Daniëli dë a di baaku u dee lëun

WOOO, maingë! A djei kuma hogi miti Daniëli. Ma dee lëun an ta du na wan soni ku ën! I sabi faandi mbei ö? Ambë buta Daniëli a dee lëun dendu dë? Boo go luku.

Di könu u Babilon, da wan womi de kai Daliusi. A lobi Daniëli seei, biga Daniëli lobi sëmbë, nöö a köni tu. Daliusi buta Daniëli kuma wan hei tiima u di könuköndë fëën. Di soni aki mbei taa dee woto womi u di könuköndë ta haun ku Daniëli. Luku andi dee womi du.

De go a Daliusi, hën de piki ën taa: ’Wë könu o, u fiti buka makandi taa i musu mbei wan wëti taa 30 daka longi na wan sëmbë musu begi wan woto gadu nasö sëmbë boiti ju, könu. Ee wan sëmbë an haika, de musu tuwëën go da dee lëun.’ Daliusi an bi sabi faandi mbei dee womi kë faa mbei di wëti dë. Ma a feni taa a dë wan bunu soni. Fëën mbei a sikifi di wëti. Nöö di wëti an sa tooka möön.

Di Daniëli jei u di wëti, hën a go fëën a wosu go begi, leti kumafa a bi naa. Dee takuhati womi sabi taa Daniëli an o tapa u begi Jehovah. De ta wai seei, biga a djei kuma de puu Daniëli a pasi kaa.

Tjali kisi Könu Daliusi seei, di a jei faandi mbei dee womi bi kë faa buta di wëti dë. Ma an sa tooka di wëti möön. Fëën mbei a piki de be de tuwë Daniëli go da dee lëun a di baaku. Ma di könu piki Daniëli taa: ’Mi wensi taa di Gadu fii di i ta dini o heepi i.’

Di soni fuka Daliusi sö tee taa an sa duumi di ndeti dë. A di debooko fëën a kule go a di baaku ka dee lëun dë. I sa si ën dë. A bai taa: ’Daniëli e, futuboi u di libilibi Gadu! Di Gadu fii di i ta dini tjubi i da dee lëun ö?’

Daniëli piki taa: ’Aai, Gadu manda di engel fëën ko tapa dee lëun buka u de an du mi na wan hogi.’

Di könu wai seei. A mbei de hai Daniëli puu a di baaku. Hën a mbei de tuwë dee takuhati womi dee bi kë puu Daniëli a pasi, go da dee lëun. De an dou di baaku goon seei ufö dee lëun kisi de hoi, booko hii de bonu.

Hën Könu Daliusi sikifi wan biifi da hii dee sëmbë u di könuköndë fëën taa: ’Mi ta buta di wëti taa hiniwan sëmbë musu lesipeki di Gadu u Daniëli. A ta du gaan foombo soni. A puu Daniëli a dee lëun buka.’