„Mi kiija a wan piki köndë a bausë u Siela Leonu”, sö Dauda bi taki. „Di mi bi dë piki womi mii jeti mi famii ku wan woto famii bi a’ wan gaan toobi. De bi ta buja u wan pisi goon. Hiniwan u de bi feni taa de bi a’ di goon. Hën de kai wan bonuma u ko koti di taki. Di bonuma da wan womi wan sipei, hën a tuwë wan weti koosu tapa di womi. Te wan pisi hën di womi bigi ta tëëmë tjatjatjatja ta suwa a di koosu basu. Di a luku di sipei, hën a bai taa: ’Mi ta si wan gaan womi ta waka ta ko! A bisi weti koosu faan. A langa nöö a gaandi, uwii fëën weti, nöö a ta waka bendibendi pikisö.’

Mi tata tata wë a bi si dë! Hën a bigi ta du soni fanjanfanjan ta bai kai wolo taa: ’Ee wan ta biibi andi mi ta taki, nöö unu seei ko luku!’ Ma na wan fuu bi a’ hati u go luku! Hën di obiama makisa uwii ku wata a wan kuja dendu mbei wan deesi, hën a lëmbë di womi hën di womi kabuka ko dë fëën pii.

Hën mi avo piki di womi ku di sipei taa di goon da u di famii fuu. Hën di womi piki mi tata mama taa be a wooko di goon fëën waiwai. Di woto famii tei di taki. Hën di taki koti.”

Dee lö soni aki ta pasa hia a sömëni köndë. Milionmilion sëmbë ta biibi taa dee dëdë sëmbë nango libi a wan woto kamian teka de sa si dee libilibi wan nöö de sa abi kaakiti a de libi. Sö a dë tuutuu ö? Dee dëdë sëmbë ta libi tuutuu ö? Ee de an ta libi möön, nöö ambë ta du kuma de da dee dëdë sëmbë? A dë taanga fanöudu u ko sabi dee bumbuu piki u dee hakisi aki. A dë wan soni u dëdë ku libi.

Jeje dë tuutuu! Bumbuu jeje ku taku jeje tuu dë. A dë sö taa dee sëmbë dee bi libi a goonliba aki de ta toon jeje baka te de dëdë u?

Nönö na de e. Te wan sëmbë dëdë, nöö an abi wan akaa di nango libi a wan woto kamian kumafa sömëni sëmbë ta pakisei. Unfa u du sabi sö? Wë u di di Bëibel ta taki sö. Di Bëibel da wan buku di ta konda tuutuu soni u di wan kodo tuutuu Gadu, di de ta kai Jehovah. Jehovah hën mbei libisëmbë, nöö a sabi bumbuu andi ta pasa ku de te de dëdë.​—Psalöm 83:18; 2 Timoteo 3:16.

Di Bëibel ta taki taa Gadu bi tei „di goondoti” mbei di fosu womi Adam (Kenesesi 2:7). Gadu bi butëën a di Paladëisi de ta kai di djai u Eden. Ee Adam bi hoi di wëti u Jehovah, an bi o dëdë, ma a bi o dë a libi tide jeti. Ma di Adam booko di wëti u Gadu ku hënseei kë, hën Gadu piki ën taa: „[Joo] toona go baka a goondoti, biga a doti i bi kumutu. Doti mi bi tei mbei i, nöö a goondoti joo toona go baka.”​–Kenesesi 3:19.

Andi di soni aki kë taki? Wë naasë Adam bi dë bifö Jehovah bi tei doti mbei ën? An bi dë a mundu. An bi dë wan jeje a Gadu a liba ala. Hën da di Jehovah bi taki taa Adam bi o „toona go baka a goondoti”, nöö dëdë wë Adam bi o dëdë. An bi abi wan akaa di bi o go libi a wan woto kamian. Di Adam dëdë, an bi a’ libi möön, hën da soni fëën bi kaba a mundu. Te wan sëmbë dëdë, hën da aan libi möön.

Ma unfa a dë ku dee woto sëmbë dee dëdë? Soni u de kaba a mundu tu ö? Di Bëibel taa:

• „Hii de tuu [hën da libisëmbë ku mbeti] nango a di wan seei kamian. A doti de tuu kumutu, nöö de tuu ta toona go a doti baka.”​—Pleikima 3:20.

• „Dee dëdë sëmbë an sabi na wan hojo soni.”​—Pleikima 9:5.

• „De an sa lobi sëmbë, de an sa buuse sëmbë, nöö de an sa haun ku sëmbë tu.”​—Pleikima 9:6.

• „A geebi, di kamian teka joo go, sëmbë an sa wooko, de an sa pakisei soni, de an sabi na wan soni, de an abi na wan köni tu.”​—Pleikima 9:10.

• „[Libisëmbë] nango baka a goondoti. A di seei daka dë pakisei fëën ta kaba fiaa.”​—Psalöm 146:4.

Dee Bëibel tëkisi aki taanga da i u biibi ö? Ee de taanga da i, nöö buta mëni a di woto aki: A sömëni wosudendu, di tata hën ta wooko u feni möni u sölugu dee sëmbë fëën. Te di tata dëdë, nöö so juu di mujëë ku dee mii ta pena seei. So toon di mujëë ku dee mii an ta abi möni tjika u bai soni u njan. Söseei a sa dë taa sëmbë di an bi lobi di tata ta du hogi ku de. Wë kai pakisei luku i si: ’Ee di tata dë abi wan akaa di ta libi go dou a wan woto kamian, nöö faandi mbei an ta sölugu hën wosudendu go dou? Faandi mbei an ta tjubi dee sëmbë fëën wosudendu u sëmbë an du hogi ku de?’ Wë u di dee soni dee Bëibel tëkisi aki ta taki dë tuu. Di tata dë aan libi möön, an sa du na wan wojo soni möön.​—Psalöm 115:17.

Di soni aki kë taki taa dee dëdë sëmbë an o toona ko a libi möön u? Wë nönö. Bakaten woo taki u di weki sëmbë o toona weki baka. Ma a kë taki taa dee dëdë sëmbë an saandi i ta du. De an sa si i, de an sa jei i nasö fan ku i. Ja a’ fu fëëë de. De an sa heepi i, nöö de an sa du hogi ku i tu.​—Pleikima 9:4; Jesaaja 26:14.