Unfa joo seeka iseei da di mëni di woo mëni di dëdë u Jesosi?

A di jaa aki woo abi möön ten u seeka da di mëni di woo mëni di dëdë u Jesosi. Ee a ko dë sö taa di mëni di woo mëni di dëdë u Jesosi o kai a mindi wiki, nöö wa o abi Di libi ku di diniwooko fuu komakandi di wiki dë. Ee a o kai a wan sata nasö wan sonde, nöö wa o abi komakandi a di daka dë tu. Joo sa wooko ku di ten di joo feni a wan bunu fasi ö? Leti kumafa dee fesiten Keesitu sëmbë bi ta seeka hii soni a fesi da di daka dë, sö nöö useei musu ta du ën tu (Lu 22:7-13; km 3/15 bld. 1). Ma hii u tuu musu seeka u hati da di daka dë. Unfa u sa du di soni aki?

• Go pakisei fundu faandi mbei u musu go a di komakandi aki.​—1Ko 11:23-26

• Begi, söseei pakisei unfa di matifasi fii ku Jehovah dë.​—1Ko 11:27-29; 2Ko 13:5

• Lesi dee pisi dee dë a di Bëibel, dee ta taki andi di mëni di woo mëni di dëdë u Jesosi kë taki, nöö pakisei fundu u de.​—Jo 3:16; 15:13

So u dee peleikima ta lesi dee pisi u Bëibel di nama ku di dëdë u Jesosi dee dë a di brochure Öndösuku Gadu Wöutu hiniwan daka, nöö de ta pakisei fundu u de. Wotowan ta lesi dee tëkisi u di skeima di dë a di kaita a basu aki. Wotowan ta luku dee woto dee dë a dee Hei Wakitimawosu di ta taki soni u di dëdë u Jesosi, ku di lei di Jehovah ku Jesosi lei taa de lobi u. Aluwasi un soni joo tei u seeka iseei da di mëni di woo mëni di dëdë u Jesosi, tökuseei be a mbei i ku Jehovah ku Jesosi ko dë möön gaan mati.