Djeesi Jesosi a di fasi fa a bi ta peleiki fajafaja

1. Unfa dee dinima u Jehovah ta tooka ku dee sëmbë dee ta kai de seei Keesitu sëmbë?

DEE dinima u Jehovah ta peleiki di bunu buka fajafaja.a Di soni dë ta mbei de tooka ku dee woto sëmbë dee ta kai deseei Keesitu sëmbë (Tit. 2:14). Ma so juu, a sa ta taanga da i fii peleiki ku piizii. Kandë i sa piki ku di soni di wan gaanwomi di bi ta wooko taanga bi taki. A bi taki taa: „So juu ma ta fii seei u go a di peleikiwooko.”

2. Andi sa mbei taa wa sa du di peleikiwooko fajafaja möön?

² A kan taa dee woto soni dee u ta du a di dini di u ta dini Jehovah ta da u möön piizii, möön di peleiki di u ta peleiki da sëmbë. Faandi mbei? Wë te u ta mbei kamian ka u ta dini Gadu, te u ta heepi dee baaa ku dee sisa fuu te wan hogi pasa a di pisiwata ka de dë, nasö te u ta da dee baaa ku dee sisa fuu taanga, nöö u ta si di wini fëën wantewante dë. Di soni dë ta mbei u si taa u du wan bunu wooko, nöö u ta fii bunu. Te u ta wooko makandi ku dee baaa ku dee sisa fuu, nöö u ta dë bööböö, söseei u ta fii taa u lobi useei, nöö u sabi taa de ta tei dee soni dee u ta du da de u bigi. Ma a kan taa u ta peleiki a di seei pisiwata sömëni jaa longi kaa, nöö kandë sëmbë an hia di ta haika u, nasö kandë u ta miti sëmbë di na ta kë jei di bosikopu di u ta peleiki. U sabi tu taa möön di kaba ta ko zuntu, möön sëmbë o ta buuse u (Mat. 10:22). Andi o heepi u fuu ta peleikiwooko fajafaja go dou, nasö fuu ko dë möön fajafaja a di peleikiwooko?

3. Andi u sa lei a Jesosi te u luku di soni di sikifi a Lukasi 13:6-9?

³ U sa lei wan soni a di fasi fa Jesosi bi ta du di peleikiwooko fajafaja. Di Jesosi bi dë a goonliba aki, nöö nöiti a bi bösö maun a di peleikiwooko. Ma möön di ten bi ta pasa möön a bi ta wooko taanga u heepi sëmbë a di peleikiwooko. (Lesi Lukasi 13:6-9.) A wan woto di Jesosi bi konda, nöö a bi tei di wooko di a bi ta du maaka ku wan sëmbë di ta wooko goon. Di sëmbë aki wooko taanga dii jaa longi u mbei di figa pau fëën pai njanjan, ma di figa pau an pai na wan kodo sii fuuta möönsö. Sö nöö Jesosi bi wooko taanga dii jaa longi u peleiki da dee Dju sëmbë, ma gaansë u de an bi toon bakama fëën möönsö. Leti kumafa di goonma an bi wei da di figa pau fëën, sö nöö Jesosi an bi ko wei u peleiki da dee Dju sëmbë, nöö an bi bösö maun tu. Ma a bi wooko möön taanga u dou de hati.

4. Andi da dee fö soni dee woo lei a Jesosi?

⁴ A di woto aki woo luku unfa Jesosi bi du di peleikiwooko fajafaja, a dee sikisi lasiti liba dee a bi libi a goonliba aki. U sa dë fajafaja kuma Jesosi, te u ta piki ën buka a soni, söseei te u ta du dee soni dee a bi du. Boo luku fö soni di u sa lei a Jesosi. Di fosu soni hën da, a bi ta du andi Jehovah bi kë. Di u tu soni hën da, a bi ta buta pakisei a dee tjabukama woto u Bëibel. Di u dii soni hën da, a bi ta suku heepi a Jehovah. Nöö di u fö soni hën da, a bi dë seiki taa so sëmbë bi o haikëën.

