Faandi mbei u ta hoi di Ndeti Njanjan u Masa?

1, 2. Andi Jesosi bi du a di ndeti u 14 Nisan u di jaa 33? (Luku di peentje a bigi u di woto.)

DI LIBAWOJO bi kumutu a Jelusalen a di ndeti u 14 Nisan u di jaa 33. Jesosi ku dee apösutu fëën bi ta hoi di Pasika. De bi ta hoi di Pasika u mëni baka fa Jehovah bi fii dee Isaëli sëmbë puu a Egepiti söwan 1500 jaa pasa. Jesosi bi seeka wan apaiti njanjan ku dee 11 bumbuu apösutu fëën. Nöö di daka dë dee bakama fëën bi o ta hoi hiniwan jaa u mëni di dëdë di a bi o dëdë da de.​—Mateosi 26:1, 2.

² Di Jesosi begi te a kaba, hën a tei di bëëë söndö sooda hën tëndëën da dee apösutu fëën, hën a taa: „Un tei ën nöö un njan e.” Hën a tei di kan win, hën a toona begi baka, hën a taa: „Un tei nöö un bebe e” (Mateosi 26:26, 28). Di bëëë ku di win kë taki wan apaiti soni. Dee apösutu u Jesosi dee bi ta dini Gadu ku hii de hati lei sömëni soni a di ndeti dë.

3. Un hakisi woo piki a di woto aki?

³ Jesosi bi kë u dee bakama fëën ta mëni di dëdë fëën hiniwan jaa. Bakaten hën de ko ta kai di daka aki di „Ndeti Njanjan u Masa” nasö di daka di u ta mëni di dëdë u Jesosi (1 Kolenti 11:20, NW). Kandë so sëmbë ta hakisi deseei: Faandi mbei u musu mëni di dëdë u Jesosi? Andi di bëëë ku di win kë taki? Unfa u sa seeka useei u mëni di dëdë u Jesosi? Ambë musu njan di bëëë, söseei ambë musu bebe di win? Nöö unfa Keesitu sëmbë ta lei taa de ta si di houpu di de abi, kuma wan gaan soni?

FAANDI MBEI U TA MËNI DI DËDË U JESOSI?

4. Andi u sa feni u di Jesosi dëdë da u?

⁴ U di Adam du zöndu, mbei useei ko toon zöndu libisëmbë, söseei a tja dëdë ko da u tu (Loomë 5:12). Na wan zöndu libisëmbë sa da Gadu wan lusupaima da di libi fëën, nasö da di libi u wan woto sëmbë (Psalöm 49:6-9). Ma Jesosi di an bi abi zöndu, da di telutelu libi fëën fuu hedi, söseei a da Gadu di lusupaima di libisëmbë bi abi fanöudu. Di soni di Jesosi du aki mbei u ko abi di houpu u libi u teego, söseei u sa kumutu a zöndu ku dëdë basu.​—Loomë 6:23; 1 Kolenti 15:21, 22.

5. (a) Unfa u du sabi taa Jehovah ku Jesosi lobi u? (b) Faandi mbei u musu nango a di komakandi ka de ta mëni di dëdë u Jesosi?

⁵ Gadu lei u taa a lobi u u di a seti di lusupaima da u (Johanisi 3:16). Jesosi lei u taa a lobi u, u di a da hën libi fuu hedi. Ufö Jesosi bi ko a goonliba seei „a bi lobi libisëmbë” (Nöngö 8:30, 31). U ta tei di soni di Jehovah ku Jesosi du da u u bigi seei! Fëën mbei te u nango a di komakandi ka de ta mëni di dëdë u Jesosi, hën da u ta piki ën buka, u di a bi taa ’un musu ta mëni di dëdë di mi dëdë da unu’.​—1 Kolenti 11:23-25.

ANDI DI BËËË KU DI WIN KË TAKI?

6. Andi u ta fusutan u di bëëë ku di win di de ta tei u mëni di dëdë u Jesosi?

⁶ Di Jesosi bi ta njan di lasiti pasi ku dee apösutu fëën, an bi tooka di bëëë ko toon hën sinkii, nöö an bi tooka di win ko toon hën buuu tu. Di a tei di bëëë hën a taa: „Disi da di sinkii u mi e.” Hën a taki u di win taa: „Hën da di buuu u mi di o kai a goon . . . biga fa mi o dëdë aki, hën o paka puu sömëni hia sëmbë a Gadu bëë u dee hogi du u de” (Maikusi 14:22-24). U ta fusutan gbelingbelin taa tei Jesosi bi tei di bëëë ku di win u mbei sëmbë mëni di sinkii fëën ku di buuu fëën.

