Biibi taa woo feni tjubi te di goonliba aki o kaba

Abiti möön Jehovah an o abi pasensi ku di goonliba aki möön. De o poi dee poipoi keiki kaba a sösö, wan kulupu u tiima o ko feti ku dee sëmbë u Gadu, nöö Jehovah o kii dee hogihati sëmbë a di gaan daka fëën Amagedon. Dee Keesitu sëmbë ta wakiti di ten ka dee gaangaan soni aki o pasa.

A dë sö tuu taa wa sabi hii dee soni dee o pasa a di ten u di gaan fuka. Wa sabi na un ten a o bigi. Wa sabi andi o dë di soni di o mbei dee tiima o poi dee poipoi keiki. Wa sabi un longi dee tiima o feti ku dee sëmbë u Gadu, söseei wa sabi unfa soni o dë. Wa sabi tu ku andi Jehovah o wooko u poi dee hogihati sëmbë na Amagedon.

Ma di Bëibel ta konda hii dee soni da u dee u musu sabi, dee o heepi u fuu sa abi futoou ku degihati a di ten di ta ko. Wan u dee soni di di Bëibel ta konda da u, hën da di libi di u ta libi a „dee lasiti daka” (2Ti 3:1). U sabi taa Jehovah „o sati” di ten ka de o poi dee poipoi keiki, sö taa sëmbë an poi di tuutuu biibi kaba a sösö (Mt 24:22). U sabi taa Jehovah o heepi dee sëmbë fëën (2Pe 2:9). Söseei u sabi taa di Sëmbë di Jehovah tei u kii dee hogihati sëmbë, söseei u tjubi dee sëmbë u di gaan kulupu pasa Amagedon, da wan sëmbë di abi makiti, nöö a ta kuutu soni wan leti fasi.​—Ako 19:11, 15, 16.

A di ten di ta ko, soni o pasa di o mbei sëmbë „panta” seei. Ma te u ta lesi ta pakisei fundu u di fasi fa Jehovah bi tjubi dee sëmbë fëën a di ten di pasa, söseei u dee soni dee a abi a pakisei u du a di ten di ta ko, nöö woo sa „taanpu tololoo, nöö u hopo u hedi luku go a liba” u di u sabi taa di juu zuntu fuu kumutu a fuka.​—Lu 21:26, 28.