Mbei möiti go dou fii ko dë wan „njunjun sëmbë di abi njunjun fasi” baka te i dopu

1. Andi ta mbei u ta du dee soni dee u ta du?

ALUWASI ee u dopu wantu daka nöö, nasö aluwasi ee u dopu sömëni jaa longi kaa, tökuseei hii u tuu kë ko dë wan sëmbë di Jehovah lobi. Ma fuu sa ko dë wan sëmbë di Jehovah lobi, nöö u musu tooka di fasi fa u ta pakisei. Faandi mbei u taki sö? Wë u di möön gaanfa di fasi fa u ta pakisei, ta dë u si a dee soni dee u ta du. Ee u ta pakisei hii juu u du soni di hati fuu ta kë, nöö woo ta taki soni nasö du soni di an bunu (Ef. 4:17-19). Ma ee u ta pakisei bunu soni, nöö möön gaanfa woo ta taki soni, söseei woo ta du soni di ta kai ku Jehovah, di Tata fuu.​—Gal. 5:16.

2. Un hakisi woo piki a di woto aki?

² Wë kumafa u bi luku a di woto di pasa, nöö wa sa tapa hii hogi soni u de an ko a u pakisei. Ma tökuseei ee wan soni di an bunu ko a u pakisei, nöö u sa duwengi useei fu wa go du di soni dë. Ufö u dopu, nöö wa musu ta taki soni möön di Jehovah ta buuse, söseei wa musu ta du soni di a ta buuse tu. Dee soni aki da dee fosu soni dee u musu tooka a u libi. Ma fuu sa mbei Jehovah wai ku u tuutuu, nöö u „musu ko dë njunjun sëmbë di abi njunjun fasi” (Kol. 3:10). Wë a di woto aki, woo piki dee hakisi aki: Ambë da wan „njunjun sëmbë”? Unfa u ta ko dë wan njunjun sëmbë di abi njunjun fasi, söseei unfa u sa hoi dee fasi dë go dou?

ANDI DA DI „NJUNJUN SËMBË” DI U MUSU KO DË?

3. Te u luku Galasia 5:22, 23, nöö ambë da wan „njunjun sëmbë di ko abi njunjun fasi”, nöö unfa a ta dë u si a wan sëmbë libi ta a ko dë sö wan sëmbë?

³ Wë di „njunjun sëmbë” di u musu ko dë, nama ku di mbei di u ta mbei möiti fuu djeesi Jehovah a di fasi fa a ta pakisei ku di fasi fa a ta du soni. Sö wan sëmbë o mbei möiti faa ko abi dee fasi di di santa jeje u Gadu ta da sëmbë. Hën da a ta da di santa jeje u Gadu pasi faa tii hën pakisei ku dee soni dee a ta du. (Lesi Galasia 5:22, 23.) Sö wan sëmbë lobi Jehovah ku dee sëmbë fëën (Mat. 22:36-39). A ta dë waiwai go dou, hii fa fuka ta miti ën (Jak. 1:2-4). A ta mbei hii möiti faa sa ta libi fiifii ku wotowan (Mat. 5:9). A abi pasensi ku wotowan, nöö a ta libi bunu ku de tu (Kol. 3:13). A lobi soni di bunu, nöö a ta mbei hii möiti faa ta du soni a wan bunu fasi (Luk. 6:35). Dee soni dee a ta du ta lei taa a ta biibi di Tata fëën di dë a liba ala, gaanfa seei (Jak. 2:18). Hati fëën an ta boonu te wotowan kë feti ku ën, nöö a ta duwengi hënseei te tesi ta miti ën.​—1 Kol. 9:25, 27; Tit. 3:2.

4. Faandi mbei u musu ko abi hii dee fasi dee sikifi a Galasia 5:22, 23 ku woto fasi jeti di sikifi a Bëibel, ee u kë ko dë wan njunjun sëmbë?

