Un dee njönkuwan, un go a fesi a di biibi baka te un dopu

1. Un bunu soni sömëni njönkuwan du kaa?

DUSUDUSU njönkuwan ta dopu hiniwan jaa. I dopu kaa u? Ee i dopu, nöö dee baaa ku dee sisa u di kemeente ta wai ku i seei, nöö Jehovah seei ta wai ku i tu! (Nöng. 27:11) Pakisei luku un mëni bunu soni i du kaa. Kandë sömëni jaa longi i tei ten u lei soni u Bëibel. I bi ko dë seiki taa di Bëibel da di Wöutu u Gadu. Boiti di dë, i ko lobi di Sëmbë di sikifi di santa buku aki. I bi ko lobi Jehovah sö tee taa i buta i libi nëën maun, hën i dopu. I du wan gaan bunu soni seei!

2. Andi woo lei a di woto aki?

² U dë seiki taa ufö i dopu, soni bi ta miti i di bi ta mbei a taanga da i fii hoi iseei a Jehovah. Ma möön i ta ko gaan sëmbë, möön soni o ta miti i. Saatan o ta mbei möiti fu ja lobi Jehovah möön, söseei fu ja dini ën möön (Ef. 4:14). Ja musu dëën pasi faa du di soni aki. Andi sa heepi i fii hoi iseei a Jehovah, söseei fii du di soni di i paamusi ën? Wë i musu „ta lei nango,” u te i ko toon gaangaan sëmbë a di biibi (Heb. 6:1). Ma unfa i sa du di soni aki?

ANDI I SA DU FII SA KO TOON WAN GAANGAAN SËMBË A DI BIIBI?

3. Andi hii Keesitu sëmbë musu du baka te de dopu?

³ Baka te u dopu, nöö a dë fanöudu taa hii u tuu du di soni di apösutu Paulosu bi piki dee Keesitu sëmbë u Efeise. A bi da de taanga u de „go a fesi a di biibi” (Ef. 4:13). Paulosu bi tei di go di u musu go a fesi a di biibi, maaka ku di göö di wan mii ta göö ta ko bigi. Te wan womi ku wan mujëë pai wan mii, nöö de ta lobi ën, söseei de ta wai ku ën. Ma an o sa dë wan beibi u nöömö. Te wan pisi, nöö a musu „kaba ku piki mii fasi” (1 Kol. 13:11). Sö nöö a dë da Keesitu sëmbë. Baka te u dopu, nöö u musu nango a fesi a di biibi nöömö. Boo luku wantu soni di sa heepi u fuu du di soni aki.

4. Un bunu fasi sa heepi i fii go a fesi a di biibi? (Filipi 1:9)

⁴ Ko lobi Jehovah möön gaanfa. U dë seiki taa i lobi Jehovah. Ma i sa ko lobi ën möön gaanfa. Unfa u sa du di soni aki? Wë apösutu Paulosu bi lei u wan fasi fa u sa du di soni aki a Filipi 1:9. (Lesi ën.) Paulosu bi begi Gadu da dee sëmbë u Filipi sö taa di lobi u de sa ta „göö nango nöömö”. Di soni aki kë taki taa di lobi di u abi da Jehovah sa göö. Unfa u sa du di soni aki? Wë u sa du ën te u ta ’ko sabi dee tuutuu woto u Masa Gadu finifini, söseei te u ta ko fusutan limbolimbo andi da di kë u Gadu’. Möön u ta ko sabi Jehovah, möön woo ko lobi ën, söseei möön woo ko lobi dee fasi fëën ku di fasi fa a ta du soni. Woo ta kë du soni di ta mbei a ta wai ku u, söseei nöiti woo kë du soni u mbei a tjali. Woo ta mbei hii möiti u ko fusutan andi a kë fuu du, söseei unfa u sa du ën.

5-6. Unfa u sa ko lobi Jehovah möön gaanfa?

