Di Gaan Wata

A DÖÖSË u di ark dee sëmbë bi ta libi go dou kumafa de bi guwenti. De an bi ta biibi jeti taa di Gaan Wata bi o ko. A musu u dë sö taa möönmöön de bi ta bai ta lafu. Ma hesihesi di lafu u de bi o kaba.

Te u de kë mëni, di tjuba bigi kai. A bi ta kai seei kuma te i ta tombi wata puu a wan buketi. Noa bi a’ leti! Ma a bi lati kaa. Na wan sëmbë bi sa go a di ark dendu möön. Jehovah bi söötö di döö gingin.

Hesihesi hii dee lagi kamian bi dë a basu wata. Di wata bi toon gaan lio. A bi ta tötö pau tuwë, ta logoda gaan sitonu, ta giinta gililili. Dee sëmbë bi ta fëëë. De bi ta subi go a dee heihei kamian. De bi musu u bai sabi sö, biga de an bi haika Noa di a bi piki de u de go a di ark dendu di di döö bi dë jabijabi jeti! Ma a bi lati kaa.

Möönmöön di wata bi ta subi ta ko. Di tjuba kai 40 daka, ndeti ku didia. A bi ta subi go a dee kuun, nöö hesihesi dee möön hei kuun seei bi ko dë a basu wata. A sö wan fasi hii dee mbeti ku dee sëmbë dee bi dë a döösë u di ark dëdë leti kumafa Gadu bi taki. Ma hii dee sëmbë dee bi dë a di ark dendu bi dë a libi.

Noa ku dee womi mii fëën bi du wan bumbuu wooko di de mbei di ark. Di wata bi hopo di ark, nöö a bi ta diipi a di wata liba nango siii. Nöö di de dë te wan daka, di tjuba koti, hën di sonu bigi jabi. A bi dë wan soni u si e! Wan gaan ze nöö bi dë u si a hii kamian. Di wan kodo soni di bi dë u si, bi dë di ark di bi ta diipi nango siii a di wata liba.

Dee gaan langa womi an bi dë möön. De an bi dë möön u du hogi ku sëmbë. De ku de mama tuu bi dëdë ku dee woto hogihati sëmbë. Ma andi bi pasa ku dee tata u de?

Dee tata u dee gaan langa womi an bi dë libisëmbë kuma mi ku i. De bi dë engel di bi saka ko a goonliba u libi kuma wominëngë. Hën mbei di di Gaan Wata ko, de an bi dëdë ku dee woto sëmbë. De bi disa di libisëmbë sinkii u de di de bi mbei, hën de bi toona go baka a liba kuma jeje. Ma de an bi dë wan pisi u di wosudendu u Gadu möön. Hën mbei de toon basia u Saatan. Di Bëibel ta kai de taku jeje.

Nöö Gadu mbei wan gaan ventu böö, hën di wata bigi ta saka. Baka feifi liba, hën di ark go tjökö a wan kuun hedi. Nöö sömëni daka baka u di dë, dee sëmbë u di ark dendu bi sa si dee kuun hedi te de bi ta luku go a döö. Möönmöön di wata bi ta saka.

Hën Noa manda wan baaka fou go a döö u di ark. A bi buwa wan pisi, hën a toona ko baka u di an bi sa feni bumbuu kamian u buwa go kai. Sö a bi ta buwa nango ta ko, nöö hiniwan ten te a bi toona ko baka, a bi ta böö a di ark liba.

Noa bi kë sabi ee di wata saka. Hën mbei a manda wan pomba go, baka u di dë. Ma di pomba seei bi toona ko baka biga an bi feni kamian u tan. Hën Noa mandëën go di u tu pasi, hën a toona ko baka ku wan oleifi maun nëën buka. Awa ufö Noa bi ko sabi taa di wata saka. Hën Noa manda di pomba go di u dii pasi, hën a feni wan dëëdëë kamian u libi awaa.

Hën Gadu piki Noa taa: ’Tei hii dee sëmbë u di wosudendu fii ku hii dee mbeti, nöö un kumutu a di ark dendu.’ De bi dë a di ark dendu möön leki wan jaa. I sa fusutan fa de bi ta piizii taa de ko a döö, söseei taa de dë a libi jeti!