7. Andi di bëëë söndö sooda kë taki?

⁷ A di apaiti ndeti dë, dee bëëë söndö sooda di bi fika di de bi hoi di Pasika piizii, de Jesosi bi tei (Ëkisodesi 12:8). So juu di Bëibel ta tei sooda maaka ku zöndu (Mateosi 16:6, 11, 12; Lukasi 12:1). Jesosi bi tei di bëëë söndö sooda maaka ku di sinkii fëën di an bi abi zöndu (Hebelejën 7:26). Fëën mbei bëëë söndö sooda u ta tei u mëni di dëdë u Jesosi.

8. Andi di win kë taki?

⁸ Di win di Jesosi bi tei, bi kë taki di buuu fëën, nasö di libi fëën. Sö nöö a dë ku di win di u ta tei u mëni di dëdë fëën a di ten aki. Jesosi dëdë da u, a wan kamian de kai Golugata di dë zuntu ku Jelusalen, u „puu hia sëmbë a bëë u dee hogi de bi du” (Mateosi 26:28; 27:33). Ee u ta tei di gaan soni di Jesosi du da u dë u bigi, nöö woo ta seeka useei da di apaiti daka aki. Unfa u sa du di soni aki?

DI FASI FA U SA SEEKA USEEI

9. (a) Faandi mbei u musu lesi dee pisi u Bëibel dee u kisi u lesi di nama ku di mëni u di dëdë u Jesosi? (b) Unfa i ta si di lusupaima?

⁹ Wan fasi fa u sa seeka useei u mëni di dëdë u Jesosi, hën da te u ta lesi dee pisi u Bëibel dee u kisi u lesi, dee dë u feni a di piki buku Ondrosuku den Buku fu Bijbel. Te u ta lesi dee Bëibel pisi dë, nöö a o heepi u u pakisei fundu u dee soni dee bi pasa ufö Jesosi dëdë.a (Luku di pisi a basu.) Wan sisa bi taki taa: „U ta wakiti di daka di woo mëni di dëdë u Jesosi. Hiniwan jaa a ta ko toon wan möön gaan soni da mi. Mi ta mëni jeti di mi bi dë taanputaanpu a di kamian ka de bi buta di dëdë sinkii u mi tata. . . . Di mi si di lobi tata u mi, ufö mi ko si unfa di lusupaima bi bigi da m’ tjika. . . . Wë mi bi sabi andi di Bëibel ta taki, söseei unfa mi musu heepi sëmbë u fusutëën! Ma di sëmbë u mi ko dëdë, nëën ufö mi hati ko ta wai tuutuu ku di soni di di lusupaima o du da u.” Awa, di pakisei di u musu pakisei fundu u di fasi fa di dëdë u Jesosi o heepi u tjika, da wan fanöudu soni di u musu du u seeka useei u mëni di dëdë fëën.

10. Andi da wan woto soni di u sa du u seeka useei u mëni di dëdë u Jesosi?

¹⁰ Wan woto fasi fa u sa seeka useei, da te u ta peleiki möön hia u kai hia sëmbë te ka u sa kai dou u ko mëni di dëdë u Jesosi. Kandë u sa go a di heepi pioniliwooko. Te u ta konda soni u Gadu, u di Womi Mii fëën, söseei u di houpu di u abi u libi u teego, nöö woo ta fii bunu u di u du andi Gadu kë taa u musu du.​—Psalöm 148:12, 13.

11. Faandi mbei Paulosu bi taki taa so u dee sëmbë u Kolenti bi ta njan ta bebe a wan fasi di na fiti te de bi ta mëni di dëdë u Jesosi?

¹¹ Te i ta seeka iseei u mëni di dëdë u Jesosi, nöö pakisei fundu u dee soni dee Paulosu bi sikifi da dee baaa ku sisa u Kolenti (Lesi 1 Kolenti 11:27-34). A bi taki taa ee wan sëmbë njan di bëëë nasö bebe di win, ma di sëmbë dë an fiti u du dee soni dë, nöö a bi o dë taa a ta sösö „di sinkii u Masa Jesosi di bi dëdë fuu hedi, ku di buuu fëën di a tuwë paka da u”. Ee wan salufuwan ta tja hënseei a wan fasi di na fiti, nöö a ta njan di bëëë nasö a ta bebe di win, hën da a ’ta njan ta bebe ta hai wan sitaafu tja ko nëën seei’. A di ten u Paulosu, sömëni u dee sëmbë u Kolenti bi ta tja deseei a wan fasi di na fiti. A bi sa dë sö taa so u de bi ta njan ta bebe pasa maaka ufö de bi ta ko mëni di dëdë u Jesosi. Nasö de bi ta du ën te de bi ta mëni di dëdë u Jesosi, nöö di soni dë bi ta mbei taa de bi ta djönkö. De bi ta lei taa de an bi ta lesipeki di mëni di de bi ta mëni di dëdë u Jesosi seepiseepi. Nöö fëën mbei Gadu an bi ta feni de bunu te de bi ta njan di bëëë nasö te de bi ta bebe di win.

