Dee soni dee Mateosi sikifi
19 Di Jesosi taki dee soni aki te a kaba, hën a kumutu a Galilea, hën a go a di së u Judea, di dë a di woto së banda u Joodan lio. 2 Wanlö gaan hia sëmbë waka nëën baka, hën a kula dee sëmbë dee bi dë ku suwaki.
3 Hën dee Faliseima ko nëën u de poobëën luku. De hakisi ën taa: „Wan womi sa booko tööu ku hën mujëë u hiniwan soni hedi ö?” 4 Hën Jesosi piki de taa: „Wan bi lesi a Gadu Buku taa a di bigi Gadu mbei wan womi ku wan mujëë u? 5 Hën a taa: ’Fëën mbei wan womi o go disa hën mama ku hën tata, nöö a go libi ku hën* mujëë, nöö de o ko dë wan sinkii.’ 6 De an o dë tu sinkii möön, ma de o dë wan sinkii. Fëën mbei na wan sëmbë musu paati di soni di Gadu tja ko a wan.” 7 Hën de hakisi ën taa: „Ma nöö faandi mbei Mosesi bi taki taa wan womi musu da hën mujëë wan pampia di ta lei taa an këën möön, söseei taa a booko di tööu?” 8 Hën a piki de taa: „U di un abi taangajesi mbei Mosesi da unu pasi fuun sa booko tööu. Ma na sö soni bi dë a di bigi. 9 Mi taki da unu taa ee wan womi booko tööu ku hën mujëë, ma na libi a libi fanafiti a di së u manu ku mujëë soni,* hën di womi go tööu ku wan woto mujëë, nöö waka di womi dë waka da hën mujëë e.”
10 Hën dee bakama u Jesosi piki ën taa: „Ee sö di libi u wan womi ku wan mujëë musu dë, nöö a möön bëtë u wan sëmbë an tööu.” 11 Hën a piki de taa: „Na hii sëmbë sa fika sö e, ma dee sëmbë dee Gadu da pasi wanwan sa fika sö. 12 So womi an sa tööu u di wan soni du de a de sen kamian. Wotowan an sa tööu u di sëmbë da de makei a de sen kamian. Nöö wotowan ta fika söndö tööu, u di de kë du möön soni da di Tii u Gadu di dë a liba ala. Ee wan sëmbë kë dë söndö tööu, nöö be a dë söndö tööu.”
13 Sëmbë bi kë tja dee mii u de go a Jesosi faa buta maun a de hedi u begi da de. Ma dee bakama fëën gandji da dee sëmbë. 14 Hën Jesosi piki de taa: „Un disa dee mii be de ko a mi, wan tapa de. Biga di Tii u Gadu di dë a liba ala dë da dee sëmbë dee dë kuma dee mii aki.” 15 Hën a buta maun a dee mii hedi, hën a begi da de, hën a kumutu dë.
16 Baka di dë, hën wan kijoo ko a Jesosi, hën a hakisi ën taa: „Mësitë o, un bunu soni mi musu du u mi sa feni di libi u teego?” 17 Hën a piki ën taa: „Faandi mbei i ta hakisi mi andi da bunu soni? Wan kodo sëmbë nöö sa taki andi bunu. Ma ee i kë feni di libi u teego, nöö i musu ta hoi dee wëti u Gadu nöömö.” 18 Hën a piki ën taa: „Undi u de?” Hën Jesosi piki ën taa: „Ja musu kii sëmbë, ja musu waka da di sëmbë di i ku ën tööu, ja musu fufuu, ja musu mindi soni. 19 I musu abi lesipeki da i mama ku i tata, söseei i musu lobi wotowan kumafa i lobi iseei.” 20 Hën di kijoo piki ën taa: „Wë hii dee wëti dë tuu mi ta hoi kaa. Andi mi musu du jeti?” 21 Hën Jesosi piki ën taa: „Wë ee i kë dë bumbuu sëmbë te dou, nöö i musu go sei hii dee gudu dee i abi, nöö i da dee pootima di möni. Te i du sö, nöö joo abi gudu a liba ala. Baka te i du dee soni aki, nöö ko dë wan bakama u mi.” 22 Di di kijoo jei di soni aki, hën a bia go ku tjali nëën hati, biga a bi abi hia gudu. 23 Hën Jesosi bia piki dee bakama fëën taa: „Mi taki e, a o taanga da wan guduma faa go a di Tii u Gadu di dë a liba ala. 24 Mi taki da unu möön e, a möön fukë da di gaan mbeti de kai kamëli faa pasa a wan aguja baaku möön leki fu wan guduma denda go a di Tii u Gadu.”
25 Di dee bakama u Jesosi jei sö, hën a bigi da de te na soni. Hën de hakisi Jesosi taa: „Nöö ambë seei sa feni di libi u teego?” 26 Hën a luku de diiin, hën a piki de taa: „Da libisëmbë di soni aki an kan, ma Gadu sa du hii soni.”
27 Hën Petuisi taa: „Masa, u bi disa hii soni seei ko ta waka a i baka, nöö andi seei woo feni?” 28 Hën Jesosi piki de taa: „Mi taki e, te hii soni ko njunjun baka, te mi di sëmbë di ko dë Libisëmbë Miii o sindo a di waiti könu bangi fëën, nöö unu dee bakama u mi o sindo a tuwalufu könu bangi, nöö woon kuutu dee tuwalufu lö u Isaëli. 29 Nöö hiniwan sëmbë di go disa hën wosu, hën baaa nasö hën sisa, hën tata nasö hën mama, hën mii, nasö dee goon fëën u mi në hedi, o feni dee soni aki wan höndö toon möön hia. Boiti di dë, a o feni di libi u teego.
30 Sömëni sëmbë dee bi dë fosuwan, o ko dë lasiti wan, nöö sömëni u dee lasiti wan o ko dë dee fosuwan.