A BI TA DU ANDI JEHOVAH KË

5. Unfa Jesosi bi lei taa a bi ta buta pakisei a di soni di Jehovah bi kë faa du?

⁵ Jesosi bi ta peleiki di bunu buka u di „Njunjun Tii u Gadu”, u di a bi sabi taa di wooko dë Gadu bi kë faa du (Luk. 4:43). Di peleikiwooko bi da di möön fanöudu soni a di libi u Jesosi. A dee lasiti daka fëën a goonliba aki seei a bi ta pasa a sömëni köndë ta lei sëmbë soni (Luk. 13:22). A bi lei sömëni u dee bakama fëën soni, sö taa de bi sa ta peleiki makandi ku ën.​—Luk. 10:1.

6. Unfa di peleikiwooko nama ku dee woto soni dee u ta du a di dini di u ta dini Jehovah? (Luku di peentje tu.)

⁶ Jehovah ku Jesosi kë taa di peleikiwooko musu dë di möön fanöudu wooko a di ten aki tu (Mat. 24:14; 28:19, 20). Hii dee soni dee u ta du da Jehovah nama ku di peleikiwooko. U ta mbei Könuköndë zali sö taa dee sëmbë dee u ta peleiki da sa ko dini Gadu makandi ku u. Dee wooko dee u ta du a Bëtëli ta heepi di peleikiwooko u go a fesi. Te wan hogi pasa a wan kamian, nöö wa ta heepi dee baaa ku dee sisa ku dee soni dee de abi fanöudu wanwan nöö a kaba, ma u ta heepi de u de sa go a dee komakandi, söseei u de sa du di peleikiwooko go dou. Ee u ta hoi a pakisei taa di peleikiwooko da di möön fanöudu wooko di Jehovah kë taa u musu du, nöö woo ta kë peleiki möön hia. Wan gaanwomi de kai János di ta libi a wan köndë de kai Hongalia bi taki taa: „Na wan wooko di u ta du da Jehovah dë fanöudu möön di peleikiwooko.”

7. Faandi mbei Jehovah kë taa u musu peleiki go dou?(1 Timoteo 2:3, 4)

⁷ U sa ko ta du di peleikiwooko möön fajafaja te u ta si sëmbë kumafa Jehovah ta si de. A kë taa gaan hia sëmbë jei di bunu buka, söseei taa de ko ta biibi ën. (Lesi 1 Timoteo 2:3, 4.) Jehovah ta heepi u fuu ko sa’ u fan ku sëmbë möön bunu, u di di bunu buka aki sa mbei sëmbë feni di libi u teego. Di buku Lobi sëmbë​—Heepi de u de ko dë bakama u Jesosi ta lei u unfa u sa bigi fan ku wan sëmbë sö taa bakaten de sa bigi lei soni u Bëibel, nöö de ko dë bakama u Jesosi. Aluwasi ee de an bigi dini Jehovah nöunöu, ma kandë de sa abi di okasi jeti u dini ën ufö di gaan fuka kaba. Dee soni dee u ta piki de nöunöu sa mbei taa a di ten di ta ko de sa ko dini Jehovah. Ma di soni dë sa pasa sösö te u ta du di peleikiwooko go dou.

A BI TA BUTA PAKISEI A DEE TJABUKAMA WOTO U BËIBEL

8. Unfa di sabi di Jesosi bi sabi dee tjabukama woto u Bëibel bi heepi ën faa wooko ku di ten fëën a wan köni fasi?

⁸ Jesosi bi fusutan unfa dee tjabukama woto u Bëibel bi o pasa. A bi sabi taa dii jaa ku hafu nöö a bi o du di peleikiwooko (Dan. 9:26, 27). Boiti di dë, a bi sabi andi dee tjabukama woto bi ta taki u di ten di a bi o dëdë, ku di fasi fa a bi o dëdë (Luk. 18:31-34). U di Jesosi bi sabi andi dee tjabukama woto u Bëibel bi ta taki, mbei a bi wooko ku di ten fëën a wan köni fasi. A bi ta peleiki fajafaja sö taa a bi sa kaba di wooko di de dëën faa du.

