WOTO 49
Unfa i sa abi wan piizii wosudendu libi?—Pisi 1
Sëmbë di an tööu sö longi jeti, ta mëni taa di wai di de bi ta wai a di tööu daka u de, o dë sö u nöömö. A sa dë sö tuu. Keesitu sëmbë di tööu sömëni jaa longi kaa, söseei dee ta mbei möiti u hoi deseei a dee mama wëti u Bëibel, sabi taa di soni aki sa pasa sö tuu.
1. Andi di Bëibel ta piki dee womi dee tööu?
Jehovah buta di womi kuma di hedima u di wosudendu. (Lesi Efeise 5:23.) Nöö a kë u wan womi ta du soni di o tja wini ko da dee sëmbë fëën wosudendu. Di Bëibel ta piki dee womi taa: „Un musu ta lobi di mujëë fuunu” (Efeise 5:25). Andi di soni dë kë taki? Wan womi di lobi hën mujëë ta libi bunu ku ën te de dë a wosu, söseei te de dë a sëmbë dendu. A ta tjubi ën u hogi an miti ën, söseei a ta dëën dee soni dee a abi fanöudu (1 Timoteo 5:8). Ma di möön fanöudu soni, hën da a ta heepi ën fu hën ku Jehovah ko dë möön gaan mati (Mateosi 4:4). Wan u dee soni di a sa du, hën da a sa ta begi ku hën mujëë, söseei a sa ta lesi di Bëibel makandi ku ën. Te wan womi di lobi ën mujëë ta sölugu ën, nöö hën ku Jehovah o dë mati.—Lesi 1 Petuisi 3:7.
2. Andi di Bëibel ta piki dee mujëë dee tööu?
Di Bëibel ta taki taa „wan mujëë musu abi gaan lesipeki da hën manu” (Efeise 5:33). Unfa a sa lei taa a abi gaan lesipeki da hën manu? A sa pakisei dee bunu fasi dee hën manu abi, söseei di möiti di a ta mbei u sölugu hën ku dee mii. A sa lei taa a ta lesipeki hën manu te hën manu kë du wan soni nöö a piki ku hën, söseei a o ta fan a wan suti fasi ku ën, nöö a o ta taki bunu fëën, aluwasi hën manu an ta dini Jehovah.
3. Andi tu sëmbë di tööu sa du u soni waka bunu a di tööu libi u de?
Di Bëibel ta taki u sëmbë di tööu taa: „De o ko dë wan sinkii” (Mateosi 19:5). Di soni aki kë taki taa de musu köni ku hiniwan soni di sa mbei taa de paati ku deseei, nasö di sa mbei de an lobi deseei kuma fosu möön. Di soni di o heepi de, hën da te de ta dë makandi ku deseei hii juu, te de ta taki unfa de ta pakisei, söseei te de ta taki unfa de ta fii tuutuu. De an o mbei na wan soni nasö na wan sëmbë ko dë fanöudu möön di sëmbë di de ku ën tööu, boiti Jehovah. De o ta köni tu u de an ko dë gaan mati ku wan woto sëmbë, boiti di sëmbë di de ku ën tööu.
WOTO SONI DI I SA LEI
Woo luku wantu fanöudu lei u Bëibel di sa heepi i u soni go bunu a di tööu libi fii.
4. Un dee womi, un musu lobi dee mujëë fuunu, nöö un musu ta sölugu de bunu
Di Bëibel ta taki taa „dee womi musu ta lobi di mujëë u de kuma deseei sinkii.” (Efeise 5:28, 29) Andi di soni dë kë taki? Pëë di FËLÖN, nöö piki di hakisi aki.
Andi da wantu fasi fa wan womi sa lei taa a lobi hën mujëë, söseei taa a ta booko hën hedi ku ën?
Lesi Kolosën 3:12, nöö piki di hakisi aki:
Unfa wan womi sa lei taa a abi dee fasi dee sikifi a di tëkisi aki a di tööu libi fëën?