⁴ Fuu sa ko dë wan njunjun sëmbë, nöö u musu mbei möiti fuu ko abi hii dee fasi dee sikifi a Galasia 5:22, 23, ku woto fasi jeti di sikifi a woto pisi u di Bëibel.b Faandi mbei u musu mbei möiti fuu ko abi hii dee fasi dë tuu? Wë u di te u abi dee fasi dë, nöö u sa ko abi woto fasi tu. Boo taa i lobi wan sëmbë, nöö an dë u taki taa joo ta hoi pasensi dëën tu, söseei joo ta libi bunu ku ën. Nöö ee i dë wan sëmbë di ta mbei möiti u libi bunu ku wotowan, nöö joo abi saapifasi, söseei joo ta duwengi iseei.

UNFA U SA KO DË WAN NJUNJUN SËMBË DI ABI NJUNJUN FASI?

5. Andi a kë taki taa u musu ko ta pakisei kumafa ’Keesitu ta pakisei’, nöö faandi mbei u musu ko sabi soni u di libi u Jesosi? (1 Kolenti 2:16)

⁵ Lesi 1 Kolenti 2:16. Fuu sa ko dë wan njunjun sëmbë, nöö u musu ko dë wan sëmbë di ta pakisei kumafa ’Keesitu ta pakisei’. Hën da u musu mbei möiti fuu ko sabi unfa a ta pakisei, nöö u djeesi ën. Jesosi ta lei taa a abi dee fasi di di santa jeje u Gadu ta mbei sëmbë ko abi. A ta djeesi Jehovah te dou, a dee fasi dee a abi (Heb. 1:3). Möön woo ko ta pakisei kuma Jesosi, möön woo kë ta du soni kuma hën. Söseei woo sa djeesi ën möön bunu a dee fasi dee a abi.​—Fil. 2:5.

6. Andi u musu hoi a pakisei te u ta mbei möiti fuu ko dë wan njunjun sëmbë?

⁶ U sa djeesi Jesosi tuutuu ö? Kandë u sa ta pakisei taa: ’Jesosi an abi zöndu. Nöö nöiti mi o sa dë kuma hën!’ Ee sö i ta pakisei, nöö buta pakisei a dee soni aki. Di fosu soni, hën da Jehovah mbei i a sö wan fasi taa i sa djeesi hën ku Jesosi. Hii fa ja o sa djeesi de te dou, tökuseei i sa mbei möiti fii ko dë kuma de (Ken. 1:26). Di u tu soni, hën da di santa jeje u Gadu da di möön taanga soni u hii di mundu. Di santa jeje sa heepi i fii du soni di ja bi o sa du iseei. Di u dii soni, hën da nöunöu aki, Jehovah an ta suku fuu ko abi dee fasi di di santa jeje ta mbei sëmbë ko abi te dou. Fuu taki ën, nöö di Tata fuu o da dee dinima fëën dee o libi a goonliba aki 1000 jaa, u de ko dë söndö föutu (Ako. 20:1-3). Di soni di Jehovah kë fuu du a di ten aki, hën da fuu ta mbei hii möiti di u sa mbei fuu ko abi dee fasi aki, söseei a kë fuu abi di futoou taa a o heepi u.

7. Andi woo luku nöunöu?

⁷ Na un fasi u sa djeesi Jesosi? Wë woo taki u fö fasi di di santa jeje u Gadu ta mbei sëmbë ko abi. Te woo luku dee fasi aki, nöö u kë buta pakisei a di fasi fa Jesosi bi lei taa a abi hiniwan u dee fasi aki. Woo luku wantu hakisi tu di o heepi u fuu ko si unfa u ta mbei möiti tjika fuu ko dë wan njunjun sëmbë di abi njunjun fasi.

