Petuisi go a Konelisi

APÖSUTU Petuisi wë dë taanputaanpu naandë ku wan tu u dee mati fëën. Ma faandi mbei di womi tjökö kini a goon a Petuisi fesi? Wan bunu soni a ta du dë u? I sa’ ambë da di womi aki ö?

Di womi da Konelisi. A dë wan hedima u dee sodati u Loomë. Konelisi an sabi Petuisi, ma de bi piki ën faa kai Petuisi ko nëën wosu. Boo go luku unfa a du ko.

Dee fosu bakama u Jesosi bi dë Dju, ma Konelisi an dë wan Dju. Ma a lobi Gadu, a ta begi Gadu, nöö a ta du sömëni bunu da sëmbë. Wë wan sapate, hën wan engel ko nëën ko piki ën taa: ’Gadu feni i bunu, nöö a o piki dee begi fii. Manda wan tu womi be de go tei di womi de kai Petuisi tja ko da i. A dë a di wosu u Simon a Jopa. A ta libi a di ze bandja.’

Wantewante dë Konelisi manda wan tu womi go suku Petuisi. Debooko fëën di dee womi dou zuntu ku Jopa, Petuisi dë a di wosu liba u Simon. Naandë Gadu lei Petuisi wan soni a wan wojo limbo sunjan. Petuisi si wan gaan koosu ta kumutu a liba ta saka ta ko. Hii pei mbeti dë a di gaan koosu dendu. Gadu wëti bi taki taa dee lö mbeti dë an bunu u njan, ma nöö wan töngö piki ën taa: ’Womi Petuisi, hopo. Kii dee soni aki nöö i njan.’

Hën Petuisi taa: ’Wë nönö! Ma njan dee soni dë wan daka. U a’ tjina u de.’ Ma di töngö piki Petuisi taa: ’Nönö womi. Te Masa Gadu taa wan soni bunu u njan, nöö ja musu taki taa i a’ tjina fëën.’ Di soni aki pasa dii pasi baka na baka. Di Petuisi dë ta pakisei andi di soni aki kë taki, hën dee womi Konelisi bi manda, ko dou a di wosu ko hakisi Petuisi baka.

Hën Petuisi saka go a goon, hën a taa: ’Mi da di womi di un ta suku. Faandi mbei un ko aki?’ Di dee womi taki taa wan engel bi piki Konelisi faa kai Petuisi ko nëën wosu, hën Petuisi taa a o go ku de. Debooko fëën Petuisi ku dee mati fëën hopo go a Konelisi a Sesalia.

Konelisi bi kai dee famii fëën ku dee gaan mati fëën ko nëën. Di Petuisi ko dou, hën Konelisi go miti ën. A go tjökö kini a goon a Petuisi fesi, kumafa i ta si aki. Ma Petuisi piki ën taa: ’Nönö mati, hopo taanpu. Mi dë libisëmbë nöö leti kuma i seei.’ Awa, di Bëibel ta lei taa an bunu u tjökö kini a goon begi wan libisëmbë. Jehovah nöö u musu dini.

Petuisi pleiki da dee sëmbë dee ko makandi dë. Petuisi taa: ’Mi si taa Gadu ta tei hii sëmbë di kë dini ën.’ Nöö di a dë ta fan, hën Gadu manda di santa jeje fëën ko a dee sëmbë liba, hën de bigi ta fan peipei töngö. Di soni foondo dee Dju bakama dee bi ko ku Petuisi biga de bi ninga taa dee Dju nöö Gadu bi ta da bunu. Disi lei de taa Gadu an ta si sëmbë u wan apaiti lö möön bunu nasö möön hei möön wan wotowan. Na wan bunu soni disi di hii u tuu musu mëni ö?