Gadu tei Dafiti buta könu

I TA si andi pasa aki ö? Di womi mii puu di sikapu mii a di hogi mbeti buka de kai beer. Di mbeti bi kisi di sikapu mii, nöö a bi o njan mën. Ma di womi mii kule nëën baka, hën a puu di sikapu mii nëën buka. Nöö di di beer hopo taanpu, di womi mii kisi ën gbaa hoi, hën a naki ën kii! Wan woto pasi, di womi mii aki bi puu wan u dee sikapu fëën a wan lëun buka. Na wan womi mii di a’ degihati disi ö? I sabi ambë dëën u?

Hën da di kijoo de kai Dafiti. A ta libi a di foto Betelehem. Hën avo da Obëti, di womi mii Luti pai ku Boasi. I sabi de jeti ö? Nöö Dafiti tata da Isai. Dafiti ta luku dee sikapu fëën tata. De pai Dafiti 10 jaa baka di Jehovah tei Saulosu buta könu.

Te wan daka, hën Jehovah piki Samuëli taa: ’Tei wan apaiti fatu, nöö go a di wosu u Isai a Betelehem. Mi tei wan u dee womi mii fëën u buta könu.’ Di Samuëli si di möön gaan womi mii u Isai, de kai Eliab, hën a taki nëën hati taa: ’Disi musu u dë di womi di Jehovah tei.’ Ma Jehovah piki ën taa: ’Na luku a di langa ku di hanse fëën e. Nëën mi tei u buta könu.’

Hën Isai kai di womi mii fëën de kai Abinadab, hën a tjëën go a Samuëli. Ma Samuëli piki ën taa: ’Nönö, nëën Jehovah tei e.’ Baka di dë, Isai tja di womi mii fëën de kai Sama ko. Samuëli piki ën taa: ’Nönö, nëën Jehovah tei e.’ Isai tja seibi u dee womi mii fëën go a Samuëli, ma Jehovah an tei na wan u de. Hën Samuëli hakisi Isai taa: ’Hii dee womi mii fii disi ö?’

Hën Isai taa: ’Di möön njönku wan dë jeti. Ma a dë a döö ta luku dee sikapu.’ Di de tja Dafiti ko, Samuëli si taa a dë wan hanse kijoo. Hën Jehovah taa: ’Hën wë disi e. Tutu di fatu nëën hedi.’ Nöö di soni dë Samuëli du. Di juu o dou taa Dafiti o toon könu u Isaëli.