12. (a) Ku andi Paulosu bi maaka di mëni di u ta mëni di dëdë u Jesosi? Na un soni a bi bai dee sëmbë dee ta njan di bëëë nasö di ta bebe di win? (b) Andi wan sëmbë di ta njan di bëëë nasö di ta bebe di win, musu du ee a du wan gaan zöndu?

¹² Paulosu bi tei di mëni di u ta mëni di dëdë u Jesosi maaka ku di sindo sëmbë ta sindo ta njan makandi. A bi bai dee sëmbë dee ta njan di bëëë, nöö di ta bebe di win, taa: „Wan sa bebe a di kan u Masa taa un nama ku ën te un kaba, nöö un toona go bebe a di kan u dee didibi taa un nama ku de. Söseei wan sa go sindo njan a Masa tafa taa un nama ku ën te un kaba, nöö un toona go sindo njan a dee didibi tafa taa unu ku de nama” (1 Kolenti 10:16-21). Ee wan sëmbë ta njan di bëëë nasö a ta bebe di win, ma a du wan gaan zöndu, nöö a musu go suku heepi a dee gaanwomi u di kemeente (Lesi Jakobosi 5:14-16). Ee sö wan sëmbë lei taa a ta tjali tuutuu u di zöndu di a du, hën da a ta lesipeki di lusupaima u Jesosi te a ta njan di bëëë nasö te a ta bebe di win.​—Lukasi 3:8.

13. Faandi mbei u musu begi u di houpu di Gadu da u?

¹³ U sa seeka useei u mëni di dëdë u Jesosi tu te u ta begi ku te u ta pakisei fundu u di houpu di Gadu da hiniwan fuu apaiti. Nöiti u bi kë lei taa wa ta lesipeki di dëdë di Jesosi dëdë da u. Fëën mbei wa ta njan di bëëë, söseei wa ta bebe di win ee wa dë seiki taa u da wan salufuwan tuutuu. Wë nöö ambë musu ta njan di bëëë nasö ta bebe di win?

AMBË MUSU TA NJAN DI BËËË NASÖ TA BEBE DI WIN?

14. Andi dee salufuwan ta du te u ta mëni di dëdë u Jesosi, u di Gadu mbei di njunjun buka ku de?

¹⁴ Dee sëmbë dee ta njan di bëëë nasö dee ta bebe win te u ta mëni di dëdë u Jesosi, dë seiki taa Gadu bi mbei di njunjun buka ku de. Jesosi bi taki u di win taa: „Di diingi i ta si a di kan aki, nöö hën da di buuu u mi e. Ku ën mi o sitampu di njunjun buka di Masa Gadu mbei ku unu” (1 Kolenti 11:25). Jehovah bi mbei wan buka ku dee Isaëli sëmbë di a bi da de dee wëti fëën. Ma a bi taki taa a bi o mbei wan njunjun buka di bi o tei di dë kamian (Lesi Jelemia 31:31-34). Gadu bi mbei di njunjun buka dë ku dee salufuwan (Galasia 6:15, 16). Di dëdë u Jesosi hën mbei taa di buka aki bi sa mbei (Lukasi 22:20). Jesosi da di Mindima u di njunjun buka aki. Dee salufuwan dee hoi deseei a di njunjun buka di Gadu mbei ku de, o dë ku Jesosi a Gadu Köndë ala.​—Hebelejën 8:6; 9:15.

15. Ku ambë Jesosi mbei buka u tii a di Könuköndë? Un gaandi de o feni ee de hoi deseei a Gadu?

¹⁵ Dee salufuwan sabi tu taa Jesosi bi mbei wan buka ku de u tii a di Könuköndë (Lesi Lukasi 12:32). Jesosi bi mbei di buka aki ku dee salufu bakama fëën dee bi hoi dou, u di de bi nama ku ën „a dee sitaafu dee a bi tja” (Filipi 3:10). Jesosi mbei di buka aki tu ku dee salufuwan u di ten aki dee ta hoi deseei a Gadu. De o dë könu ta tii a liba ala makandi ku Keesitu u teego (Akoalimbo 22:4). De abi di leti u ta njan di bëëë, söseei u ta bebe di win te u ta hoi di Ndeti Njanjan u Masa.

