Jöpu tan hoi ënseei a Gadu

TJALI kisi i da di womi di dë suwakisuwaki aki ö? Hën në da Jöpu, nöö di mujëë fëën wë i ta si dë. I saandi a ta piki Jöpu ö? A ta piki ën taa: ’Siba Gadu, nöö i dëdë.’ Boo go luku faandi mbei a bi taki sö wan soni. Woo lei tu, faandi mbei Jöpu ta pena sö gaanfa.

Jöpu bi dë wan womi di ta hoi ënseei a Gadu, nöö a bi ta piki Jehovah buka a soni tu. A bi ta libi a di köndë de kai Uzu, di an bi dë longi ku Kaana. Jehovah bi lobi Jöpu gaanfa seei, ma wan sëmbë bi dë di ta buuse ën. I sa’ ambë u?

Hën da Saatan Didibi. Na fëëkëtë taa Saatan da di hogihati engel di ta buuse Jehovah. A bi feni Adam ku Eva ganjan sö taa de pasa Jehovah buka, nöö a mëni taa a sa kisi hii sëmbë u pasa Jehovah buka tu. Ma a bi sa ganjan hii sëmbë u? Nönö. Pakisei dee sömëni womi ku dee mujëë dee bi hoi deseei a Jehovah. U bi lei soni u wan tu u de kaa. Un mëni u de i sa kai ku në?

Baka di Jakopu ku Josëfu dëdë a Egepiti, nöö Jöpu bi dë di wan kodo womi a hii di goonliba di bi ta hoi ënseei a Jehovah. Jehovah bi kë lei Saatan taa an bi o sa mbei hii sëmbë ko hogi. Fëën mbei a piki ën taa: ’Luku mi futuboi Jöpu. Luku fa a ta piki mi buka a hii soni.’

Saatan piki Jehovah taa: ’Na u di i dëën hia gudu mbei a ta dini i ö? Ma ee i tei de puu nëën maun, nöö a o siba i leti a i fesi.’

Hën Jehovah piki Saatan taa: ’Wë hai go. Tei hii dee gudu fëën puu nëën maun. Du hii hogi di i kë ku Jöpu, nöö woo si ee a o siba mi. Luku bunu nöö taa ja kii ën.’

Di fosu soni di Saatan du, hën da a mbei sëmbë fuufuu dee kau ku dee kamëli u Jöpu. Söseei a mbei sëmbë kii dee sikapu fëën. Baka di dë, a mbei wan gaan ventu ko kii dee 10 mii u Jöpu. Hën Saatan mbei di taku siki aki kisi Jöpu. Jöpu bi ta pena gaanfa seei. Di soni aki mbei di mujëë fëën piki ën taa: ’Siba Gadu, nöö i dëdë.’ Ma Jöpu an du sö. Söseei wanlö womi dee ta bai taa de da Jöpu mati, ko piki ën taa a libi hogi. Ma Jöpu bi tan hoi ënseei a Gadu.

Di soni aki mbei taa Jehovah wai seei. Fëën mbei bakaten a limbo Jöpu pasi, kumafa i ta si a di peentje aki. A mbei a ko bëtë u di taku siki fëën. Jöpu bi pai 10 waiti mii baka. A bi ko abi tu toon möön hia sikapu ku kamëli möön dee a bi abi fosu.

Joo hoi iseei hii juu a Jehovah kuma Jöpu ö? Ee i du sö, nöö Gadu o limbo i pasi tu. Joo sa libi u teego te hii di goonliba o ko toon wan gaan hanse djai, leti kuma di djai u Eden.