9. Faandi mbei dee tjabukama woto u Bëibel ta da u taanga fuu ta peleiki fajafaja go dou?

⁹ U di u ta fusutan andi dee tjabukama woto u Bëibel ta taki, mbei woo ta kë du di peleikiwooko fajafaja. U sabi taa di hogi goonliba aki o ko a wan kaba abiti möön. Di Bëibel bi taki a fesi unfa sëmbë bi o ta libi a dee lasiti daka u di goonliba aki, söseei a bi taki andi bi o ta pasa a dee lasiti daka, nöö u ta si dee soni aki ta pasa nöunöu. Wan tjabukama woto ta taki taa di Könu u libasë ku di Könu u bausë bi o ta fia ku deseei a dee lasiti daka. Te u luku Ingisiköndë ku Amëëkanköndë, ku Losiaköndë ku dee sëmbë dee dë a Losiaköndë së, nöö u ta si taa dee Könu aki ta fia ku deseei a di ten aki (Dan. 11:40). U ta fusutan tu taa Ingisiköndë ku Amëëkanköndë da di futu u di gaan pobiki di sikifi a Daniëli 2:43-45. U dë seiki taa leti kumafa di tjabukama woto dë ta taki, nöö abiti möön kaa, awa an o tei longi möön, nöö di Könuköndë u Gadu o poi hii dee tii makiti u libisëmbë. Hii dee tjabukama woto aki ta lei taa di daka zuntu, nöö de ta da u taanga fuu ta peleiki möön fajafaja go dou.

10. Na un woto fasi dee tjabukama woto u Bëibel ta da u taanga u peleiki fajafaja go dou?

¹⁰ Dee tjabukama woto u Bëibel ta piki u soni di wa sa hoi da useei. Wan sisa de kai Carrie di ta libi a wan köndë de kai Dominika Lepubliek bi taki taa: „Te mi ta pakisei dee waiti soni dee Jehovah ta paamusi u a di ten di ta ko, nöö mi ta fii taa mi musu kondëën da wotowan.” A bi taki tu taa: „Te mi ta si dee bookohedi dee sëmbë ta abi, nöö mi ta fusutan taa dee soni dee Jehovah paamusi u aki, an dë da mi wanwan, ma a dë da woto sëmbë tu.” Dee tjabukama woto u Bëibel ta lei u taa Jehovah ta heepi u a di peleikiwooko, nöö di soni dë ta da u taanga fuu peleiki go dou. Wan sisa de kai Leila di ta libi a Hongalia bi taki taa: „Jesaaja 11:6-9 ta da mi taanga u mi paaja di bunu baka da dee sëmbë dee djei kuma de an o haika mi. Mi sabi taa Jehovah sa heepi hiniwan sëmbë u tooka de libi.” Wan baaa de kai Christopher di ta libi a di köndë de kai Zambia bi taki taa: „Maikusi 13:10 bi taki taa di bunu buka o peleiki a hii së u goonliba, nöö mi ta si ën kuma wan gaandi u da wan maun u mbei di tjabukama woto dë pasa tuutuu.” Undi u dee tjabukama woto u Bëibel ta da i taanga fii peleiki go dou?

