Tei hii okasi dee i ta feni u paaja di Könuköndë bosikopu!

1. Andi u sa lei u Dafiti?

¹ Könu Dafiti bi dë wan sëmbë di an bi ta mbei na wan soni tapa ën u du dee soni dee a bi kë du. Dafiti bi kë mbei wan wosu da Jehovah. Di Jehovah an bi kë taa hën musu mbei ën, hën a bi tooka di maaka fëën dë, hën a bi seeka soni u heepi di womi mii fëën Salumon u mbei di wosu u Gadu (1 Kön. 8:17-19; 1 Klon. 29:3-9). Ka faa bi go dë ta buta pakisei a dee soni dee an bi sa du, a bi buta pakisei a soni di a bi sa du. Unfa u sa djeesi Dafiti te u ta suku fasi u paaja di Könuköndë bosikopu?

2. Andi u sa öndösuku luku?

² Du andi i sa du: Sömëni baaa ku sisa tooka soni a de libi u sa toon heepi pionili nasö kowoonu pionili (Mat. 6:22). I sa du ën tu ö? Begi u di soni aki, nöö öndösuku luku ee joo sa, kandë joo ko si taa ’wooko dë te a hia’ di i sa du. Ee a dë sö, tei di okasi dë u du ën!​—1 Kol. 16:8, 9.

3. Na un okasi u sa peleiki da sëmbë, aluwasi wa sa pionili?

³ Ma andi i sa du ee i ko si taa ja sa pionili? Na fëëkëtë taa woto soni dë di i sa du. Ee i ta miti sëmbë a di kamian ka i ta wooko di an ta dini Jehovah, nöö faandi mbei ja ta tei di okasi dë u peleiki da de? Nasö kandë i musu nango a data hii juu u di gösöntu fii an dë sö bunu. I bi o sa tei di okasi dë u peleiki da dee data u? Hoi a pakisei taa wan seti dë da dee sëmbë dee an sa du sö hia a di peleikiwooko möön, u di de ko gaandi nasö ta siki. Aluwasi 15 miniti nöö de wooko, de sa sikifi ën a di peleikiwooko pampia u de. Te joo sikifi un mëni juu i wooko a kaba u di liba, nöö na fëëkëtë u sikifi dee juu u dee okasi dee i bi feni u peleiki da sëmbë. Söseei i musu sikifi dee soni dee i bi paati. Soni kuma buku, talakitaati, di kai u mëni di dëdë u Jesosi, ku di kai u di könklësi. Joo fööndö seei u si di juu di i wooko u di i bi ta peleiki a hii pikipiki okasi!

4. Andi i dë kabakaba u du?

⁴ Aluwasi u sa pionili nasö wa sa, boo tei hii okasi di u feni u paaja di bunu buka. Di soni dë o mbei u ta piizii u di u sabi taa u ta du hii soni di u sa du, u di Könuköndë hedi.​—Maik. 14:8; Luk. 21:2-4.