni aki sa dë wan taanga soni u du. Pëë di FËLÖN, nöö piki dee hakisi aki.

FËLÖN: Tjubi dee mii fii u hogi an miti de (2:58)

• Faandi mbei a dë wan taanga soni da so mama ku tata u de taki u manu ku mujëë soni ku dee mii u de?

• Andi so mama ku tata bi du u de bi sa taki u manu ku mujëë soni ku dee mii u de?

Kumafa wan tjabukama woto bi taki, nöö di goonliba u Saatan ta ko möön hogi daka fu daka. Lesi 2 Timoteo 3:1, 13, nöö piki di hakisi aki:

• So u dee sëmbë dee ta du dee hogi soni dee kai a vers 13, ta du hogihogi ku piki mii a di së u manu ku mujëë soni. Faandi mbei a dë fanöudu taa mama ku tata ta lei dee mii u de soni di nama ku manu ku mujëë soni, söseei faandi mbei de musu lei de andi de musu du u tjubi deseei u dee lö sëmbë dë an du hogihogi ku de?

I bi sabi di soni aki ö?

Dee Jehovah Kotoigi mbei sömëni buku ku woto soni di sa heepi mama ku tata u lei dee mii u de soni di nama ku manu ku mujëë soni, söseei u lei de unfa de sa tjubi dee mii u de u sëmbë an du hogihogi ku de. Luku wantu u dee soni a basu aki:

• Tjubi dee mii fii (fëlön)

• Teki leri fu a Bigi Leriman, woto 10 ku 32

• „Taki nanga yu pikin fu seks” (Ontwaakt! Nö. 5 2016)

6. Lesipeki dee gaan sëmbë fii

FËLÖN: Unfa mi musu fan ku dee gaansëmbë u mi? (2:19)

• Faandi mbei a dë wan bunu soni te mii ta fan a wan lesipeki fasi ku dee gaan sëmbë u de?

• Unfa wan mii sa fan ku dee gaan sëmbë fëën u lei taa a ta lesipeki de?

Lesi Nöngö 1:8, nöö piki di hakisi aki:

• Andi wan njönkuwan musu du te hën mama ku hën tata ta piki ën andi a musu du?

7. Dini Jehovah makandi ku dee sëmbë fii wosudendu

Sëmbë u wan wosudendu di ta dini Jehovah ta buta ten a wan së hiniwan wiki u de ta lei soni u Bëibel makandi. Andi de sa ta du a di Wosudendu Dini? Pëë di fëlön, nöö piki dee hakisi aki.

FËLÖN: Di Wosudendu Dini​—Dee bunu dee u ta feni te u ta hoi ën (8:04)

• Andi dee sëmbë u wan wosudendu sa du u de sa ta hoi di Wosudendu Dini hiniwan wiki?

• Andi mama ku tata sa du u hii sëmbë sa feni wini u di Wosudendu Dini, söseei u hii sembë sa ta dë waiwai te de ta hoi ën?​—Luku di peentje a bigi u di woto aki.

• Andi sa mbei a taanga da i ku dee sëmbë fii wosudendu fuun ta lei soni u Bëibel makandi?

Na awooten Isaëli, Jehovah bi kë taa dee sëmbë u wan wosudendu bi musu ta taki soni u di Wöutu fëën hiniwan juu. Lesi Detolonomi 6:6, 7, nöö piki di hakisi aki:

• Unfa i sa du di soni di sikifi a di tëkisi aki?

Soni di i sa du a di Wosudendu Dini fii:

• Un sa seeka unuseei da dee komakandi.

• Lesi wan Bëibel woto di dee sëmbë u di wosudendu fii o lobi, nöö un taki fëën makandi

• Ee dee mii fii piki jeti, nöö suku soni u piki mii da de, di dë a jw.org u de sa teeken nasö sikifi.

• Ee i abi gaangaan mii, nöö taki u wan woto u njönkuwan ku de di dë a jw.org.

• Pëë wan Bëibel woto makandi ku dee mii fii.

• Un luku wan fëlön a jw.org, nöö un taki fëën.

ANDI I LEI?

Jehovah kë u mama ku tata lobi dee mii u de. A kë u de ta lei de soni, söseei a kë u de ta tjubi de u hogi an miti de. A kë u dee mii ta lesipeki de mama ku de tata, söseei a kë u de ta piki de buka. Nöö a kë u dee sëmbë u wan wosudendu ta dini ën makandi.

Andi i bi o piki?

• Unfa mama ku tata sa lei dee mii u de soni, söseei andi de sa du u tjubi de u hogi an miti de?

• Unfa mii sa lei taa de ta lesipeki de mama ku de tata?

• Un wini dee sëmbë u wan wosudendu ta feni te de ta hoi di Wosudendu Dini hiniwan wiki?

WOTO SONI DI I SA LUKU

Lesi di woto aki fii si andi i sa du u heepi dee mii fii te de ta göö ko bigi

„Siksi prenspari les di yu musu leri yu pikin” (Ontwaakt! Nö. 2 2019)

Lesi di woto aki fii si un lai Bëibel ta da dee sëmbë dee ta sölugu dee gaan sëmbë u de di ko gaandi

„San Bijbel e taki fu a sorgu di wi musu sorgu wi papa nanga mama di kon owru kaba?” (Woto a di website fuu)

Luku unfa wan womi di an bi sa’ u kiija mii bi ko toon wan bunu tata di sa’ u kiija mii.

Jehovah bi lei u unfa u musu kiija dee mii fuu (5:58)

Lesi di woto aki fii si unfa dee tata sa ko dë gaan mati ku dee womi mii u de.

„San kan yepi wan papa fu de bun nanga en manpikin?” (A Waktitoren, 1 u ëlufumu-liba 2011)