⁵ Jesosi bi ta djeesi hën Tata gaanfa a dee fasi fëën. Fëën mbei u sa taki taa möön u ta ko sabi Jesosi, möön woo ko lobi Jehovah (Heb. 1:3). Di möön bunu fasi fa u sa ko sabi Jesosi, hën da te u ta lei soni a dee fö buku u Bëibel dee ta taki soni u di libi fëën. Ee ja abi di guwenti u lesi di Bëibel hiniwan daka, nöö i sa bigi lesi dee woto dee ta taki u di libi u Jesosi. Te i ta lesi dee woto aki, nöö buta pakisei a dee fasi dee Jesosi bi abi. Sëmbë an bi ta fëëë u go fan ku ën. Söseei a bi lo’ u fan ku piki mii (Maik. 10:13-16). Jesosi bi ta libi bunu ku dee bakama fëën, nöö de an bi ta fëëë u konda dëën unfa de ta si soni (Mat. 16:22). Jesosi bi ta djeesi hën Tata a di lö fasi aki. Biga Jehovah ta da sëmbë pasi u de ko fan ku ën. U sa ta fan ku Jehovah te u ta begi. Te u ta begi, nöö u sa konda hii soni di dë a u hati da Jehovah. U dë seiki taa an o kuutu u. A lobi u, söseei a ta booko hën hedi ku u.​—1 Pet. 5:7.

⁶ Jesosi bi ta fii da sëmbë. Apösutu Mateosi bi taki taa: „Fa a [Jesosi] si dee gaan hia sëmbë ta ko nëën nöömö dë, nöö tjali u de kisi ën teee. Biga a si taa de dë fukafuka weiwei, kuma wanlö hia sikafu dë a mundu söndö sëmbë u kiija de” (Mat. 9:36). Wë nöö unfa Jehovah ta fii? Jesosi bi taki taa: „Mi Tata . . . an kë na wan kodo sëmbë fëën musu lasi, te dou ku dee piki mii kuma disi aki seei. Sö a ta kai de gaan soni tjika” (Mat. 18:14). Di soni aki ta mbei u fii bunu seei, u di u ta si taa Jehovah lobi u te na soni! Möön u ta ko sabi Jesosi, möön u ta ko lobi Jehovah.

7. Un heepi i ta feni te i ta dë makandi ku Keesitu sëmbë di dë gaangaan sëmbë a di biibi?

⁷ I sa möön lobi wotowan, söseei i sa ko dë wan gaangaan sëmbë a di biibi, te i ta dë makandi ku dee baaa ku dee sisa u di kemeente fii, söseei te i ta mbei möiti fii ko sabi de möön bunu. Luku unfa de ta dë waiwai, u di de buta taa de o ta dini Jehovah. I sa hakisi de andi ku andi bi miti de a di dini di de ta dini Jehovah. Te i musu du wan gaan soni a di libi fii, nöö i sa suku lai a de. Di Bëibel ta taki taa: „Soni ta waka bunu te hia sëmbë dë di ta da lai.”​—Nöng. 11:14.

8. Andi i sa du te ja ta kaba dë seiki u dee soni dee i ta lei u Bëibel?

⁸ I musu ko dë seiki u soni. A palaklafu 2 u bi si taa Saatan o kë tapa u fu wa go a fesi a di biibi. Wan fasi fa a sa du di soni aki, hën da a sa mbei i si kuma so u dee soni dee i ta lei u Bëibel an dë sö tuutuu. Kandë so sëmbë o kë fii biibi taa na Gadu hën mbei libisëmbë, ma taa u ko fu useei. Kandë ja bi ta buta pakisei a di soni aki di i bi möön njönku, ma kandë di i ko möön bigi, hën de bigi lei i soni fëën a siköö. Kandë dee soni di dee sëmbë dee ta lei i soni a siköö ta piki i sa ta djei bumbuu soni. Ma kandë dee sëmbë aki seei an bi mbei möiti u ko sabi ee wan Sëmbë dë tuutuu di mbei hii soni. Mëni di soni di sikifi a Nöngö 18:17. A ta taki dë taa: „Di fosu sëmbë di ta hopo taki da hënseei te a dë a kuutu hën de o da leti. Ma wan woto sëmbë ta ko a di kuutu, nöö a ta bigi hakisi ën soni di ta tja ko a limbo unfa soni dë tuutuu.” Ka fii biibi hii soni di de ta lei i a siköö, a dë fanöudu fii öndösuku luku andi di Wöutu u Gadu ta taki. Öndösuku soni a dee buku fuu. I sa fan ku dee baaa ku dee sisa dee bi ta biibi taa hii soni ko u deseei. Hakisi de unfa a waka taa de ko ta biibi taa wan Sëmbë dë di mbei hii soni, söseei taa a lobi u. Te i fan ku de, nöö a o heepi i fii biibi tuutuu taa wan Sëmbë dë di mbei hii soni.

