Abigaëli ku Dafiti

I SABI di waiti mujëë di ta waka ko miti Dafiti dë u? Hën de kai Abigaëli. A a’ bumbuu fusutan, nöö a tapa Dafiti fu an du wan hogi. Ma ufö u lei u di soni dë, boo go luku unfa di libi u Dafiti waka.

Baka di Dafiti fusi da Saulosu, hën a go tjubi a wan baaku a sitonu mindi. Dee baaa fëën ku dee woto famii fëën go miti ën ala. Söwan 400 womi go a Dafiti, hën a toon fesima u de. Dafiti go a di könu u Moab, hën a hakisi ën taa: ’Gaantangi o, be mi mama ku mi tata dë ku i aki u te mi sabi andi o pasa ku mi.’ Bakaten Dafiti ku dee womi fëën bigi ta tjubi a dee kuun.

Baka di dë Dafiti miti Abigaëli. Hën manu da wan gudu womi de kai Nabali, nöö a abi hia goon. A a’ 3000 sikapu ku 1000 kaabita. Nabali da wan takufasi womi. Ma di mujëë fëën Abigaëli dë wan gaan waiti mujëë. Söseei a sa’ u du soni a wan leti fasi. Wan pasi a bi puu di wosudendu fëën a dëdë maun. Boo go luku unfa a du di soni dë.

Dafiti ku dee womi fëën bi libi bunu ku Nabali. De bi heepi ën tjubi dee sikapu fëën. Fëën mbei wan daka Dafiti manda so u dee womi fëën u go hakisi Nabali wan bunu. Dee womi u Dafiti ko dou a Nabali di hën ku dee wookoma fëën bi dë ta puuma dee sikapu fëën. A dë wan piizii daka, nöö Nabali bi a’ hia soni u njan seei. Hën wë dee womi u Dafiti piki Nabali taa: ’U libi bunu ku i. Wa fuufuu na wan u dee sikapu fii, ma u heepi i luku de. Wë nöö gaantangi baa, da u so njanjan.’

Nabali piki taa: ’Më o da womi kuma unu mi njanjan.’ A fan a wan takuhati fasi, nöö a taki hogihati soni u Dafiti tu. Di dee womi toona go, de konda hii soni da Dafiti, nöö Dafiti hati boonu te na soni. A piki dee womi fëën taa: ’Un tei dee ufangi fuunu!’ Hën de tei pasi nango kii Nabali ku dee womi fëën.

Wan u dee womi u Nabali di jei dee takuhati soni Nabali taki, go konda da Abigaëli andi bi pasa. Wantewante Abigaëli seeka sondi u njan. A buta de a wanlö buliki liba hën a tei pasi nango. Di a miti Dafiti, a saka kumutu nëën buliki, tjökö kini a goon begi ën taa: ’Gaantangi, suwagi, na luku a di manu u mi Nabali e. A don, nöö a ta du sösö soni. Luku wan kado aki. Gaantangi tei ën, nöö da u paadon u di soni di bi pasa.’

Dafiti piki taa: ’I da wan köni mujëë. I tapa mi u më paka Nabali ku hogi u di takuhati fasi fëën. Go fii waiwai a i wosu.’ Bakaten Nabali ko dëdë, hën Abigaëli toon wan u dee mujëë u Dafiti.