Joo feni sömëni gaan bunu te i dopu!

Jesosi bi taki taa ee wan sëmbë kë ko dë wan bakama fëën, nöö a musu dopu. (Lesi Mateosi 28:19, 20.) Ma andi da dopu? Nöö andi wan sëmbë musu du faa sa dopu?

1. Andi da dopu?

De tei di wöutu „dopu” puu a wan Giiki wöutu di kë taki „doki”. Di Jesosi bi dopu a di Joodan Lio, nöö hii ën sinkii tuu de bi saka go a basuwata, hën baka di dë, hën de toona „hopo ën ko a liba wata” (Maikusi 1:9, 10). A di wan seei fasi de ta dopu tuutuu Keesitu sëmbë a di ten aki. De ta saka hii de sinkii go a basuwata, nöö de toona hopo de ko a liba wata baka.

2. Andi wan sëmbë ta mbei wotowan ko sabi te a dopu?

Te wan sëmbë dopu, nöö a ta lei taa a buta hën libi a Jehovah maun. Unfa wan sëmbë ta buta hën libi a Jehovah maun? Ufö a dopu, a ta begi Jehovah, nöö a piki ën taa a kë dini ën u teego. A ta paamusi Jehovah taa hën wanwan nöö a o ta dini, söseei taa di kë u Jehovah hën o dë di möön fanöudu soni nëën libi. Sö wan sëmbë o ’disa di soni di hënseei kë, nöö . . . a o ta waka nöömö’ a Jesosi baka, söseei a o ta du dee soni dee Jesosi lei u (Mateosi 16:24). Di buta di a buta hën libi a Jehovah maun, ku di dopu di a dopu, o mbei hën ku Jehovah ku dee woto baaa ku sisa a di biibi o ko dë gaan mati.

3. Andi wan sëmbë musu du faa sa dopu?

Ee i kë dopu, nöö i musu lei soni u Jehovah, söseei i musu ko ta biibi ën möön gaanfa. (Lesi Hebelejën 11:6.) Te i ta ko sabi möön soni u Jehovah, söseei te di biibi fii ta ko möön taanga, nöö möön joo ko lobi ën. Nöö an dë u taki, joo kë konda soni fëën da sëmbë, söseei joo kë libi kumafa dee wëti fëën ta taki (2 Timoteo 4:2; 1 Johanisi 5:3). Te wan sëmbë ta „libi a di fasi di Jehovah feni bunu”, nöö a o kë buta hën libi a Jehovah maun, nöö a dopu.​—Kolosën 1:9, 10.a

WOTO SONI DI I SA LEI

4. U sa lei wan soni a di fasi fa Jesosi bi dopu

Lesi Mateosi 3:13-17, fii ko sabi möön soni u di dopu u Jesosi, nöö piki dee hakisi aki:

• Jesosi bi dë wan piki mii di a dopu ö?

• Unfa de bi dopu ën? De bi tjatja wata nëën hedi ö?

Jesosi bi bigi du di apaiti wooko di Gadu bi dëën faa du a goonliba aki, baka di a dopu. Lesi Lukasi 3:21-23 ku Johanisi 6:38, nöö piki di hakisi aki:

• Un wooko Jesosi bi buta a di fosu kamian nëën libi, baka di a dopu?

5. Joo sa dopu

I sa ta fëëë te i pakisei di buta di i musu buta i libi a Gadu maun, nöö i dopu. A sa djei wan gaan soni da i. Ma i sa mbei möiti go a fesi a di biibi, u te kuma i fii taa a dou juu fii dopu. Ee i kë si unfa so sëmbë bi du di soni aki, nöö pëë di fëlön.

FËLÖN: Ko dë mati ku Jehovah (1:11)

Lesi Johanisi 17:3 ku Jakobosi 1:5, nöö piki di hakisi aki:

• Andi sa heepi wan sëmbë faa sa kë dopu?

1. U ta buta u libi a Jehovah maun te u ta konda dëën taa u kë dini ën u teego

2. Te u ta dopu, nöö u ta lei lanti taa u buta u libi a Gadu maun

6. Te u dopu, nöö u ta ko dë sëmbë u di wosudendu u Jehovah

Te u dopu, nöö u ta ko dë sëmbë u wan gaan famii di dë a hii së u goonliba. Hii fa u ta libi a peipei köndë, söseei hii fa u kiija a tookatooka fasi, tökuseei hii u tuu ta biibi di wan seei soni, nöö u ta hoi dee seei wëti. Lesi Psalöm 25:14 ku 1 Petuisi 2:17, nöö piki di hakisi aki:

• Unfa wan sëmbë ku Jehovah ta ko dë te a dopu, söseei unfa hën ku dee woto sëmbë dee ta dini Jehovah ta ko dë tu?

ANDI I LEI?

Jesosi bi ta lei sëmbë taa ee wan sëmbë kë ko toon wan bakama fëën, nöö a musu dopu. Ee wan sëmbë kë dopu, nöö a musu ko abi wan taanga biibi a Jehovah, a musu ta hoi dee wëti fëën, söseei a musu buta hën libi a Jehovah maun.

Andi i bi o piki?

• Andi da dopu, nöö faandi mbei a dë fanöudu u wan sëmbë dopu?

• Andi wan sëmbë ta mbei wotowan ko sabi te a dopu?

• Andi wan sëmbë musu du ufö a sa buta hën libi a Gadu maun, nöö a dopu?

WOTO SONI DI I SA LUKU

Lesi di woto aki fii ko sabi andi da dopu.

„San na dopu?” (Woto a di website fuu)

Lesi di woto aki fii si andi da dee soni di wan sëmbë musu du faa sa dopu.

„Di lobi di i lobi Jehovah ku di tei di i ta tei dee soni dee a ta du da i u bigi, o mbei i kë dopu” (Di Hei Wakitimawosu, u gaanliba 2020)

Lesi di woto aki fii si faandi mbei wan womi bi kë dopu.

„Den ben wani taki mi srefi kon sabi san Bijbel e leri trutru” (A Waktitoren, 1 u bakajailiba 2013)

Lesi di woto aki fii si faandi mbei i sa feni sömëni gaan bunu te i dopu, söseei andi i musu du fii sa dopu.

„Mi musu dopu?” (Sani di yongusma e aksi​—Piki di kan yepi den, Pisi 2, woto 37)