8. Unfa Jesosi bi lei taa a lo’ sëmbë?

⁸ U di Jesosi bi lobi Jehovah gaanfa seei, mbei a bi du soni da Jehovah ku libisëmbë tuu (Joh. 14:31; 15:13). Di fasi fa Jesosi bi libi a goonliba aki, bi lei unfa a lobi libisëmbë tjika. Hiniwan daka a bi ta lei fa a lobi sëmbë tjika, ku fa a ta fii ku sëmbë tjika. A bi ta du di soni aki aluwasi sëmbë bi ta du ku ën. Di fasi fa a bi ta möön lei sëmbë taa a lobi de, hën da te a bi ta lei de soni u di Könuköndë u Gadu (Luk. 4:43, 44). Jesosi bi lei taa a lobi Gadu ku libisëmbë tuu, di a bi dë kabakaba u tja sitaafu u te de kii ën. Di soni di a du dë, jabi pasi da hii u tuu fuu sa feni di libi u teego.

9. Unfa u sa ko ta lobi wotowan kuma Jesosi?

⁹ U buta u libi a Jehovah maun, hën u dopu, u di u lobi di Tata fuu di dë a liba ala. Fëën mbei leti kuma Jesosi, useei musu lei taa u lobi Jehovah tu, u di woo ta libi bunu ku wotowan. Apösutu Johanisi bi taki taa: „Di sëmbë i ta si ku i wojo mii dë hën ja lobi, nöö unfa i sa lobi Gadu di ja si ku wojo wan daka?” (1 Joh. 4:20) U sa hakisi useei dee soni aki: ’Mi mbei möiti u mi ko ta lobi sëmbë ku hii mi hati ö? Mi ta fii ku sëmbë aluwasi de abi manii di an bunu ö? Mi ta tei mi ten ku dee soni dee mi abi, u mi heepi wotowan u de ko sabi soni u Jehovah u di mi lobi de u? Mi ta dë kabakaba u du di soni aki, aluwasi gaansë u sëmbë an ta tei dee soni dee mi ta du u bigi, nasö aluwasi de ta du ku mi ö? Mi sa feni wan fasi fa mi sa wooko ku di ten u mi u du di peleikiwooko möön gaanfa u?’​—Ef. 5:15, 16.

10. Faandi mbei u sa taki taa Jesosi bi ta libi fiifii ku wotowan?

¹⁰ Jesosi bi dë wan sëmbë di bi ta libi fiifii ku wotowan. Te sëmbë bi ta libi hogi ku ën, nöö an bi ta toona libi hogi ku de baka. Ma na di dë nöö, hën bi ta mbei möiti u seeka soni sö taa a bi sa libi fiifii ku wotowan hii juu, söseei a bi ta da sëmbë di bi kisi toobi ku deseei taanga u de toona ko ta libi fiifii ku deseei baka. Jesosi bi ta lei sëmbë taa ee de bi kë u Jehovah feni di dini di de ta dini ën u bunu, nöö te de ku de baaa nasö de sisa abi wan toobi, nöö de bi musu seekëën (Mat. 5:9, 23, 24). A bi ta heepi dee apösutu fëën tu u de an ta mbei toobi ku deseei möön ta luku undi u de hei möön dee wotowan.​—Luk. 9:46-48; 22:24-27.

11. Unfa u sa lei taa u dë wan sëmbë di lobi fiifii libi?

¹¹ Ee u kë ta libi fiifii ku wotowan, nöö na köni nöö u musu ta köni fuu ku wotowan an kisi toobi. Ma u musu mbei hii möiti u seeka soni sö taa u sa ta libi fiifii ku wotowan hii juu, söseei u musu da dee baaa ku dee sisa fuu taanga u seeka soni u de ko dë bunu ku deseei baka, ee de bi abi wan toobi (Fil. 4:2, 3; Jak. 3:17, 18). U sa hakisi useei dee soni aki: ’Mi dë kabakaba u mbei hii möiti di mi sa mbei u mi ku wotowan ko ta libi fiifii ö? Mi ta hoi dee baaa ku dee sisa u mi a bëë te de taki wan soni nasö te de du wan soni di hati mi ö? Te mi ku wan sëmbë kisi toobi, mi ta wakiti u di wotowan fosu hën musu ko seeka di toobi ö, naa mi fosu nango seeka di taki aluwasi ee mi ta si kuma hën suku di toobi? Te sëmbë ku sëmbë abi toobi, mi ta da de taanga u de seeka di taki sö taa de sa ko ta libi fiifii ku deseei baka u?’

