Jelusalen booko kaba a sösö

TENI jaa pasa kaa sensi di Könu Nebukatnesali tei hii dee Isaëli sëmbë dee kisi bumbuu siköö tja go a Babilon. Nöö luku andi ta pasa nöunöu dë! Jelusalen ta tjuma kaba a sösö. Nöö de tei dee Isaëli sëmbë di de an kii ta tja go a katibo a Babilon.

Na fëëkëtë taa di soni aki dee tjabukama u Jehovah bi bai dee sëmbë a fesi taa bi o pasa ee de an kaba ku dee hogilibi u de. Ma dee Isaëli sëmbë an haika dee tjabukama. De dë ta dini taku gadu këdë ka u de dini Jehovah. Fëën mbei dee sëmbë bi musu kisi sitaafu. U sabi sö u di di tjabukama u Gadu de kai Ezekiëli ta konda da u andi da dee hogi di dee Isaëli sëmbë bi ta du.

I sa’ ambë da Ezekiëli ö? Hën da wan u dee njönku womi di Könu Nebukatnesali bi tei tja go a Babilon 10 jaa a fesi ufö Jelusalen booko kaba a sösö. A di wan seei ten de bi tei Daniëli ku dee dii mati fëën, Sadaki, Mësaki ku Abetineko, tja go a Babilon.

Di Ezekiëli dë a Babilon jeti, hën Jehovah lei ën dee hogi soni dee ta pasa a Jelusalen a di Wosu u Gadu. Jehovah du di soni dë a wan foombo fasi. Ezekiëli dë tuutuu a Babilon jeti, ma Jehovah mbei a si hii dee soni dee ta pasa a di Wosu u Gadu. Nöö dee soni Ezekiëli si, hogi pasa maaka!

Jehovah piki Ezekiëli taa: ’Luku dee fanafiti soni dee sëmbë ta du a di Wosu. Luku fa di wosu sinkii fuu ku sindeki ku mbeti peentje. Nöö luku fa dee Isaëli sëmbë ta dini de!’ Ezekiëli ta si dee soni dë, nöö a sikifi andi ta pasa.

Jehovah hakisi Ezekiëli taa: ’I ta si andi dee fesima u dee Isaëli sëmbë ta du tjubitjubi ö?’ Aai, a ta si di soni dë tu. I abi 70 womi naandë, nöö hii de tuu ta begi taku gadu. De ta taki taa: ’Jehovah an ta si u. A go disa di köndë.’

Hën Jehovah lei Ezekiëli wan tu mujëë di dë a di së u di gaan döö di ta luku go a bausë u di Wosu. De dë sindosindo naandë ta begi di taku gadu de kai Tamusu. Nöö luku dee womi dee dë a di dööbuka u di Wosu u Jehovah! De dë söwan 25 womi di Ezekiëli ta si. De ta bendi hedi go a di së u sonu kumutu, nöö de ta begi di sonu!

Jehovah taki taa: ’Dee sëmbë aki aan lesipeki da mi. Na hogi nöö de ta du, ma de ta kumutu langalanga ko te a di Wosu u mi, ta du dee soni dë!’ U di soni dë mbei Jehovah paamusi taa: ’De o fii di hatiboonu u mi a de liba. Nöö tjali u de an o kisi mi te de o poi kaba a sösö.’

Söwan dii jaa nöö pasa baka di Jehovah lei Ezekiëli dee soni dë, hën dee Isaëli sëmbë hopo fia ku Könu Nebukatnesali. Fëën mbei a go feti ku de. Baka wan jaa ku hafu, hën dee Babilon sëmbë booko dee peni u Jelusalen, denda go a di köndë, tjumëën te kisi goon. De kii gaansë u dee sëmbë nasö de tei de tja go buta saafuma a Babilon.

Faandi mbei Jehovah disa di gaan hogi dë pasa ku dee Isaëli sëmbë? Wë u di de an haika Jehovah, nöö de an hoi dee wëti fëën tu. Disi ta lei u taa a dë fanöudu hii juu u du dee soni Gadu ta taki.

A di bigi de bi da wan tu sëmbë pasi u de tan a di köndë Isaëli. Könu Nebukatnesali bi buta wan Dju de kai Gedalia u luku dee sëmbë dë. Ma nöö wan tu u dee Isaëli sëmbë kii Gedalia. Hën dee sëmbë ko ta fëëë taa dee Babilon sëmbë o ko kii hii de tuu puu, u di hogi soni di pasa dë. Fëën mbei de duwengi Jelemia u go ku de, hën de fusi go a Egepiti köndë.

Di soni dë mbei taa na wan sëmbë fika a Isaëli köndë möön. Sëbënteni jaa longi na wan sëmbë bi dë a di köndë möön. Di kamian fika hooo seei. Ma Jehovah paamusi taa baka 70 jaa a o tja dee sëmbë fëën ko baka a di köndë. Ma andi ta pasa a di pisiten dë ku dee sëmbë u Gadu di de tja go a Babilon köndë? Boo go luku.