A BI TA BIIBI TAA JEHOVAH O HEEPI ËN

11. Faandi mbei Jesosi bi musu biibi taa Jehovah o heepi ën faa bi sa peleiki fajafaja go dou? (Lukasi 12:49, 53)

¹¹ Jesosi bi ta biibi taa Jehovah o heepi ën faa sa peleiki fajafaja go dou. Hii fa Jesosi bi ta fan a wan lesipeki fasi ku sëmbë te a bi ta peleiki, tökuseei a bi sabi taa di bunu buka u di Könuköndë u Gadu bi o mbei hati u sëmbë boonu, söseei sömëni sëmbë bi o tapa di bunu baka fu an paaja (Lesi Lukasi 12:49, 53.) Dee keiki fesima an bi lobi di buka di Jesosi bi ta paaja. Fëën mbei de bi pooba sömëni pasi u kii ën (Joh. 8:59; 10:31, 39). Ma Jesosi bi go dou ku di peleikiwooko u di a bi sabi taa Jehovah bi dë ku ën. A bi taki taa: ’Mi Tata di manda mi ko dë ku mi. . . . An ta disa mi wanwan möönsö, biga hiniwan juu mi ta du dee soni dee ta kai ku ën.’​—Joh. 8:16, 29.

12. Unfa Jesosi bi seeka dee bakama fëën u de sa peleiki go dou aluwasi ee sëmbë bi o ta du ku de?

¹² Jesosi bi piki dee bakama fëën taa de sa dë ku di mëni taa Jehovah o heepi de. A bi ta piki de hii juu taa de sa dë seiki taa Jehovah o heepi de, aluwasi ee sëmbë ta du ku de (Mat. 10:18-20; Luk. 12:11, 12). Jesosi bi sabi taa sömëni sëmbë bi pooba u tapa di bunu baka u paaja, fëën mbei a bi piki de u de du soni ku köni (Mat. 10:16; Luk. 10:3). A bi piki de taa ee wan sëmbë an kë haika di bunu buka, nöö de an bi musu duwengi ën (Luk. 10:10, 11). Boiti di dë, a bi piki de taa ee de ta du ku de nöö de bi musu kule (Mat. 10:23). Hii fa Jesosi bi dë fajafaja a di peleikiwooko, söseei hii fa a bi ta buta futoou a Jehovah, tökuseei a bi ta tjubi hënseei u hogi an miti ën.​—Joh. 11:53, 54.

13. Faandi mbei u sa dë seiki taa Jehovah o heepi u?

¹³ U abi di heepi u Jehovah fanöudu u peleiki fajafaja go dou a di ten aki, u di sëmbë ta pooba u tapa di wooko fuu (Ako. 12:17). Faandi mbei i sa dë seiki taa Jehovah o heepi i? Boo luku di begi u Jesosi a Johanisi kapitë 17. Di Jesosi bi hakisi Jehovah faa luku dee apösutu fëën, hën Jehovah bi piki di begi fëën. Di buku u Bëibel de kai Tjabukama ta lei fa a bi heepi dee apösutu fëën u de peleiki fajafaja go dou, hii fa de bi ta du ku de. A bi begi hakisi Jehovah faa heepi dee sëmbë dee bi o haika dee apösutu fëën te kisi ju seei tu. Jehovah an tapa u piki di begi u Jesosi. A o heepi i tu, leti kumafa a bi heepi dee apösutu u Jesosi.​—Joh. 17:11, 15, 20.

14. Unfa u du sabi taa woo sa peleiki fajafaja go dou? (Luku di peentje tu.)

¹⁴ Möön di kaba ta zuntu, möön a sa taanga da u fuu peleiki di bunu buka. Ma Jesosi bi piki u taa woo feni di heepi di u abi fanöudu u peleiki fajafaja go dou (Luk. 21:12-15). Wa ta duwengi sëmbë u haika di bunu buka, söseei wa ta fia ku de, leti kuma Jesosi ku dee bakama fëën. Aluwasi ee de tapa di wooko fuu a wan köndë, tökuseei dee baaa ku sisa ta paaja di bunu buka go dou, u di de an ta buta futoou a deseei, ma de ta buta futoou a Jehovah. Leti kumafa Jehovah bi da dee fesiten Keesitu sëmbë kaakiti, sö nöö a di ten aki a ta da dee dinima fëën kaakiti sö taa „di buka sa feni pasi paaja seei be hii dee sëmbë” u goonliba jei, kumafa Jehovah kë (2 Tim. 4:17). I sa dë seiki taa joo sa peleiki fajafaja go dou ee i buta futoou a Jehovah.