5. Un dee mujëë, un musu lobi dee manu fuunu, nöö un musu ta lesipeki de
Di Bëibel ta da wan mujëë taanga faa ta lesipeki hën manu aluwasi a ta dini Jehovah nasö an ta dini ën. Lesi 1 Petuisi 3:1, 2, nöö piki dee hakisi aki:
Ee i manu an ta dini Jehovah, nöö u dë seiki taa i bi o kë faa ko ta dini ën. Andi i si kuma bi o möön bunu? Te i ta peleiki dëën hii juu, naa te i ta lei ën taa i abi bunu fasi, söseei taa i ta lesipeki ën? Faandi mbei i taki sö?
Wan womi ku wan mujëë sa taki kai a wan, nöö de du soni makandi. Ma so juu, a sa pasa taa di soni di di womi kë du an ta kai ku di mujëë. Te a dë sö, nöö di mujëë sa taki unfa a ta pakisei, ma a musu fan a wan lesipeki fasi, nöö an musu fëëkëtë taa Jehovah hën da di womi di faantiwöutu u taki andi möön bunu da dee sëmbë fëën wosudendu. Di mujëë musu tuwë gogo ku hën manu a wan së te hën manu kë du wan soni. Te a ta du sö, nöö a sö wan fasi a ta heepi hën manu u soni waka bunu a di wosudendu u de. Lesi 1 Petuisi 3:3-5, nöö piki di hakisi aki:
Unfa Jehovah ta si wan mujëë di ta lesipeki hën manu?
6. Di Bëibel sa heepi i te i abi bookohedi a di tööu libi fii
Na wan tööu libi dë söndö bookohedi. Fëën mbei sëmbë di tööu musu ta fan u de fusutan deseei u de seeka dee bookohedi a di tööu libi u de. Pëë di FËLÖN, nöö piki di hakisi aki.
Andi ta lei taa soni an bi nango bunu a di tööu libi u dee tu sëmbë a di fëlön?
Andi de bi du u de bi sa ta dë waiwai baka a di tööu libi u de?
Lesi 1 Kolenti 10:24 ku Kolosën 3:13. Baka te i lesi hiniwan u dee tëkisi, nöö piki di hakisi aki:
Un wini sëmbë di tööu o feni te de ta du di soni di sikifi a di tëkisi aki?
Di Bëibel ta taki taa u musu ta lesipeki useei. Te u ta lesipeki wan sëmbë, nöö woo ta libi bunu ku ën. Lesi Loomë 12:10, nöö piki dee hakisi aki:
Wan womi nasö wan mujëë musu ta wakiti u di wotowan fëën fosu lei taa a ta lesipeki ën u? Faandi mbei i taki sö?
SÖ SËMBË TA TAKI TAA: „Mi ku mi manu an lobi useei kuma fosu möön.”
Andi i bi o piki sö wan sëmbë u lei ën taa di Bëibel sa heepi de?
ANDI I LEI?
Wan womi ku wan mujëë di tööu sa dë waiwai te de lobi deseei, te de ta lesipeki deseei, ku te de ta libi ku dee mama wëti u Bëibel.
Andi i bi o piki?
Andi wan womi sa du fu hën ku hën mujëë sa abi wan piizii tööu libi?
Andi wan mujëë sa du fu hën ku hën manu sa abi wan piizii tööu libi?
Ee i tööu, nöö un mama wëti a Bëibel sa heepi i fii sa abi wan bunu tööu libi?
WOTO SONI DI I SA LUKU
Luku andi sa heepi i fii sa abi wan piizii wosudendu libi.
Luku di poku-fëlön aki fii si un wini joo feni te i ta hoi iseei a dee mama wëti u Gadu a di tööu libi fii.
Lesi di woto aki fii si andi a kë taki taa wan mujëë ta saka hënseei nëën manu basu.
„Umasma, fu san ede un musu saka unsrefi na ondro un edeman?” (A Waktitoren, 15 u sebitaa-liba 2010)
Luku di fëlön aki fii si andi bi heepi wan womi ku wan mujëë di tööu di de bi abi bookohedi a di tööu libi u de. Söseei luku andi bi heepi de u de bi tööu ku deseei baka, baka di de bi booko tööu.