Jesosi da gaan hia sëmbë njanjan

WAN gaan hogi soni pasa. De kii Johanisi di Dopuma djunsu dë. Helodiasi, di mujëë u di könu, an bi lobi ën. Hën wë a kisi di könu te fa di könu mbei de koti Johanisi hedi puu.

Di Jesosi jei di soni aki, nöö tjali kisi ën seei. Hën a go dë a wan pii kamian hën wanwan. Ma dee sëmbë faakëën. Di Jesosi si dee gaan hia sëmbë, nöö tjali u de kisi ën. Fëën mbei a konda soni u di könuköndë u Gadu da de, hën a kula dee siki sëmbë.

Di ndeti dë dee bakama fëën ko piki ën taa: ’A lati kaa, nöö soni u njan an dë a di kamian aki. Manda dee sëmbë go a dee köndë zuntu ku aki be de go bai soni u de njan.’

Jesosi piki taa: ’An dë u de go e. Be unu da de soni u njan.’ Hën Jesosi bia luku Filipi, hën a hakisi ën taa: ’Naasë u sa bai soni u njan u tjika hii dee sëmbë aki?’

Filipi piki taa: ’Wë nöö u musu a’ hia möni seei u bai njanjan u hiniwan sëmbë sa feni pikisö seei.’ Andiasi piki taa: ’Wan womi mii dë aki abi feifi bëëë ku tu pikipiki fisi. Ma de an o dou hii dee sëmbë aki seei.’

Hën Jesosi taa: ’Piki dee sëmbë be de sindo a di ahun liba.’ Hën a da Gadu tangi u di njanjan. Nöö hën a booko dee bëëë pisipisi. Baka di dë dee bakama fëën paati dee bëëë ku dee fisi da hii dee sëmbë. De bi dë ku 5000 womi ku dusudusu mujëë ku miii. Hën de njan te bëë u de fuu. Nöö di dee bakama ko pii dee pisipisi dee fika, hën de fuu 12 manda!

Jesosi mbei dee bakama fëën subi a wan boto u de aba di ze u Galilea. A di ndeti wan gaan ventu ko ta naki di boto ta tja nango ta ko. Dee bakama ta fëëë seei. Te wan pisi a di gaan ndeti, hën de si wan sëmbë ta waka a di wata liba ta ko miti de. Hën de bai kai wolo, biga de an bi sabi andi de ta si.

Jesosi taa: ’Wan fëëë e, mi wë.’ Tökuseei de an kë biibi. Hën Petuisi taa: ’Wë Masa ee ju di dë tuutuu, nöö piki mi be mi waka a di wata liba ko a i.’ Jesosi piki ën taa: ’Waka ko!’ Hën Petuisi saka kumutu a di boto ta waka a di wata liba! Te wan pisi hën a bigi ta fëëë, hën a ta saka nango a basu wata zuuu, ma Jesosi heepi ën.

Bakaten Jesosi toona da dusudusu sëmbë njanjan. Di pasi aki a bi a’ seibi bëëë ku feifi piki fisi. Ma di pasi aki seei a bi tjika hii sëmbë. Jesosi ta sölugu sëmbë a wan apaiti fasi seei, na sö nö? Wa o abi booko hedi u na wan soni te a o tii kuma di könu di Gadu buta!