Gadu dë kuma wan lobihati tata. 1 Petuisi 5:6, 7

Gadu hën da di Sëmbë di mbei u, nöö a ta booko hën hedi ku u. Leti kumafa wan köni tata di lobi dee mii fëën ta lei de soni, sö nöö Gadu ta lei sëmbë u hii së u goonliba andi da di möön bunu fasi u libi.

Gadu ta mbei u ko sabi di tuutuu lei di ta da u piizii ku houpu.

Ee i haika Gadu, nöö a o lei i fa i musu libi, a o tjubi i, nöö a o heepi i ku dee fuka fii.

Ma na di dë nöö. Joo libi u teego!

Gadu ta piki u taa: „Un ko a mi. Un haika, nöö woon libi.” Jesaaja 55:3

Ku di Bëibel Gadu ta fan ku u. 2 Timoteo 3:16

Di tuutuu Gadu bi mbei sëmbë sikifi dee pakisei fëën buta a wan santa buku. Di buku dë da di Bëibel. Fanöudu soni dë nëën dendu di Gadu kë taa i musu ko sabi.

Gadu sabi andi möön bunu da u, nöö nëën hii köni ta kumutu. Te i ta haikëën, nöö joo ko köni tuutuu.​—Nöngö 1:5.

Gadu kë taa hii sëmbë u goonliba lesi di Bëibel. A dë u feni nöunöu a sömëni töngö.

Ee i kë haika Gadu, i musu lesi Bëibel, nöö i musu fusutëën tu.

A hii kamian sëmbë ta haika. Mateosi 28:19

Dee Jehovah Kotoigi sa heepi i fii fusutan di Bëibel.

A hii di goonliba de ta lei sëmbë ambë Gadu dë tuutuu.

Ja a’ fu paka de u di lei dë. I sa lei soni u Gadu tu a di kamian ka dee Jehovah Kotoigi ta ko makandi a di pisiwata ka i ta libi.

Wan kodo tuutuu Gadu nöö dë, nöö hën në da Jehovah (Psalöm 83:18). A dë wan jeje, nöö wa sa si ën ku wojo. A lobi u, nöö a kë taa u musu lobi ën tu. A kë söseei taa u musu lobi woto sëmbë tu (Mateosi 22:35-40). Hën da di Kaba Heiwan u mundu, di Gadu di mbei hii soni.

Di fosu soni Gadu mbei bi dë wan makiti jeje tu, di u ko sabi bakaten kuma Jesosi Keesitu. Söseei Jehovah bi mbei dee engel tu.

Jehovah mbei hii soni a hemel . . . ku goonliba. Akoalimbo 4:11

Jehovah Gadu mbei dee teeja, ku söseei di goonliba ku hii soni di dë nëën.​—Kenesesi 1:1.

A bi tei di goondoti mbei di fosu womi, Adam.​—Kenesesi 2:7.