Jehovah bi da Adam ku Eva sömëni bunu soni. Kenesesi 1:28

Jehovah mbei di fosu mujëë, Eva, hën a tjëën go da Adam u dë mujëë fëën.​—Kenesesi 2:21, 22.

Jehovah bi mbei de ku telutelu fusutan ku telutelu sinkii di na bi abi föutu.

Di tankamian u de bi dë di Paladëisi de kai di djai u Eden. A bi dë wan gaan hanse kamian di bi abi wan lio, fuuta pau ku mbeti.

Jehovah bi ta fan ku de, nöö a bi ta lei de soni. Ee de bi haikëën, de bi o libi u teego a di Paladëisi a goonliba.

Gadu bi taki taa de an musu njan di fuuta u wan u dee pau. Kenesesi 2:16, 17

Wan u dee engel bi hopo fia ku Gadu. Di hogi engel dë da Saatan Didibi.

Jehovah bi lei Adam ku Eva wan fuuta pau u di djai, hën a piki de taa ee de njan di fuuta fëën de bi o dëdë.

Saatan an bi kë taa Adam ku Eva piki Jehovah buka. Fëën mbei a tei wan sindeki ko piki Eva taa ee a njan di fuuta u di pau dë, an bi o dëdë ma a bi o ko dë kuma Gadu. Ma ganjan wë a bi ta ganjëën e.​—Kenesesi 3:1-5.

Adam ku Eva an bi haika Gadu, nöö fëën mbei de dëdë. Kenesesi 3:6, 23

Eva haika di sindeki, hën a njan di fuuta. Baka u di dë, a da Adam, hën a njan tu.

Di soni de bi du dë bi hogi seei. A bi dë wan zöndu. Gadu bi jaka de puu a di Paladëisi.

Di libi bi ko taanga da de ku dee mii u de. De bi ko gaandi, hën de dëdë. De an bi go a wan jeje köndë. Soni u de bi kaba a mundu.

Dee dëdë sëmbë an dë ku libi leti kumafa doti an ta libi. Kenesesi 3:19

U ta dëdë biga hii u tuu da bakamii u Adam ku Eva. Dee dëdë sëmbë an sa si soni, de an sa jei soni nasö du soni.​—Pleikima 9:5, 10.

Jehovah an bi kë taa sëmbë bi musu ta dëdë. Abiti möön a o toona weki dee dëdë sëmbë baka. Ee de piki ën buka, nöö de o libi u teego.