WOTO 18

Be dee haikama fii taa de lei wan soni

1 Kolenti 9:19-23

DI SONI DI I MUSU DU: Konda wan woto da dee haikama di o mbei de go pakisei fëën, söseei di o mbei de fii taa de lei wan bunu soni.

Pakisei andi dee haikama fii sabi kaa. Ka fii toona taki u wan soni di de bi jei kaa, nöö heepi de u si di woto a wan hii woto fasi di de an bi sabi jeti.

Ee joo taki u wan woto di dee sëmbë sabi kaa, nöö taki hesihesi fëën, ma te joo taki u wan soni di de an sabi jeti, nöö na taki hesihesi fëën.
Öndösuku soni, nöö pakisei fundu u de. Ee a sa, nöö taki u soni di de an bi sabi jeti nasö u soni di pasa, u tja wan fanöudu pisi u di taki fii ko a fesi. Pakisei fundu unfa dee soni dee joo taki ta kai ku dee soni dee i kë konda da de, di de an sabi jeti.

Te i ta seeka di taki fii, nöö pakisei u dee hakisi aki: Faandi mbei di soni aki dë sö tuutuu? Unfa mi sa lei de taa a dë sö tuutuu? Andi ta mbei a taanga da sëmbë u biibi di soni aki? Na un ten di soni aki pasa? Unfa u sa du di soni aki a u libi? Ee i ta buta dee lö hakisi aki, söseei ee i ta piki de te i ta hoi di taki fii, nöö a o mbei sëmbë kë sabi möön soni.
Be dee haikama si unfa dee soni dee i ta taki sa heepi de. Konda da dee haikama unfa dee soni dee sikifi a di Bëibel sa heepi de a de libi. Taki u soni di pasa, u soni di sëmbë ta pakisei, söseei u soni di sëmbë du, di sa heepi dee haikama.