WOTO 14

Unfa u sa dini Gadu a wan fasi di ta kai ku ën?

Di de doloki buta a pampia

Kumafa u bi lei a di woto ufö disi, nöö na hii keiki ta du soni di ta kai ku Gadu. Ma tökuseei u sa dini di Sëmbë di mbei u a wan fasi di ta kai ku ën. Un fasi u dini Gadu ta kai ku ën? (Jakobosi 1:27) Luku andi di Bëibel ta lei u.

1. Andi sa heepi u fuu sa dini Gadu a wan fasi di ta kai ku ën?

Di Bëibel sa heepi u fuu dini Gadu a wan fasi di ta kai ku ën. Jesosi bi piki Gadu taa: „Di Wöutu fii hën da di tuu” (Johanisi 17:17). So u dee keiki an ta hoi deseei a di tuutuu lei u Bëibel. Dee soni di de ta lei sëmbë an ta kumutu a di Wöutu u Gadu, ma a libisëmbë, söseei de ta hoi deseei a dee guwenti u libisëmbë. Jehovah an ta wai ku dee sëmbë dee an ta hoi dee wëti fëën. (Lesi Maikusi 7:9.) Ma te u ta dini Jehovah kumafa di Bëibel ta taki, nöö di soni dë ta mbei a ta wai.

2. Unfa u musu dini Jehovah?

U di Jehovah da di Sëmbë di mbei u, mbei hën wanwan tö u musu dini (Akoalimbo 4: 11). Di soni aki kë taki taa u musu lobi ën, nöö u dini hën wanwan nöö. Wa musu tei na wan pindi, na wan peentje, nasö wan woto soni u dini ën.—Lesi Detolonomi 5:8, 9.

Di dini di u ta dini Jehovah musu dë „limbolimbo nëën wojo, nöö a musu ta kai ku ën” (Loomë 12:1). Di soni aki kë taki taa u musu ta libi kumafa dee wëti fëën ta taki. Dee sëmbë dee lobi Jehovah, lobi dee wëti fëën dee nama ku di tööu libi, nöö de ta hoi dee wëti dë tu. De an ta du soni di sa tja hogi ko da de, soni kuma sumuku tabaku nasö taku tabaku nasö bebe dööngö.a

3. Faandi mbei u musu dini Jehovah makandi ku woto baaa ku sisa?

A dee komakandi dee u ta hoi hiniwan wiki, u ta feni di okasi u „gafa Jehovah . . . a di kemeente” (Psalöm 111:1, 2). Wan fasi fa u ta gafëën, hën da te u ta kanda. (Lesi Psalöm 104:33.) U di Jehovah lobi u, mbei a ta piki u taa u musu nango a dee komakandi, nöö a sabi taa de o heepi u fuu sa feni di libi u teego. A dee komakandi u ta da useei taanga.

WOTO SONI DI I SA LEI

Woo luku faandi mbei Jehovah an kë fuu dini ën ku pindi. Söseei woo luku andi da wantu fasi fa u sa gafëën.

4. Wa musu dini Gadu ku pindi

Unfa u du sabi taa Gadu an lobi di soni aki? Pëë di FËLÖN, nöö baka di dë, piki di hakisi aki.

FËLÖN: Gadu ta feni ën bunu te u ta dini ën ku pindi ö? (3:26)

Dee peentje: 1. Wan womi ta begi a wan njanjan paabi fesi, söseei a wan pindi fesi 2. Wan womi hoi wan keti di dë ku wan lakpa pau nëën, nöö a ta begi di pindi u Malia.

Andi bi pasa ku so u dee sëmbë u Gadu na awooten di de bi mbei wan pindi u dini ën?

So sëmbë ta mëni taa de o ko möön zuntu ku Gadu te de ta dini ën ku pindi. Ma di soni dë sa mbei Gadu an kë ko zuntu u de. Lesi Ëkisodesi 20:4-6 ku Psalöm 106:35, 36, nöö piki dee hakisi aki:

Un pei soni nasö un pindi i si sëmbë ta tei u dini Gadu?
Unfa Jehovah ta si di dini di sëmbë ta dini pindi?
I si kuma Gadu o feni ën bunu ee u ta dini ën ku pindi ö?

5. Te u ta dini Jehovah wanwan nöö, nöö u ta ko fii u poipoi lei

Luku unfa di dini di u ta dini Jehovah a di fasi di a feni bunu, ta mbei u ko fii u poipoi lei. Pëë di FËLÖN.

FËLÖN: Di tuutuu lei mbei mi ko fii (5:16)

Lesi Psalöm 91:14, nöö piki di hakisi aki:

Andi Jehovah paamusi u taa a o du da u te u ta dini hën wanwan nöö, u di u lobi ën?

6. U ta dini Gadu a dee komakandi fuu

Te u ta kanda, söseei te u ta da piki a dee komakandi, nöö u ta gafa Jehovah, söseei u ta da useei taanga. Lesi Psalöm 22:22, nöö piki dee hakisi aki:

I ta feni taanga a dee piki di wotowan ta da a dee komakandi ö?
I bi o kë seeka iseei fii da wan piki tu ö?

Dee peentje: Wan mujëë di de ta lei soni u Bëibel ta lei u dini Jehovah a di fasi di ta kai ku ën. 1. A ta kanda ta gafa Gadu a wan komakandi. 2. A ta da piki a wan komakandi. 3. A ta lei wan mujëë ku di mujëë mii fëën wan fëlön di nama ku Bëibel.

7. Jehovah ta wai te u ta konda dee soni dee u lei da wotowan

Sömëni fasi dë fa u sa konda dee soni dee u lei a Bëibel da wotowan. Lesi Psalöm 9:1 ku 34:1, nöö piki di hakisi aki:

Andi da wan soni di i lei a di Bëibel di i bi o kë konda da wan sëmbë?

SO SËMBË TA TAKI TAA: „Gadu lobi hii keiki, nöö antoobi unfa u kë dini ën.”

Unfa ii pakisei?

ANDI I LEI?

U ta du soni di ta kai ku di Sëmbë di mbei u, te u ta dini hën wanwan nöö, te u ta gafëën a dee komakandi, ku te u ta konda dee soni dee u lei da woto sëmbë.