9. Andi i lei u di woto u Melissa?

⁹ Wan sisa de ta kai Melissa bi go öndösuku luku ee wan Sëmbë dë di mbei hii soni tuutuu, nöö di soni dë bi heepi ën faa ko dë seiki u di soni aki.b A bi taki taa: „Di fasi fa dee sëmbë dee bi ta lei u soni a siköö bi ta taki u di lei de kai Evolutie, bi mbei mi kë biibi taa sö soni dë tuutuu. Bigibigi ma bi kë öndösuku soni fëën, u di mi bi ta fëëë taa mi bi o ko ta biibi di Evolutie lei. Ma mi bi ko pakisei taa Jehovah an kë fuu dini ën söndö fuu öndösuku soni fëën fosu. Fëën mbei mi go lesi di buku Is er een Schepper die om u geeft? Söseei mi bi lesi di brochure Is het leven geschapen?, ku di brochure Vijf belangrijke vragen over het ontstaan van het leven. Di soni dë mi bi abi fanöudu. A bi hati mi taa ma bi lesi dee buku aki möön fuuku.”

10-11. Andi sa heepi i fii finga futu da fanafiti libi? (1 Tesalonika 4:3, 4)

¹⁰ Finga futu da fanafiti libi. Te i ta ko bigi, nöö dee manu ku mujëë fii fii sa ko möön taanga, nöö so juu sëmbë sa duwengi i fii libi fanafiti a di së u manu ku mujëë soni. Di soni aki Saatan kë fii du tu. Ma andi sa heepi i fii finga futu da fanafiti libi? (Lesi 1 Tesalonika 4:3, 4.) Konda da Jehovah unfa i ta fii, söseei hakisi ën faa da i taanga (Mat. 6:13). Hoi a pakisei taa Jehovah kë heepi i. Na kuutu a kë kuutu i (Ps. 103:13, 14). I sa go suku heepi a di Wöutu u Gadu tu. Melissa, di u bi taki soni fëën kaa, bi ta mbei möiti fu an pakisei soni di an bunu. A bi taki taa: „Di lesi di mi bi ta lesi di Bëibel hiniwan daka, bi heepi mi u mi hoi dou. A bi heepi mi tu u mi hoi a pakisei taa mi da u Jehovah, söseei taa mi abi ën fanöudu a mi libi.”​—Ps. 119:9.

¹¹ Na suku u du soni iseei. Piki dee gaansëmbë fii andi da dee fuka fii. An ta dë wan kösökösö soni u du, ma a dë fanöudu fii du ën. Melissa bi taki tu taa: „Mi bi begi Gadu faa da mi degihati, hën mi go konda da mi tata andi bi ta toobi mi. Di mi fan ku ën te mi kaba, hën mi bi ko ta fii möön bunu. Mi bi dë seiki taa Jehovah bi ta wai ku mi.”