12. Na un fasi Jesosi bi lei taa a abi bunu fasi?

¹² Jesosi bi abi bunu fasi (Mat. 11:28-30). A bi lei taa a abi bunu fasi aluwasi soni bi ta taanga dëën, söseei an bi ta suku fini a soni poi. Fëën mbei di wan mujëë u Finisia bi begi ën faa kula di mii fëën dëën, nöö bigibigi an bi du di soni di di mujëë aki bi hakisi ën, ma u di di mujëë bi lei taa a abi biibi, mbei a bi kula di mii fëën dëën (Mat. 15:22-28). Hii fa Jesosi bi abi bunu fasi, tökuseei a bi ta bai wotowan a soni te a bi dë fanöudu. U di a bi lobi wotowan mbei so juu a bi ta bai de a soni. Di Petuisi bi suku u tapëën fu an du soni kumafa Jehovah kë, hën Jesosi bi bai ën a dee woto bakama fëën fesi (Maik. 8:32, 33). Jesosi an bi du di soni aki u da Petuisi sen, ma a bi du ën u lei Petuisi ku dee woto bakama fëën taa de musu pakisei soni bunu ufö de taki wan soni. A musu u dë sö taa Petuisi bi fii wan fasi, ma tökuseei a bi feni wini u di leti di Jesosi bi leti ën buta a pasi.

13. Unfa u sa lei taa u abi bunu fasi tuutuu?

¹³ So juu te u kë lei taa u lobi wotowan, nöö a ta dë fanöudu fuu leti de buta a pasi. Te joo leti wan sëmbë buta pasi, nöö i musu wooko ku dee mama wëti u Bëibel, kumafa Jesosi bi ta du ën. Na fan goofu ku wotowan. I musu abi di futoou taa de kë du soni a wan bunu fasi, nöö i musu biibi taa ee wan sëmbë lobi Jehovah, söseei ee a lobi i tu, nöö a o haika i te i fan ku ën. Hakisi iseei dee soni aki: ’Mi abi di degihati u go fan ku wan sëmbë di mi lobi te a ta du wan soni di an bunu ö? Te mi go fan ku ën, mi ta fan a wan lesipeki fasi ö, naa mi ta fan goofu? Faandi mbei mi kë go fan ku ën? Mi kë fan ku ën u di hati u mi boonu ku ën u, naa u di mi kë heepi ën?’

14. Unfa Jesosi bi lei taa a abi bunuhati?

¹⁴ Jesosi an ta sabi andi bunu nöö a kaba, ma a ta du bunu soni tu. Jesosi lobi hën Tata. Fëën mbei hii juu a ta du bunu soni ku hii hën hati. U ta si taa wan sëmbë abi bunuhati te a ta du soni di ta tja wini ko da wotowan. Na sabi nöö u musu sabi andi bunu, ma u musu ta du bunu soni tu, söseei u musu ta du soni ku wan limbohati. Wë kandë wan sëmbë sa hakisi hënseei ee wan sëmbë sa du wan bunu soni ku wan taku pakisei. Wë aai, a sa dë sö. Jesosi bi taki soni u sëmbë di ta da pooti sëmbë soni, ma de bi ta du ën u sëmbë musu si de. Hii fa de bi ta du bunu soni, tökuseei Jehovah an bi wai ku dee soni di de bi ta du.​—Mat. 6:1-4.

