De ta wakiti a Jelusalen

DEE sëmbë aki da bakama u Jesosi. De haika Jesosi, nöö fëën mbei de tan a Jelusalen. Nöö di de dë makandi ta wakiti, hën de jei wan soni kuma wan gaan ventu ko fuu di wosu vooo sö. Hën faja töngö ko a hiniwan u dee bakama liba. I ta si di faja a hiniwan u de liba u? Andi di soni aki kë taki?

Wan foombo soni wë! Jesosi dë a liba ku ën Tata, nöö a ta da dee bakama fëën di santa jeje u Gadu. I saandi di jeje aki mbei de du ö? Hii de tuu bigi ta fan peipei töngö.

Sömëni sëmbë a Jelusalen jei di soni di bi böö kuma wan gaan ventu, hën de ko luku andi ta pasa. So u dee sëmbë dë bi kumutu a woto köndë ko a Jelusalen u ko njan di daka u dee Isaëli sëmbë de kai Pensiti. Dee sëmbë aki ko si wan gaan soni! De jei fa dee bakama u Jesosi ta taki di u deseei töngö ta konda dee foombo soni di Gadu du.

Dee sëmbë taa: ’Dee sëmbë aki u Galilea. Nöö unfa a du ko taa de ta taki dee peipei töngö u dee köndë ka u kumutu?’

Hën Petuisi hopo konda hii soni da de. A fan be hii sëmbë sa jei, nöö a piki dee sëmbë fa de bi kii Jesosi ku söseei taa Jehovah weki ën puu a dëdë. Petuisi taa: ’Nöunöu Jesosi dë a liba a di letimaun së u Gadu. Nöö a da unu di santa jeje di Gadu bi paamusi ën. Fëën mbei un ta si nöö un ta jei dee foombo soni aki.’

Wë di Petuisi taki dee soni aki, nöö sömëni u dee sëmbë fii tjali u di soni de bi du ku Jesosi. De hakisi ën taa: ’Andi u musu du?’ Petuisi piki de taa: ’Un musu bia unu libi nöö un tei dopu.’ A di seei daka dë 3000 sëmbë tei dopu hën de toon bakama u Jesosi.