Gidion ku dee 300 womi fëën

I TA si andi ta pasa aki ö? Hii dee womi dë da fetima u Isaëli. Dee womi dee dë bendibendi, ta bebe wata. Di womi di taanpu a de bandja da Kuutuma Gidion. A ta luku fa de ta bebe di wata.

Luku finifini, nöö joo si taa dee womi an ta bebe wata a di wan seei fasi. So u de fesi nama a di wata. Ma wan u de ta ba wata bebe ku ën maun, sö taa a sa tuwë wojo luku hii kamian. Di soni aki dë fanöudu seei, biga Jehovah piki Gidion taa dee womi dee ta tuwë wojo luku hii kamian te de ta bebe wata, wanwan tö nöö a musu tei. Nöö Gadu taa a musu manda dee wotowan go a wosu. Boo go luku faandi mbei.

Soni miti dee Isaëli sëmbë baka, u di de an ta piki Jehovah buka a soni. Dee Midian sëmbë ta basi de, nöö de ta pena de tu. Fëën mbei dee Isaëli sëmbë ta bai kai Jehovah u heepi de, nöö Jehovah ta haika de tu.

Jehovah piki Gidion be a tei fetima, hën Gidion tei 32.000 fetima. Ma dee sodati dee ko feti ku dee Isaëli sëmbë bi dë 135.000. Tökuseei Jehovah piki Gidion taa: ’Dee womi fii hia poi.’ Faandi mbei Jehovah taki sö?

Biga ee dee Isaëli sëmbë wini di feti, nöö de sa pakisei taa de seei wë wini di feti. De sa pakisei taa de an a’ Jehovah fanöudu u heepi de wini feti. Fëën mbei Jehovah piki Gidion taa: ’Piki dee womi dee ta fëëë be de go a wosu.’ Di Gidion piki de sö kaa, hën 22.000 fetima go a wosu. De fika ku 10.000 fetima u go feti ku dee 135.000 sodati u Midian.

Ma haika! Jehovah taa: ’Dee womi fii hia jeti.’ Fëën mbei a taki da Gidion be a mbei dee womi bebe wata a di kiiki i si aki, nöö hiniwan sëmbë di o bendi hedi u bebe wata a musu manda go a wosu. Jehovah paamusi ën taa: ’Mi o mbei i wini di feti ku dee 300 womi di bi ta tuwë wojo luku hii kamian hii fa de ta bebe wata.’

Di juu dou u feti. Gidion paati dee 300 womi fëën a dii kulupu. A da hiniwan womi wan tutu, wan djogu ku wan falambo nëën dendu. Hën tefa gaan ndeti, hii de tuu lontu di kampu u dee felantima. Nöö a di wan seei juu hii de tuu böö dee tutu u de, hën de booko dee djogu u de, hën de bai taa: ’Di feti dë u Jehovah ku Gidion!’ Di dee felantima weki, de panta fëëë te de an saandi u du. Hii de tuu bigi ta kule, hën Isaëli wini di feti.