Jesosi ta lei sëmbë soni a wan kuun liba

LUKU Jesosi sindosindo dë. A ta lei hii dee sëmbë aki soni a wan kuun liba a Galilea. Dee womi dee sindo zuntu ku ën da dee bakama fëën. A tei 12 u de u toon apösutu fëën. Dee apösutu dë apaiti bakama u Jesosi. I sa’ de në u?

I abi Simon Petuisi ku ën baaa Andiasi. Nöö i abi Jakobosi ku ën baaa Johanisi. Wan woto apösutu de kai Jakobosi, nöö wan wotowan de kai Simon tu. Tu u dee apösutu de kai Judasi. Wan u de de ta kai Judasi Isikaliotu, nöö di wotowan de ta kai Tadeosi. Nöö i abi Filipi ku Nataniëli (hën seei da Batolomisi) ku Mateosi ku Tomasi.

Di de kumutu a Samalia ko dou, hën Jesosi bigi pleiki u di fosu pasi taa: ’Di könuköndë u liba dë zuntu.’ I sa’ andi da di könuköndë u? Hën da di tii u Gadu. Jesosi hën da di könu fëën. A o dë a liba ala ta tii, nöö a o tja böö ko a goonliba. Di könuköndë u Gadu o mbei hii di goonliba ko wan hanse paladëisi.

Jesosi ta lei dee sëmbë soni u di könuköndë. A piki de taa: ’A di fasi aki un musu begi e. U Tata di dë a liba ala, be di në fii kisi gafa e. Be di könuköndë fii ko. Be di kë fii pasa a goonliba aki leti kumafa a ta pasa a liba ala.’ Gaansë u sëmbë ta kai di begi aki ’Di Begi u Masa’. Nöö wotowan ta kai ën di ’U Tata Begi’. I sa hii di begi ö?

Jesosi ta lei dee sëmbë söseei unfa de musu libi ku wotowan. A piki de taa: ’I musu libi ku sëmbë leti kumafa i seei kë u de musu libi ku i tu.’ Ja lo’ te wotowan ta libi bunu ku i ö? Fëën mbei Jesosi taa u musu libi bunu ku woto sëmbë. An o dë wan piizii soni te hii sëmbë o ta libi sö a di paladëisi ö?