Jesosi ta weki dëdë sëmbë

I TA si di mujëë mii aki ö? A abi 12 jaa. Jesosi panjëën a maun, nöö hën mama ku ën tata taanpu nëën bandja. I sabi faandi mbei de dë waiwai sö u? Boo go luku faandi mbei.

Di tata u di mujëë mii da wan hei womi de kai Jailusi. Wan daka di mujëë mii fëën ko siki seei, taa de kandi ën a bedi. Ma an bi ta bëtë möönsö. A bi ta siki nango nöömö. Jailusi ku ën mujëë ta kusumi seei, biga a djei kuma di mii u de o dëdë. Di wan kodo mujëë mii dë nöö de abi. Fëën mbei Jailusi go suku Jesosi. A bi jei u dee foombo wooko Jesosi ta du.

Di Jailusi feni Jesosi, nöö wanlö hia sëmbë bi ta waka ku ën. Ma Jailusi denda a dee sëmbë dë dendu go tjökö kini a Jesosi fesi. Hën a taa: ’Di mujëë mii u mi siki seei.’ Hën a begi ën taa: ’Gaantangi ko kulëën baa.’ Hën Jesosi piki ën taa a o ko.

Di de ta waka nango, hën dee hia sëmbë ta peeta de seei u ko zuntu ku Jesosi. Te wan pisi Jesosi taanpu. Hën a hakisi taa: ’Ambë panjan mi?’ Jesosi fii taa kaakiti kumutu nëën sinkii, fëën mbei a sabi taa wan sëmbë panjëën. Ma ambë panjëën? Wë wan mujëë di bi siki 12 jaa longi kaa. A bi waka go panjan Jesosi a dee koosu fëën, hën a ko bëtë!

Di soni aki mbei Jailusi fii bunu, biga a si taa an taanga seei da Jesosi u kula wan sëmbë. Hën wan bosikopuma ko dou wantewante dë. A piki Jailusi taa: ’An dë fii mbei Jesosi ko möön, biga di mujëë mii fii dëdë kaa.’ Jesosi jei di soni aki, hën a piki Jailusi taa: ’Na fëëë e mati, di mii fii o toona ko bunu.’

Di de ko dou a Jailusi wosu, dee sëmbë bi dë ku gaan fuka a hati ta bai ta këë. Hën Jesosi taki taa: ’Wan këë möön. Di mii an dëdë, duumi a ta duumi.’ Nöö hën de lafu Jesosi mbei ën fa, biga de sabi taa di mii dëdë.

Jesosi tei di mujëë mii tata ku ën mama ku dii u dee apösutu fëën denda go a di kamba ka di mii kandi. A panjëën a maun, hën a kai ën taa: ’Mujëë mii hopo e!’ Hën di mujëë mii ko a libi baka kumafa i ta si aki. Hën a hopo ta waka! Di soni dë mbei hën mama ku ën tata wai gaanfa sö.

Na di mujëë mii aki da di fosu sëmbë di Jesosi bi weki puu a dëdë. Di fosu wan di Bëibel ta taki fëën da di womi mii u di mujëë di manu fëën dëdë, di bi ta libi a di foto de kai Nain. Bakaten Jesosi weki Lazalosi di baaa u Malia ku Maita puu a dëdë. Te Jesosi o tii kuma di könu di Gadu buta, nöö a o mbei gaan hia sëmbë di dëdë, toona ko a libi baka. Di soni dë an musu mbei u wai u seei ö?