WOTO 24
Ambë da dee ëngëli, nöö andi de ta du?
Jehovah kë fuu sabi soni u di wosudendu fëën di dë a liba ala. Dee ëngëli dë wan pisi u di wosudendu u Gadu, nöö de ta kai de „dee womi mii u Gadu” (Jöpu 38:7). Andi di Bëibel ta taki u dee ëngëli? Unfa de ta heepi sëmbë? Hii dee ëngëli dë wan pisi u di wosudendu u Gadu ö?
1. Ambë da dee ëngëli?
Jehovah bi mbei dee ëngëli ufö a mbei di goonliba. Leti kumafa wa sa si Jehovah, sö nöö wa sa si dee ëngëli (Hebelejën 1:14). Milionmilion ëngëli dë, nöö hiniwan u de dë apaiti (Akoalimbo 5:11). De ta „du andi Jehovah taki, u di de ta piki ën buka” (Psalöm 103:20). Na awooten, nöö so juu Jehovah bi ta manda dee ëngëli fëën u tja bosikopu go da sëmbë, söseei u heepi dee sëmbë fëën. A di ten aki, dee ëngëli ta heepi Keesitu sëmbë u de sa miti sëmbë di kë sabi soni u Gadu.
2. Ambë da Saatan ku dee taku jeje?
So u dee ëngëli an bi hoi deseei a Jehovah. Di fosu ëngëli di bi hopo fia ku Gadu de ta kai „Didibi ku Saatan di ta ganjan hii sëmbë a goonliba” (Akoalimbo 12:9). U di Saatan bi kë tii libisëmbë, mbei a bi ganjan di fosu womi ku di fosu mujëë. Bakaten, hën a ganjan woto ëngëli go dë ku ën a wan së, hën de hopo fia ku Gadu tu. Dee ëngëli aki dee hopo fia ku Gadu u ta kai taku jeje. Jehovah bi mbei de vinde de puu a liba ala ko a goonliba aki, nöö abiti möön a o kii hii de tuu.—Lesi Akoalimbo 12:9, 12.
3. Unfa Saatan ku dee taku jeje ta suku u ganjan u?
Saatan ku dee taku jeje ta ganjan sömëni sëmbë ku bonu wooko nasö obia wooko, u fan ku sëmbë di dëdë. Di soni aki da wan gaan hogi soni seei. So sëmbë nango a bonuma nasö lukuma u heepi de te de dë ku wan suwaki. Wotowan ta biibi taa de sa fan ku dëdë sëmbë. Ma Jehovah ta bai u taa: „Wan musu go suku heepi a bonuma, söseei wan musu go suku lai a lukuma” (Leifitiki 19:31). A ta bai u a di soni aki, u di an kë u Saatan ku dee taku jeje fëën feni u ganjan. De da felantima u Gadu, nöö de kë du hogi ku u.
WOTO SONI DI I SA LEI
Woo luku andi da dee bunu soni di dee ëngëli ta du, unfa bonu wooko hogi tjika, söseei andi u sa du u Saatan ku dee taku jeje fëën an du hogi ku u.
4. Dee ëngëli ta heepi sëmbë u de ko sabi soni u Jehovah
Dee ëngëli u Gadu an ta peleiki da sëmbë. Ma de ta heepi dee dinima u Jehovah u de miti sëmbë di kë sabi soni fëën. Lesi Akoalimbo 14:6, 7, nöö piki dee hakisi aki:
Faandi mbei u abi dee ëngëli fanöudu u heepi u te u ta du di peleikiwooko?
A ta da i taanga di i ko sabi taa dee ëngëli ta heepi u fuu miti sëmbë di kë jei soni u di Wöutu u Gadu ö? Faandi mbei i taki sö?
5. Ja musu nama ku bonu wooko
Saatan ku dee taku jeje fëën da felantima u Jehovah. Nöö de dë felantima fuu tu. Lesi Lukasi 9:38-42, nöö piki di hakisi aki:
Andi dee taku jeje ta du ku sëmbë?
Wa kë du na wan soni di nama ku dee taku jeje. Lesi Detolonomi 18:10-12, nöö piki dee hakisi aki:
Na un fasi dee taku jeje ta mbei möiti u ganjan u, söseei u fan ku u? Un soni sëmbë guwenti u du di nama ku taku jeje a di pisiwata fii?
I si kuma a dë wan bunu soni taa Jehovah ta piki u taa wa musu du soni di nama ku taku jeje u? Faandi mbei i taki sö?
Pëë di FËLÖN, nöö piki dee hakisi aki.
I si kuma di tapa di Palesa bi buta a di mujëë mii fëën maun bi dë wan bunu soni ö? Faandi mbei i taki sö?
Andi Palesa bi musu du u dee taku jeje an bi sa du hogi ku ën?
Sensi na awooten dee tuutuu Keesitu sëmbë ta finga futu da dee taku jeje. Lesi Tjabukama 19:19 ku 1 Kolenti 10:21, nöö piki di hakisi aki:
Faandi mbei a dë fanöudu fii tuwë hii soni di i abi di nama ku bonu wooko?
6. Wini di feti di u ta feti ku Saatan ku dee taku jeje fëën
Saatan hën abi taki a dee taku jeje liba. Ma di hedibasia Mikaëli, hën da fesima u dee ëngëli dee ta hoi deseei a Jehovah. Mikaëli da wan woto në u Jesosi. Unfa Mikaëli abi kaakiti tjika? Lesi Akoalimbo 12:7-9, nöö piki dee hakisi aki:
Ambë abi möön makiti? Mikaëli ku dee ëngëli fëën, nasö Saatan ku dee taku jeje fëën?
I si kuma dee bakama u Jesosi musu fëëë Saatan ku dee taku jeje fëën u?
I sa wini di feti di i ta feti ku Saatan ku dee taku jeje fëën. Lesi Jakobosi 4:7, nöö piki di hakisi aki:
Andi i sa du u Saatan ku dee taku jeje fëën an wini i?
SO SËMBË TA TAKI TAA: „An dë wan föutu soni u pëë game nasö luku fëlön di nama ku taku jeje. Piizii nöö u ta piizii.”
Faandi mbei di lö fasi u pakisei aki an bunu?
ANDI I LEI?
Dee ëngëli dee ta hoi deseei a Jehovah ta heepi u. Saatan ku dee taku jeje fëën da felantima u Jehovah, nöö de ta ganjan sëmbë ku bonu wooko.
Andi i bi o piki?
Unfa dee ëngëli u Jehovah ta heepi sëmbë u de ko lei soni fëën?
Ambë da Saatan ku dee taku jeje fëën?
Faandi mbei ja kë abi na wan soni di nama ku bonu wooko?
WOTO SONI DI I SA LUKU
Lesi di woto aki fii si taa Jesosi hën da di hedibasia Mikaëli.
Lesi di woto aki fii si taa Didibi dë tuutuu.
Lesi di woto aki fii si andi bi heepi wan mujëë faa bi ko fii u taku jeje.
„A feni wan marki ini libi” (A Waktitoren, 1 u baimatu-liba 1993)
Lesi di woto aki fii ko sabi unfa Saatan ta ganjan sembë ku bonu wooko.
„San na bonu nanga wisi trutru?” (A pasi di e tyari sma go na têgo libi, pisi 5)