12. Andi sa heepi i fii du soni a wan bunu fasi?

¹² Mbei dee mama wëti u Bëibel heepi i. Te i ta ko möön bigi, nöö pikipiki dee gaansëmbë fii o disa i fii du soni kumafa i kë. Ma tökuseei sömëni soni dë a di libi di ja sabi jeti. Unfa i sa ta du soni sö taa i ku Jehovah sa dë mati u nöömö? (Nöng. 22:3) Wan sisa de ta kai Kari, bi konda andi bi heepi ën faa ta du soni a wan möön bunu fasi. A bi ko fusutan taa te i ko toon gaangaan sëmbë a di biibi, nöö ja o abi wëti fanöudu da hii pikipiki soni. A bi taki taa: „Mi bi musu ko fusutan taa na wëti wanwan mi musu ta hoi, ma mi bi musu ko sabi unfa Jehovah ta si soni.” Te i ta lesi di Bëibel, nöö i sa hakisi iseei dee soni aki: ’Andi di pisi di mi lesi aki ta lei mi u di fasi fa Jehovah ta si soni? A abi mama wëti di sa heepi mi u mi du soni a wan bunu fasi ö? Ee a dë sö, nöö un wini mi o feni te mi du andi di Bëibel ta lei?’ (Ps. 19:7; Jes. 48:17, 18) Te i ta lesi di Bëibel, söseei te i ta pakisei fundu u dee mama wëti, nöö an o ta taanga da i fii du soni di ta kai ku Jehovah. Te i nango a fesi a di biibi, nöö joo ko si taa ja abi wëti fanöudu da hii pikipiki soni, u di i sabi unfa Jehovah ta si soni.

13. Unfa bunu mati sa heepi i? (Nöngö 13:20)

¹³ Ko abi mati di lobi Jehovah. Kumafa u bi taki kaa, nöö dee mati dee i abi sa heepi i fii ko dë gaangaan sëmbë a di biibi. (Lesi Nöngö 13:20.) Wan sisa de ta kai Sara an bi ta dini Jehovah waiwai sö möön. Ma wan soni bi ko pasa di bi mbei a ko ta dë waiwai baka. Sara bi taki taa: „Mi bi ko feni wantu bunu mati a di ten di mi bi abi de fanöudu. Mi ku wan njönku sisa bi ta ko makandi hiniwan wiki fuu luku Di Hei Wakitimawosu. Wan woto mati u mi bi heepi mi u mi ta da piki a dee komakandi. Dee mati u mi bi heepi mi u mi ta öndösuku soni u Bëibel möön gaanfa, söseei u mi ta begi möön gaanfa. Mi ku Jehovah bi ko toon möön gaan mati, nöö mi bi ko ta dë waiwai baka.”

14. Unfa Baaa Julien bi ko abi bunu mati?

¹⁴ Unfa i sa ko abi mati di sa heepi i fii ta du bumbuu soni? Nöunöu wan baaa de kai Julien dë wan gaanwomi u kemeente, nöö a bi taki taa: „Di mi bi möön njönku, mi bi ko abi bunu mati u di mi bi ta peleiki makandi ku de. Dee mati u mi aki bi ta du di peleikiwooko fajafaja, nöö de bi heepi mi u mi ko abi möön piizii a di peleikiwooko. Mi bi buta taa mi bi kë du di hii-ten diniwooko. Mi bi ko fusutan taa di soni mbei ma bi abi bunu mati hia, hën da u di mi bi ta suku mati di mi ku de bi dë pei. Bakaten, mi bi ko abi mati a Bëtëli tu. Di fasi fa de bi ta du soni, bi heepi mi u mi ta köni ku dee soni dee mi ta du u mbei piizii, nöö di soni aki bi mbei mi ku Jehovah ko dë möön gaan mati.”

15. Andi Paulosu bi piki Timoteo? (2 Timoteo 2:20-22)

¹⁵ Andi i musu du ee i ko si taa wan sëmbë di i ta hulu a di kemeente sa mbei taa i ku Jehovah poi? Paulosu bi sabi taa so sëmbë u di kemeente an bi ta tja deseei kuma Keesitu sëmbë. Fëën mbei a bi piki Timoteo taa an musu nama ku de. (Lesi 2 Timoteo 2:20-22.) U ta tei di dë di u ku Jehovah dë mati u bigi. U bi mbei taanga möiti seei fuu ku Jehovah ko dë mati, nöö wa musu mbei dee sëmbë dee u ta hulu poi u ku Jehovah.​—Ps. 26:4.