A BI DË SEIKI TAA SO SËMBË O HAIKA ËN

15. Andi bi ta lei taa Jesosi bi dë seiki taa sëmbë bi o dë di bi o haika di bunu buka?

¹⁵ Jesosi bi dë seiki taa so sëmbë bi o haika di bunu buka. Di soni dë bi ta heepi ën faa ta dë waiwai, söseei faa bi sa wooko taanga go dou a di peleikiwooko. Baka wan jaa di Jesosi bi bigi du di peleikiwooko, nöö a bi si taa sömëni sëmbë bi kë haika di bunu buka. A bi tei dee sëmbë dë maaka ku alisi a goon di lepi u koti (Joh. 4:35). Wan jaa baka di dë, hën a bi piki dee bakama fëën taa: „Dee sëmbë o, a tjali da mi e. Wan si fa dee sëmbë ta ko gidjii nöömö a mi nö? De dë kuma wan gaan goon njanjan lepilepi fii koti buta a suwa” (Mat. 9:37, 38). Bakaten a bi toona taki taa: „Un haika e, dee sëmbë. Di goon bigi nöö di njanjan lepi u koti . . . Nöö un begi Masa Gadu e, faa puu hia sëmbë manda go a di wooko fëën” (Luk. 10:2). Jesosi bi dë seiki taa sëmbë bi o dë di bi o haika di bunu buka, nöö a bi ta wai seei te de bi haika.​—Luk. 10:21.

16. Unfa dee tu woto dee Jesosi bi konda ta lei taa u sa dë seiki taa di peleikiwooko o go a fesi? (Lukasi 13:18-21) (Luku di peentje tu.)

¹⁶ Jesosi bi heepi dee bakama fëën u ta peleiki fajafaja go dou, di a bi piki de taa sëmbë o dë di bi o haika de. Boo luku tu u dee woto dee Jesosi bi konda. (Lesi Lukasi 13:18-21.) Jesosi bi wooko ku wan sii de kai mutaadi u lei sëmbë taa di bunu buka u di Könuköndë u Gadu o paaja a sömëni köndë a goonliba. Sëmbë o tooka de libi, nöö sëmbë an o si wantewante dë taa de tooka de libi seei. A sö wan fasi Jesosi bi heepi dee bakama fëën u de ko si taa di peleikiwooko bi o heepi sömëni sëmbë.

17. Faandi mbei u dë seiki taa sëmbë dë di o haika di bunu buka?

¹⁷ Te u ta si fa di peleikiwooko ta heepi sömëni sëmbë a hii së u goonliba, nöö u ta feni taanga u peleiki go dou. Hiniwan jaa milionmilion sëmbë ta ko mëni di dëdë u Jesosi makandi ku u, söseei hiniwan jaa milionmilion sëmbë ta ko lei soni u Bëibel. Dusudusu sëmbë ta dopu, nöö de ta du di peleikiwooko makandi ku u. Wa sabi u mëni sëmbë fika u piki di bunu baka jeti, ma u sabi taa Jehovah ta tja wanlö gaan hia sëmbë ko wan, dee o pasa di gaan fuka libilibi (Ako. 7:9, 14). Di Sëmbë di abi di goon ta si sëmbë di kë haika di bunu buka jeti, nöö fëën mbei woo du di peleikiwooko go dou.

18. Andi u kë woto sëmbë musu ta si a u te u dë a di peleikiwooko?

¹⁸ Sëmbë ta sabi dee tuutuu bakama u Jesosi a di fasi fa de ta peleiki fajafaja. Dee apösutu bi ta peleiki fajafaja, ku piizii sö tee taa sëmbë bi ko fusutan taa de „bi ta dë ku Masa Jesosi, hën wë mbei de sabi u fan sö” (Tjab. 4:13). Te sëmbë ta luku u a di peleikiwooko, nöö be de si tu taa u ta djeesi Jesosi a di fasi fa a bi ta peleiki fajafaja.