Wooko ku di website fuu a di peleikiwooko​—„Piki u hakisi di nama ku Bëibel”

Di pisi „Buku ku woto soni” a di website fuu jw.org abi wan pisi di de ta kai „Buku ku brochure”. A di pisi naandë i sa feni di brochure Gadu abi bunu buka da u! Hiniwan u dee woto a di brochure aki abi hakisi, nöö di piki u de i sa feni a di palaglaaf di dë a basu u di hakisi. Ee u sabi wan tu u dee hakisi ku dee piki u de, nöö u sa wooko ku de a di peleikiwooko u bigi wan takimakandi ku wan sëmbë. U sa tei wan hakisi di dee sëmbë u di pisi wata fuu kë feni piki fëën. Baka di dë, i sa da di sëmbë pasi faa piki, nöö i sa konda dëën andi Bëibel ta taki u di soni dë. Baka di dë, u sa piki ën, nasö lei ën a di website fuu ka u feni di piki. Wan woto soni di u sa du, hën da u sa mbei hënseei lesi di piki a di website fuu. Kandë i sa taki: „Sömëni sëmbë ta hakisi deseei ee Gadu ta haika hii begi. I bi o kë sabi di piki u di hakisi aki ö? Mi bi o kë lei i ën a wan miniti dendu nöö.” Baka di dë i sa mbei a lesi di piki a palaglaaf 1 u woto 12 u di Bunu buka brochure di i download buta a di tëlëfön nasö di tablet fii. A di kaba u di takimakandi, i sa lei ën woto 17 u di Bëibel lei-buku.