15. Unfa u sa ko dë wan sëmbë di ta du bunu soni?

¹⁵ U sa dë wan sëmbë di ta du bunu soni te u ta du soni ku wan limbohati. I sa hakisi iseei dee soni aki: ’Sabi nöö mi sabi andi bunu ö, naa mi ta du ën tu? Andi ta mbei mi ta du bunu soni?’

ANDI U MUSU DU FU WA LASI DEE NJUNJUN FASI DEE U KO ABI?

16. Andi u musu du hiniwan daka, nöö faandi mbei?

¹⁶ Wa musu si kuma te u dopu, nöö hën da u ko dë wan njunjun sëmbë di abi njunjun fasi kaa. U musu ta mbei möiti u abi dee njunjun fasi aki go dou. Wan fasi fa u sa du di soni aki, hën da te u ta suku fasi hiniwan daka u lei taa u abi dee fasi di di jeje u Gadu ta mbei sëmbë ko abi. Faandi mbei u musu du di soni aki? Wë u di Jehovah da wan Gadu di an ta dë piii, ma a ta wooko ku di jeje fëën u du soni (Ken. 1:2). Fëën mbei hiniwan u dee fasi di di jeje ta mbei sëmbë ko abi, musu mbei u hopo du soni. Jakobosi bi taki taa: „Biibi ku buka söndö du aan wan wojo heepi” (Jak. 2:26). Sö nöö a dë da hii dee woto fasi di di jeje u Gadu ta mbei sëmbë ko abi. Hiniwan pasi te u ta lei taa u abi dee fasi aki, nöö u ta lei taa di jeje u Gadu ta heepi u.

17. Andi u musu du ee a ko pasa taa wa lei taa u abi dee njunjun fasi di Keesitu sëmbë musu abi?

¹⁷ So juu a sa pasa taa Keesitu sëmbë di dopu sömëni jaa kaa an ta lei taa de abi dee njunjun fasi di Keesitu sëmbë musu abi. Ma di möön fanöudu soni, hën da u musu du hii soni di u sa du u lei taa u abi dee fasi aki. Buta pakisei a di woto aki. Boo taa i abi wan koosu fii di i lobi gaanfa seei, nöö hën a tënë. I bi o tuwëën wantewante u? Wë nönö. Joo pooba u seekëën, nöö joo ta köni fu an tënë möön. Wë ee a ko pasa taa ja lei taa i abi pasensi ku wan sëmbë, nasö taa ja lei taa i lobi ën, nöö ja musu lasi hati. I sa hakisi di sëmbë faa da i paadon, sö taa i ku ën sa libi bunu ku unuseei go dou. Nöö mbei möiti fii du soni a wan möön bunu fasi.

18. Fuun soni u sa dë seiki?

¹⁸ U ta wai taa u sa lei soni a Jesosi, u di a bi lei taa a abi dee fasi di di jeje u Gadu ta da sëmbë! Möön u ta djeesi Jesosi a di fasi fa a bi ta pakisei ku di fasi fa a bi ta du soni, möön woo sa du soni kuma hën. Nöö möön u ta du soni kuma hën, möön woo sa ko abi dee njunjun fasi dee Keesitu sëmbë musu abi. A di woto aki, u bi taki u fö u dee fasi di di jeje u Gadu ta mbei sëmbë ko abi. A bi o bunu fii tei ten u lei soni u dee woto fasi di di jeje u Gadu ta mbei sëmbë ko abi, söseei a bi o bunu fii luku ee i abi dee fasi dë. Joo sa feni soni di ta taki u dee fasi aki a di buku Ondrosuku Bijbel moro fini​—Gi Yehovah Kotoigi. Go a „Tori”, nöö i go a di pisi „Kresten fasi fu libi”, nöö i go a „Den fasi fu a yeye”. I sa dë seiki taa ee i mbei möiti fii ko abi dee njunjun fasi di Keesitu sëmbë musu abi, nöö Jehovah o heepi i fii ko abi de, söseei a o heepi i fu ja lasi de.