UNFA DI BUTA DI I TA BUTA MAAKA DA ISEEI SA HEEPI I FII GO A FESI A DI BIIBI?

16. Un pei maaka i sa buta da iseei?

¹⁶ Buta maaka di sa tja wini ko da i. Buta maaka di sa heepi i fii ko abi wan möön taanga biibi, söseei di sa heepi i fii ko dë gaangaan sëmbë a di biibi (Ef. 3:16). Kandë i sa buta taa joo ta möön lesi di Bëibel, söseei taa joo ta möön öndösuku soni fëën (Ps. 1:2, 3). Nasö kandë i sa buta taa joo ta begi möön fa i bi guwenti, nöö joo ta du ën ku hii i hati. Kandë i musu ta köni ku dee soni dee i ta du u mbei piizii, söseei ku di fasi fa i ta wooko ku di ten fii (Ef. 5:15, 16). Te Jehovah ta si taa i ta mbei möiti u go a fesi, nöö a o ta wai ku i.

17. Un wini i ta feni te i ta heepi wotowan?

¹⁷ Joo ko dë gaangaan sëmbë a di biibi, te i ta heepi sëmbë a soni. Jesosi bi taki taa: „Dee sëmbë ta da sëmbë soni, de dë waiwai möön leki dee sëmbë dee ta feni” (Tjab. 20:35). Joo ta dë waiwai seei te i ta tei di ten fii ku di kaakiti fii u heepi wotowan. Kandë i sa buta taa joo ta heepi dee gaan sëmbë, nasö dee sëmbë dee dë ku suwaki a di kemeente. Kandë i sa heepi de bai soni, nasö i sa heepi de ku dee tëlëfön nasö ku dee tablet u de. Ee i da wan baaa, nöö i sa buta taa joo ko toon wan dinai, sö taa i sa ta möön heepi dee baaa ku dee sisa u di kemeente (Fil. 2:4). I ta lei taa i lobi dee sëmbë dee an dë a di kemeente jeti, te i ta paaja di bunu buka u di könuköndë da de (Mat. 9:36, 37). Ee a sa, nöö i sa mbei möiti fii du di hii-ten diniwooko.

18. Unfa di hii-ten diniwooko sa heepi i fii go a fesi a di biibi?

¹⁸ Di hii-ten diniwooko sa heepi i fii ko möön zuntu ku Jehovah. Ee i ta du di pioniliwooko, nöö joo sa feni di okasi fii go a di Siköö da Könuköndë Peleikima. Joo sa wooko a Bëtëli, nasö joo sa heepi mbei kamian ka u ta dini Gadu. Wan njönku sisa de ta kai Kaitlyn, di ta du di pioniliwooko, bi taki taa: „Di wooko di mi bi ta wooko makandi ku dee baaa ku dee sisa di abi öndöfeni, bi heepi mi u mi go a fesi a di biibi baka di mi dopu. Di fasi fa de bi ta du soni bi heepi mi u mi möön öndösuku soni u Bëibel, söseei a bi heepi mi u mi ko möön sa’ u lei sëmbë soni.”

19. Un bunu joo feni te i ta mbei möiti go dou fii go a fesi a di biibi?

¹⁹ Te i ta mbei möiti go dou u go a fesi a di biibi, nöö Jehovah o mbei i feni sömëni gaan bunu. Ja o ta lasi i ten a soni di an dë fanöudu baka (1 Joh. 2:17). Ja o bai sabisö u dee soni dee i bi du. Ma soni o waka bunu da i, söseei joo ta dë waiwai (Nöng. 16:3). Di fasi fa i ta tja iseei o ta da hii dee baaa ku dee sisa fii taanga (1 Tim. 4:12). Ma di möön fanöudu soni, hën da joo ta dë waiwai u di i ta du soni di ta kai ku Jehovah, söseei u di i ku ën dë mati.​—Nöng. 23:15, 16.