16. Taki kölö sö andi di tëkisi u Loomë 8:15-17 kë taki.

¹⁶ Dee salufuwan dë seiki taa de da miii u Gadu, nöö fëën mbei de sa ta njan di bëëë nasö ta bebe win (Lesi Loomë 8:15-17). Paulosu bi taki taa de ta kai Gadu „Taata [Abba, NW]”. Di Alamëi wöutu „Abba” ta lei taa wan mii lobi hën tata, söseei taa a ta lesipeki dee fasi ën tu. Di wöutu aki ta lei taa dee salufuwan ku Jehovah dë a wan apaiti fasi, söseei taa di jeje u Gadu ’buta de ko mii fëën’. Di jeje u Gadu ta mbei de sabi gbelin taa de da miii fëën di a salufu. Di soni dë an kë taki taa de an kë libi a goonliba. De dë seiki taa ee de hoi deseei a Gadu u te de dëdë, nöö de o toon könu di o tii makandi ku Jesosi a liba ala. Söseei de sabi taa ’Gadu tuwë di jeje fëën a de liba’. A di ten aki wan tu u dee 144.000 mii u Gadu nöö dë a goonliba jeti (1 Johanisi 2:20; Akoalimbo 14:1). De dë sö zuntu ku Jehovah taa de ta kai ën „Abba, Tata!”

TEI DI HOUPU DI BËIBEL DA I U BIGI

17. Un houpu dee salufuwan abi? Unfa de ta du sabi taa de da salufuwan?

¹⁷ Ee ju da wan salufuwan, nöö a dee begi fii joo ta taki u di houpu di i abi u go libi a Gadu Köndë. Nöö so Bëibel tëkisi o ta kai ku i seei. Wë kuma te di Bëibel ta taki taa Jesosi toou ku di „mujëë”, nöö i sabi taa di soni dë nama ku i, nöö i ta wakiti di ten dë tu (Johanisi 3:27-29; 2 Kolenti 11:2; Akoalimbo 21:2, 9-14). Nasö te di Bëibel ta taki unfa Gadu lobi dee salufuwan tjika, nöö i ta sabi taa iseei dë a dendu tu. Söseei te i lesi a di Wöutu u Gadu soni di salufuwan musu du, nöö di santa jeje ta heepi i u du dee soni dë. Di santa jeje u Gadu ta „piki i gbelin” taa di houpu fii da u go libi a Gadu Köndë.

18. Un houpu dee „oto sikafu” abi? Unfa i ta si di houpu aki?

¹⁸ Ee i dë a dee „gaan hia sëmbë” mindi, dee dë „oto sikafu”, nöö Gadu da i di okasi u libi u teego a wan Paladëisi a goonliba (Akoalimbo 7:9; Johanisi 10:16). Unfa i ta fii te i ta pakisei u di ten di dë a i fesi ta ko? Wë a ta da i piizii te i ta pakisei dee soni di di Bëibel ta taki u di Paladëisi di dë a u fesi ta ko. I ta wakiti fii sa libi bööböö a wan goonliba ku dee famii ku dee mati fii. I ta wakiti di ten ka gaan hangi, pena, fuka, siki ku dëdë an o dë möön (Psalöm 37:10, 11, 29; 67:6; 72:7, 16; Jesaaja 33:24). I ta hangi u si di ten ka dee lobiwan fii o weki kumutu a dëdë (Johanisi 5:28, 29). I dë ku tangi a hati seei taa Jehovah da i sö wan waiti houpu! Hii fa ja ta njan di bëëë nasö ja ta bebe di win, tökuseei i nango a di komakandi ka u ta mëni di dëdë u Jesosi, u di i ta tei di lusupaima fëën u bigi.

JOO KO TU Ö?

19, 20. (a) Unfa a du ko taa joo sa libi u teego? (b) Faandi mbei i kë go a di komakandi ka u ta mëni di dëdë u Jesosi?

¹⁹ Te i abi biibi a Jehovah Gadu, a Jesosi Keesitu ku di lusupaima, ufö joo sa libi u teego a liba ala nasö a goonliba aki. Te i nango a di komakandi ka u ta mëni di dëdë u Jesosi, nöö pakisei fundu u di houpu di i abi, söseei faandi mbei di dëdë u Jesosi dë wan gaan soni da i. A feeda 3 u piki-deewei-liba u di jaa 2015 baka te sonu go, nöö milionmilion sëmbë a hii së u goonliba o mëni di dëdë u Jesosi a dee Könuköndë zali, nasö a wan woto kamian.

²⁰ Te u ta seeka u go mëni di dëdë u Jesosi ku di soifi fasi u pakisei, nöö woo dë ku tangi a hati seei da di lusupaima u Jesosi. Te i ta haika bunu te de ta hoi di taki u mëni di dëdë u Jesosi, nöö a o heepi i u lei taa i lobi dee wotowan fii, nöö joo sa konda da de unfa Jehovah lobi u tjika, söseei andi a abi a pakisei da u (Mateosi 22:34-40). Fëën seeka iseei fii sa dë kabakaba u ko tu!